جە بەرزایەکۍ هەورامانی چنڎین مەترۍ ۋەرۋە ۋارێنە
جە شاهۆ، کۆساڵان، ماکۋان، ملندوو، تەتە، نۋەیجەڕ و ژاڵانەو هەورامانی چەنڎین مەترۍ ۋەرۋە ۋارێنە و هەرمانگەکۍ ڕاهداری و هامۆشیۍ سەرقاڵۍ ماڵای ۋەرۋەکۍ و کەردەیۆ ڕاکانۍ.
ئێساڵ چوون ساڵانۍ ۋیەردۍ، جە ناوچە جیا جیاکۍ هەورامانی ۋەرۋێی فرۍ ۋارێنە.
جە ئا بارەۋە هەرمانگە پەیۋەندیدارەکۍ جە هەورامانو دیمو وەراسانو کوردستانی ئاشکراشان کەردەن: جە سەرجەم ناوچەکاو هەورامانی چوون (ژاۋەرۆ، گاوەرۆ، تەخت، لهۆن و شامیان) بێجگە جە ۋارانی، کەم تا فرە بە ئەنڎازەی جیا ۋرۋە ۋارێنە و ئەگەر بە ئەی شێۋازە بەردەوام ببۆنە، ئێساڵ تەرسەو کەمئاۋی وشکە ساڵی نمەبۆنە.
هەر پاسە ئاشکرشا کەردەن: جە کەشە بەرزەکا (شاهۆ، کۆساڵان، ماکۋان، ملندوو، تەتە، نۋەیجەڕ و ژاڵانە)ی چنڎین مەترۍ ۋەرۋە ۋارێنە کە بیێنە بە باسیو ڕابڕانی جە میانو شارۍ و دەگایەکاو هەورامانیەنە بە تایبەتی، ڕاکۍ سەڵۋاۋا بە مەریوانی، مەریوان بە پاۋەی و دەگایەکۍ دەوروبەریشا ۋزیێنێرە.
تیمەکۍ ڕاهداری و هامۆشیۍ جە پاۋە، نۆدشە، مەریۋان، سەڵۋاۋا و نەوسوڎە، کە سەرقاڵۍ ماڵای ۋەرۋەکۍ و کەردەیۆ ڕاکانۍ و دەسنیشانشا کەردەن: جە چنڎین یاگێنە بە تایبەتی جە ملەندوو و ژاڵانە سەرەڕاو ۋارای ۋەرۋۍ فرۍ، ۋەرۋێچ هەرەسش کەردەن و تەمە ناوچەکەش پۆژنانەرە. ئانەیچە ئانڎەی تەر هەرمانەو ماڵای و پاککەردەیۆ ڕاکاش زەحمەت و سەختەر کەردەن.
هەرمانگەکۍ ڕاهداری و هامۆشیێ ناوچە جیا جیاکۍ هەورامانی داواشا جە هاموڵاتیا بەگردیی و شۆفێرا بە تایبەتیی کەردەن؛ سەردای ڕا سەختەکا و بەرزاییەکا نەکەرانۍ پابەنڎۍ ڕانموونیەکا ببانۍ و پنەۋازەن شۆفێرەکۍ زنجیر جە تایۍ ماشینەکاشا بەسانۍ و ئەگەر تووشۍ هەر ڤییەر و ڕووەدایێۋی بیۍ، خێرا تیمە فریاگوزارییەکاشا هایدارۍ بکەرانێوە.
