جە ۋەرکۊتوو کوردەسانینە ژەنێوە باڵبەسە کریا
ژەنە کوردێوە چالاکەو مافەکا مرۆڤی کە ئەرەنیشتۍ کرماشانیەنە جە لایەنو دۊڵەتو ئێرانیوە بە مەڵامەتو بەشداریکەردەی جە مەراسیمەکا نەورۆزینە بە هۊرکوای سەرو یانەکەیش باڵبەسە کریا.
ڕێکوزیاو مافو مرۆڤو هەرانای ئاشكراش کەرد؛ هېزی ٢٥و ئایاری ژەنێوە کوردە بە نامۍ مەهسا زارعی چالاکەو بوارو مافەکا ژەنا جە پارێزگاو کرماشانو ۋەرکۊتوو کوردەسانی جە لایەنو هێزەکاو ئیتلاعاتو ئا شارەیۆ باڵبەسە کریا و پەی شۊنەمېوە نادیاری فاڕیاوە.
هەرانا ئاماژەش پانەیچ دان، هێزەکۍ ئیتلاعاتو شارەکەی هرووژمشا کەرڎەن سەرو یانەکەیش و بە بێ ئەمرەو دادوەری و بە بەکارئاوردەی تنوتیژی باڵبەسەشا کەرڎێنە.
هەرانا جە دمادماینە ئاماژەش پانەی دا مەڵامەتو باڵبەسکەردەی مەهسا زراعیۍ بە مەڵامەتو بەشداربیەیش بیەن جە مەراسیمەکا نەورۆزینە و ماچۆ: " ئا ژەنە چالاکە کوردۍ وەڵتەریچ بەمەڵامەتو بەشداریکەردەیش جە مەراسیمەکا نەورۆزینە جە لایەنو هێزە ئەمنییەکا ئێرانیوە داوا کریێنە و ڕووبەڕوو ۋنەپەرسایۆ کریێنۆ."
