قاسم جە قسەکاشەنە کە جە هەرێمەکاو پانیشتوو بەیروتی بەشێوێوە ڕاسەوخۆ بە هەزاران تەرەفڎاراش ئەرەیاۋنا: "کە بە هەڕەشې نمەتاوا ئێمە تەسلیم بکەرا. با کەس پنەما نەواچۆ 'سازش بکەردې، چەکەکاتا بنیەیدێرە."

قسەکې قاسمی هامکات بې چنی سەرۋنەداکەو ڕۆو دووشەممەو نوێنەرو تایبەتی ئەمریکای تۆم باراک پەی بەیروتی. داواو لایەنی ئەمریکی ئانەنە کە تا ئاخرو ساڵې حیزبوڵڵا چەک بنیۆرە. جوابو دەسەڵاتدارا لوبنانی پەی ئی داواکاریە بە باراکی ئەرەیاۋېیۆ.

نیایرەو چەکی بە مەرج

نەعیم قاسم جە قسەکاشەنە ئاماژەش پانەیە کەرد کە ئیسرائیل بەگوێرەو ئایێربەسی مامەڵە نمەکەرۆ، جە خاکو لوبنانی ئەرەگیرکریاینە نەکیشیانۆ، جە هرووژمەکاش بەردەواما، باڵبەسکریایە لوبنانییەکې ئازاڎې نەکریێنې و ئا ناوچې جەنگەنە کاولې بیێنې ئاوەڎانې نەکریێنې.

قاسم ئەرەیاۋناش، "دماو هەنگامنیای، ئامادې با کە سەرو ستراتیجو پارېزنای و ئاساییشی نەتەوەیی لوبنانی گفتوگۆبکەرا." ئی قسې، هەڵوێسی مەرجدارو حیزبوڵڵای سەرو چەکنیایرەی نیشانە مڎۆ.

چنی ئانەی ٢٧و تشرینو دووەمی ئاېێربەس ئەرەیاۋېیان، هەڵای سوپاو ئیسرائیلی بەین بەین هرووژم مکەرۆ سەرو لوبنانی. ئیسرائیل باس چانەی مکەرۆ کە ئا هرووژمې دژو حیزبوڵڵاینې. هەرپاسە سوپاو ئیسرائیلی جە ٥ پێگې ستراتیجیې پانیشتوو لوبنانینە نەکیشیانۆ.