جە ڤیێنانە پەی شەرمەزارکەردەو کۆمکووژیی عەلەوییەکا سووریای بەدەسو هەتەشی، گلێرۆبیێوە ڕێکوزیا. گلێرۆبییەکەی جە لایەنو ١٠ ڕێکوزیای جەماوەریی ئەنجام دریا و بە بەشداری هەزاران کەسێ وەردەموو پەڕلەمانو ئا وڵاتەیە گلێرێ بیێوە.

قسەکەرێ گلێرۆبییەکەی بە تنی کۆمکوژی سەرو عەلەوییەکاشا شەرمەزار کەرد و  داوا جە وەرپرسا نەمسای کەرد کۆمکوژییەکەی وسۆنە ڕۆژەڤو وێشۆ. وە پەی دادگایکەردەی بکەرا کۆمکووژییەکەی جە ئاسو دادگاو مییاننەتەوەییەی هەنگامە بنیا.

پەڕلەمانتارو پارتو سەوزو ڤیێنای، بێریڤان ئاسڵانە کە بەشداری چالاکییەکەکەی بێ، واتش: "کۆمکوژی سەر و عەلەوییەکا تاوانەنە دژ بە مرۆڤایەتی. حیچ گەل و باوەڕێ نمەبۆ پی جۆرە کۆمکووژی کریۆنە. دژ مردای ئی کۆمکووژییە ئەرکو گرڏ لێوەن."

جە گلێرۆبییەکەینە بە بەردەوامی درووشمەکێ "دمای بە قڕکەردەو عەلەوییەکا باردێنە"، "جە وەراوەرو کۆمکووژییەکانە بێدەنگێ مەنپبیمه" و "بکووژو ئەردۆغانی، بکوژو جۆلانی" وچیێوە.

گلێرۆبییەکەی بە چەپڵەدای وەنە و واتەیۆ درووشمەکا دمایش ئاما.