شاندو دەم پارتی جە ئەڵمانیا، بەریتانیا و ویلایەتە یۆگێرتەکا ئەمریکاینە پەرەش بە هەرمانە دیپلۆماسییەکاش دان. یووە جە ئاندامۆو شاندو دەم پارتی کە جە ما بەینو ٢٢-٢٨و حوزەیرانینە جە ئەمریکا بڕې چەمپنەکۊتەیې دیپلۆماسیێش کەردې، پەرلەمانتارەو ئامەدو دەم پارتی، جەیلان ئاکچایە پېوەس بە گلېرۆبیەکا و سەرنجەکاش پەی ئاژانسیما قسێش کەردې.

ئاکچا جە سەرەتاو قسەکاشەنە ئاماژەش پانەیە دا هەوڵمڎا پەی ڕای گرڎیی مېیاننەتەوەیی باسو پڕۆسەکەی بکەرا و بە بانگەوازی تاریخی ٢٧و شوباتو ڕابەر ئاپۆی دەسشپنەکەرڎ و واتش: "شاندەکېما بە سەرۆکایەتی هامسەرۆکیما تونجەر باقرخانی جە ئەڵمانیا و بەریتانیانە دیدارش سازې کەردې و جە ئەمریکایچەنە دەسما بە چەمپنەکۊتەی کەرد. جە سەر ۋنەداکەیمانە چنی ئەرەمەرزیا سیاسییە پارێزکار، دیموکرات و سۆسیالیستە دیموکراتەکا چەمپنەکۊتەیما کەرڎ. ئی ئەرەنیشتەیە دەرفەتو ئانەیش وەشکەرڎ کە جە ما بەینو سیاسەتو 'هێڵۆو یەرەم'ی جە ئەمریکا و هێڵۊو ئێمەنە پەیوەندی ماناڎار بنریۆرە."

ئاکچایە ئەرەیاۋناش کە جە ئینستیوتی ۋەرکۊتوو مېیامینە (ME) بەشدارې گلېرۆبیەیې بیې و واتش: "چی گلېرۆبیەینە بە بەشداری جەمێوە باڵیۆزې پلە باڵې وەڵینی و ئیساتې، ۋەرپەرسا کاروبارو جبەری و ئەکادیمیسیەکې بەشدارې بېنې. ئەهمیەتې فرە پەی پرۆسەکەی بې. بە تایبەتی پرسیارە کریې پەی چێشی تورکیا هەنگامەی ڕۆشنە نمەنیۆ و ئی پرۆسە چنی بەرەو وەڵې ملۆ."

جە بەردەوامی قسەکاشەنە ئاکچایە ئاماژەش پانە دا چنی یەکە جیا جیاکا ئەنجومەنو پیرانو ئەمریکای و وەزارەتو جبەرو ئەمریکای گلېرې بیێنێوە و واتش: "بەڵام جە رۊو سەرۋنەداکەیمانە بە مەڵامەتوو هرووژمو ئەمریکای پەی سەرو ئێرانی پشێویە هەرێمییەکې فرې بێنې. هەرپاسە ئا پاکێجەی ‘Big Beautiful Bill’ کە ئیدارەو ترامپی وستەبێش ڕۆژەڤۆ، دلې ڕای گرڎینە بی بە مەڵامەتو مشتومڕی فرە گۆرەی. هەم بە مەڵامەتوو ڕۆژەڤی دلېینەی هەم بە مەڵامەتوو قەیرانەو سیاسەتو جبەری، چنی ئانەی مژارەکې پېوەس بە پڕۆسەکەی ڕۆژەڤی سەرەکی نەبێنې، دماو ئانەی گۆششا دارایمێنە گرنیگیشا پنە دا و بڕې جە هۆرچنیایا ئاماژەشا پانەیە دا گەرەکشان پاڵپەشتیش بکەرا."

جە دما دمایی قسەکاشەنە ئاکچایە باسش چانەیچ کەرڎ ئامانجشا جە سەرۋنەداکەیشا بەهێزکەردەی نوێنەرایەتیشانە جە ئەمریکا و واتش: "چی پرسەنە بڕې گفتوگۆیێما کەردې. چەمەڕێنمې جە ماوێوە نزیکەنە چی پرسەنە هەنگامەی ڕۊشنە بنریۆ."