پېلانگێڵناو ١٥و شوباتو ساڵەو ١٩٩٩ی جە دژو ڕابەر ئاپۊی جە چنڎین ۋڵاتانە بە ئەنجامداو چالاکی و ڕاپېمای شەرمەسار کریا. چا چۋارچێۋەنە جە بەرلېنو پایتەختو ئەڵمانېای چالاکېێۋە شەرمەسارکەرڎەی و ناڕەزایی ئەنجامدریا.

کورڎسانیۍ بەرو ۋڵاتی جە شارو بەرلینی یاڎو " سەما ئالپ ، مستەفا کورت ، ئەحمەد ئاجار ، سېنان کاراکوش" یشا کەرڎۊ، کە جە ١٧و شوباتو ١٩٩٩ی جە ۋەردەمو باڵېۊزخانەو ئېسرائېلی جە ۋەختو ئەنجامداو چالاکېێنە پۍ شەرمەسارکەرڎەی و ناڕەزایی بەربڕیەی ۋەران ۋەرو ئا پېلانگێڵېەینە جە لایەنو ھێزە ئەمنیەکاۋە کۊکوش کرېۍ. کورڎسانېۍ بەرو ۋڵاتی گرڎ ساڵۍ جە یاڎو گەشمەرڎەبیەو ئا ۋڵاتپارێزانە ۋەرو دەمو باڵېۊزخانەو ئېسرائیلیەنە جە بەرلېن چالاکی ئەنجام مڎا. کورڎسانیۍ بەرو ۋڵاتی ئێساڵېچ یاڎو ھەرچۋار گەشمەرڎەکاشا کەرڎۊو تاجە گوڵېنۍ سېاۋشا ۋەرودەمو باڵېۊزخانەکەینە نېارە.

گلێرگەو ژەنا دەستانی و ئەنجومەنو بەرلېن ناڤ-ی بەشڎاریشا جە چالاکېەکەنە کەرڎ. چالاکېەکە بە ڕێزگێرتەی جە گەشمەرڎا ئاخێزو کورڎسانی دەسشپنە کەرڎ. دماتەر حوسێن یڵماز ئەنڎامو بەرلېن ناڤ-ی ۋاتش:''ۋەڵۍ گرڎ چێۋێنە با سەرەو ڕابەرو گەلو کورڎی عەبدوڵا ئۊجالانی و گرڎو گەلو کورڎی ساغ بۊنە. ئارۊ، کە ٢٤ەمېن ساڵەو پېلانگێڵی مېان نەتەۋەین، ئێمە گەشمەرڎەکێما جە یاڎێنۍ گرڎ ۋەختۍ یاڎشا کەرمێۋە. ھەتا ئازاڎ بیەو ڕابەر ئاپۊی ئی ئەرەکۊشایە ۋەردەوام بۊ.

چالاکا گوڵێشا چا یاگێنە نېێرە، کە ئا چۋار ۋڵاتپارێزێشە چنە گەشمەرڎۍ و کۊکوش کرېۍ و دروشمەکا " ئېسرائېلی کوشەر" و " گەشمەرڎۍ مەمرا"نۍ ۋاچێنۍ.

ھ.ش