پێسە ۋەڵتەر چڕېەی پۍ لوایڕاۋەو ناڕەزایی بەربڕیەی سەرتاسەری کرېا بۍ ، جە بەشۍ جە شارەکاو ئێرانی و ۋەرکۊتو کورڎسانیەنە ۋێنېشاندای و گلێربېەېۊ لۋا ڕاۋە ، ھامۋەخت فشارەکۍ دەسەڵاتیچ پۍ سەرو چالاکا ھەتا مۍ تنتەر کرېاۋە .
جە ڕۋانی ۋېەرڎەنە ، چالاکۍ ئێرانی و ۋەرکۊتو کورڎسانی داواشاکەرڎ ، ڕۋان و ٣٠ و ٣١ و کانونو دۋەمی و ١ شوباتی ناڕەزاېی سەرتاسەری بلۊ ڕاۋە ، ئەچا چۋارچێۋەیچەنە شەۋەی ۋېەرڎۍ جە چن شارێۋە ۋەرکۊتو کورڎسانی پێسە " سنە و بۊکان " ی جۋانۍ مجېێرە جاڎەکاو بە کەرڎەېۊ ئێری و پەک وستەو ئاماو لۋا (ھاتوچۊ)ی کۊبېەېۊشا سازکەرڎو چنڎېن دروشمێشا دژو دەسەڵاتی ۋاتێۋە .
جە چن مەنتېقێۋە پێسە ئەکباتانی و جاڎەو بەھەشت و تارانی گلێربېەېۊو ڕاپېمای شەۋانە لۋا ڕاۋە دژو دەسەڵاتی دروشمۍ واچێنێۋە ، جە شارو مەشھەدی-چ جۋانۍ جە ڕاو کەرڎەېۊ ئێری و وستەېرە جاڎەکا ناڕەزاېشا ۋەران ۋەرو دەسەڵاتی نېشانە دا .
ھامۋەخت جە شارەکاو " ېەزد ، کرمان ، ئەسفەھان " ی بە بۊنەو ېاڎکەرڎەېۊ جەژنەو سەدەی کە جەژنێۋە قەېمېەو ئێرانېەکانە مەراسېمو کۊبېەېۊ سازکرېا چنەشەنە دروشمەو
" ژەنۍ ، ژېای ، ئازاڎېی " و چنڎېن دروشمۍ تەرۍ دژو دەسەڵاتی وچېێۋە .
جە لاېۍ تەرۊ ھێزی دووەشەمە جارێۋېتەر فەرمانبەرۍ و خانەنشېنۍ ۋێڕاۋەبەری پەېوەنڎېەکا ، جە فرەو شارەکاو ئێرانی و ۋەرکۊتو کورڎسانی جە پاو زېاڎ کەرڎەو مەعاشەکاشاو گێڵاېۊ دەرماڵەکاشا ۋێنېشانداېشا سازکەرڎ .
ھامۋەخت چنی ۋەردەوامی چالاکېەکا ، فشارەکۍ دۊڵەتی-چ پۍ سەرو چالاکا و توێژە جېاجېاکا ۋەردەواماو ھێزی دەېان کەسۍ تەرۍ جە ۋەرکۊتو کورڎسانی گېرېۍ ، چانېشا دۋۍ مامۊسۍ دېنېۍ بە نامەکاو " ئېبراھېم کەرېمی و لوقمان ئەمېنی " کە بە درێژاېی سەرھۊرداکاو " ژەنۍ ، ژېای ، ئازاڎی " پەشتېوانېشا جە خەڵکی کەرڎەبۍ .
جە زاھېدانېچ مەولەوی عەبدولمەجېڎ موراڎ زەھی ، ڕاوێژکارو عەبدولحەمید ئېسماعېل زەھی ، کەساېەتی ئاېنی سونەکاو ئێرانی گېرېا .
سەربارو تنکەرڎەېۊ فشارەکا ، قەرارا ئارۊو صەوای ناڕەزاېی سەرتاسەری جە ئێران و ۋەرکۊتو کورڎسانی ۋەردەوام بۊ .
ماۋەو چۋارمانگان سەرھۊرداو " ژەنۍ ، ژېای ، ئازاڎی " جە ئێران و ۋەرکۊتو کورڎسانی دەسش پنە کەرڎەن و سەربارو ئا گرڎ فشارو ھەڕەشەو گێرتە و جە دارداو ۋێنېشاندەرا سەرەمڕە ناڕەزاېیەکۍ ۋەردەوامێنۍ .
ھ.ئ
