سەرسەعبو ئارۊی، دلۍ زانستگەو ھەڵەبجەینە جە کۊنگرێۋە ڕۊنامە ۋانېنە، پارێزگارو ھەڵەبجەی کەمپەینو کۊکەرڎەیۊ ھامکاریش پۍ زەرەر ۋنەکەوتاو بومەلەرزەکەو سەرنېشتو ۋەرنېشتو کورڎسانی ئەرەیاۋنا.

ئازاڎ تۊفېق، پارێزگارو ھەڵەبجەی جە کۊنگرێۋە ڕۊنامە ۋانېنە ھامخەمی شارەکەیش پۍ کورڎاو سەرنېشتو ۋەرنېشتو کورڎسانی ئەرەیاۋناو ۋاتش: پێسە ھەڵەبجەی بەشڎاری ئا کۊستاما کەرڎەن کە تەمامو مرۊڤایەتی توششا بۊنە، بەمەڵامەتو ئانەی ۋێما خۊتان ئێشو ئازارێنمۍ، ئارۊیچ کەمپەینۍ ئەرەیاۋنمۍ پۍ ھامکاری کەرڎەو خەڵکو سەرنېشتو ۋەرنېشتو کورڎسانی، کە توشو کارەساتۍ گۊرەی بیێنۍ بە مەڵامەتو بومەلەرزەکەیۊ.

کەمپەینەکە، جە سەعاڎ ١١ و ئارۊیۊ دەسش پنەکەرڎەن و پۍ ماۋەو چۋار ڕوۋا ۋەردەوام بۊنە و چنەشەنە جلوبەرگو ژەناو بەتانی و فەرش و ۋارڎەمەنی و زەڕ ھورگېریۊ.

پارێزگارو ھەڵەبجەی داوا جە دۊڵەمەنڎاو تەمامو ھامۋڵاتېا شارەکەی کەرۊنە، دەسو خێرێو ئاۋەڎانی درێژ کەرانۍ پۍ کەمپەینەکەی و ھامکاری ھامۋڵاتېا سەرنېشتو ۋەرنېشتو کورڎسانی بکەرا، کە ئیسە بە مەڵامەتو بومەلەرزەکەیۊ توشو کارەساتی بیێنۍ.

ھامۋەخت ھەر ئارۊ، جە سنورو پارێزگاو ھەڵەبجەینە و جە مەنتېقەو خورماڵیەنە کەمپەینو کۊکەرڎەیۊ ھامکاریەکا جە کتێبخانەو گرڎی خورماڵینە ملۊ ڕاۋە.

ھ.ش