ئېرو نەورۆزو ئێساڵی بە درووشمۊو "ڕابەرایەتی ئازادی و گلېرگەی دیموکراتیک"ی جە ناوچەو لجێی ئامەدی کریاوە. ئەنداماو پارت و ڕێکوزیاکا و هاموڵاتیا بەشدارۍ بێنۍ. هۊرپڕای سازکریا و درووشمۊو "بژیۋۆ سەرۆک ئاپۆ" و "ژەنی ژیۋای ئازادی" بەرزکرۍ کریێوە.

هامسەرۆکو دەبەپەو ئامەدی، محەمەد شیرین گوربوز واتش: "ڕابەرو گەلوو کوردی ئېژا ئۆجالان ڕاش پەی کەردیمۍ. ۋەردەمو بانگەوازەکەینە پەی ژیۋای ئازادی و گلېرگەی دیموکراتیک"ینە سەرەو ڕێزی منامنمېرە. نەورۆز پیرۆز ئێژا ئۆجالان".

گوربوز ئەرەیاۋناش ئەوەکۊشای بۆ بە مایۍ مسۆگەرکەردەی ئازادی گەلوو کوردی و ئازادی ڕابەر ئاپۆی، جەختش کەرڎۆ دژمنایەتی کوردی دەردەو گەلا تورکیای نمەوەرۆ، پەنەوازا دەسو ئاشتی درێژ بکریۆ. واتش: "خاوەنداری جە زوان و کەلتوور و ئیرادەو ۋێما مکەرمۍ. ئېژا ئۆجالان بانگەوازش کەرڎ پەی گلېرگەی دیموکراتیکی. پەکەکە جوابش داوە و ئایێربەسش ئەرەیاۋنا. شمە چەمەڕاو چێشیندۍ؟ ئیتر وەسێن. پەی گەلوو کوردی ژیۋایۍ ئازادما گەرەکا. نەورۆزو ئێساڵی، نەورۆزو ئاشتی و ئازادییا".

ئەندامو ئەنجوومەنو جوانا دەم پارتی ڕێزان کاگان ئارسەلان سەرنجش وست سەرو گرنگی نەورۆزی پەی گەلوو کوردی پېسە هێماو مڎرامانی و ئەوەکۊشای، جەختش کەرڎۆ، پەنەوازا جە نەورۆزەنە بەعالی جە بانگەوازەکەو ڕابەر ئاپۆی بیاومێنە.

هەرپاسە ئەرەیاۋناش مشۊم دۊڵەت چی پرۆسەنە هەنگامە بنیۆ، تەئکیدش کەرڎۆ جوانۍ دژو سیاسەتو جەنگی تایبەتی پەی ئاشتیێوە شکۆداری مڎرامان مکەرا، واتش: "ئەر جوانۍ چی پرۆسەنە دەور گێڵنا، متاومۍ ژیۋایۍ شکۊدار بژیومۍ، ئەر جوانۍ سەرمەشقی ئی پرۆسەیە بکەرا، حیچ هێزێوە نمەتاوۆ ۋەردەمشانە مردۆ".

دماتەر پەرلەمانتارەو دەم پارتی بێریتان گونەشە ئەرەیاۋناش ئێساڵ ڕابەر ئاپۆ جە ٢٧ و شوباتینە ئێرو نەورۆزیش جە ئیمراڵینە کەردۆ، واتش: "مشۊم ئێمەیچ بە ئێرو نەورۆزی و مڎرامان جوابش بڎەیمێوە".

بێریتانە ئەرەیاۋناش جە ۋەرنیشتەنە بە سەرمەشقایەتی ژەنا، ژیۋایۍ تازە بنیاڎنریان، واتش: "دماو بانگەوازو ٢٧ و شوباتی جە جەهان و کوردەسان و ۋەرکۊتوو مېیامینینە، چێوی فرە فاڕیان. بە بانگەوازەکەو ئێژا ئۆجالانی ئێمە پەی گرڎو گەلا ژیۋایۍ تازە ئاماڎە مکەرمۍ. پەنەوازا پاڵپەشتی جە بانگەوازو سەدەی بکەرمۍ".

دماتەر بەجۆشێوە گۊرۆ ئێرو نەورۆزی کریاوە. درووشمۊو "بژیۋۆ سەرۆک ئاپۆ"ی بەرزکریاوە، بە گۆرانیۍ و هۊرپڕای مەراسیمەکە بەردەوام بۍ.