لقو ژوورو موھەندیساو بېناسازی (imo) جە وان و لقو یەکێتی ژوورەکا بېناسازی و موھەندیسا ترکی (tmmob) گروپێۋی پێک ئاما جە ٧٤ موھەندیسا بېناسازی پۍ دەسنېشانکەرڎەو زەرەرەکا بومەلەرزەکەی ڕەوانەو مەرەشی کریۍ.

 مېخائېل ئاتېک سەرۊکو لقو ژوورو موھەندیسا بېناسازی جە وان ئەرەیاۋناش، ئاڎۍ بە ھەماھەنگی چنی وەزارەتو ژېوگەی و ئاوەڎانکەرڎەیۊ و فاڕیاو کەشو ھەوای ھەرمانە کەراو ۋاتش:'' ناۋەنڎو گرڎیی tmmob جە شارەکانە پەنەوازش بە ھامکاری ھەن، ئێمەیچ جە وان ١٥٤ کادرۍ بە ئەزمونێما ھەنۍ. چا ژمارەیچە ٧٤ کەسێشا کیاستێنێما پۍ مەرەشی. پۍ ماۋێۋە ۋەردەوامۍ با جە ھەرمانەکاشا و دماتەر گێڵاۋە.

 ئەگەر جارۍ تەر داواما چنە کەرا پۍ ئانەی ھەڤاڵەکێما بەشڎاری جە دەسنېشانکەرڎەو زەرەرەکا کەرا  ئێمە جارێۋەتەر کېانمێشاۋە پۍ مەنتېقەکەی. ئێمە گەرەکمانە جە مەڵامەتو ئی وڕا گۊرەیە بېاومێنە. چا بومەلەرزەنە دەیان ھەزار یانێو ھەزاران بېنۍ زەرەرشا ۋنە کۊتەن. ئێمە ناچارێنمۍ زەرەرو بېناکا دیاری کەرمۍ. ئا ھەرمانەو وشکنایە بە ئامارەکاو وەزارەتی زیاڎ کریانە. دما بەدماو کۊکەرڎەیۊ ئامارو داتاکا  دەزگاکە گوزارشتو قەرارو ۋێش سەرو ئا مژاریە مڎۊ. ئامانجما خێراکەرڎەو پرۊسەکەین و جابەجۍ کەرڎەو پەنەوازیەکا گەلېن بە یانا".

ھ.ش