نەبییەی خزمەتگوزاری، کەمی کارەبای نیشتمانیی، و دابەش نەکەردەو نەوتۍ و سۆتەمەنی، سودمەند نەبییەی هەورامانی جە داهاتو مەرزو تەۋێڵۍ/ شۆشمۍ، خراپیو جادە و بانەکا و پەراوێزوسەەی ناوچەکەی، خەڵکو هەورامانیش ئاردنە مێڎان و جە شارو بیارۍ کۆبییەی ناڕەزایەتیشان ئەنجامدا.
سەرسەبای ئارۊی، خەڵکو بیارۍ و هەورامانی دەسشا بە گلێرۆبیەی و وێنیشاندای کەرد و یەکەم هەنگامیچشا پەی فشار وستەی سەرو حکومەتی و پەی کەردەیی کەردەی داواکارییەکاشا، خەڵکە ناڕازییەکە ستەرەی جادەو سەرەکی بیارۍ و تەۋێڵۍ بۍ کە ملۆوە مەرزو شۆشمۍ.
خەڵکو هەورامانی بەگردیی و بیارۍ بە تایبەتیی ئی داواکاریشا جە حکومەتی کەردۍ:

- دابین کەردەی ٢٤ سەعاتۍ کارەبای نیشتمانیی
- دابەشکەردەی نەوتۍ و سۆتەمەنی
- خاسکەردەی جادەو سەرەکی هەورامانی هەر جە خوڕمال تا یارۍ، تەۋێڵۍ و مەرزو شۆشمۍ/ تەوێڵۍ
- خەڵکو ناوچەکەی بە دەرەجەی یەکەم سودمەندێ با جە داهاتو مەرزو شۆشمۍ/ تەوێڵۍ
- بە زوویی ئەۋەکەردەی خەسخانەو بیارۍ
- جە ئەرەمەرزنای کارمەندانە، بیارۍ و هەورامان پشکۍ یەکەمەشان وەربگنۆنە.
- دەسکەردی بەوانای بە هەورامی جە وانگاکاو هەورامانیەنە و پرۆگرامی هەورامی بە فەرمی پەسەند بکریۆنە.

وێنیشانەدەرەکۍ هەورامانی واتشا: تا ئا وەختە داواکارییەکێما قبوڵۍ کریانۍ، سورێنمۍ جە بەردەوامیدای بە وێنیشاندای و ناڕەزایەتی.

هـ.هـ