سووریانە جە ماوەو ٢٤ سەعاتا ۋېیەردەینە ٩ کەسې کوشیې
ڕوانگەو سووریای پەی مافەکا مرۆڤی ئەرەیاۋناش؛ سووریانە جە ماوەو ٢٤ سەعاتا ۋېیەردەینە ٩ کەسې کوشیې.
ڕوانگەو سووریای پەی مافەکا مرۆڤی (سۆهر) ئەرەیاۋناش جە ٢٤ سەعاتی ۋېیەردەنە ٩ کەسې بە مەڵامەتو هرووژمی، تەقەی هەڕەمەکی و ناکۆکیۆ کوشیېنې.
جە ئەرەیاۋناکەو سۆهرینە ئاماژە پانەی کریان گروپێوە چەکڎار هرووژمشا کەرڎ سەرو دەگاو شەهیبی حەمای و جە ئاکامو هرووزمەکەینە جوانێوە کوشیا، جە مارەت ئەل جەلەلی حەمای جە دەسڕێژو گولـلا کەسێوە دلې زەمینو زاری کوشتوکاڵینە کوشیا، هەرپاسە سەرو ڕاو شەتحە-عەین کرومی جە ئەنجامو دەسڕێژو گولـلانە جوانێوە و زاوڵێوە کناچې کوشیې.
هەر جە بەردەوامی ئەرەیاۋناکەو سۆهرینە ئاماژەیچ پانەی کریان سەرو ڕاو ئەسریا-خناسری ۋەرکۊتو حەمای، جە هرووژمېوەنە دژو ترۆمبێلېوە سەروازی ئەندامێوە وەزارەتو وەرگیری حکومەتی کوشیا، جە دارسانو نەمرای شەهبا سوەیداینە تەرمو خۊنکارێوە زانشتگەی ئیزیاوە کە یاگې گولـلۍ سەرو بەڎەنیشۆ بې.
جە دەگاو عەقارب سافیەو ۋەرکۊتوو حەمای جوانێوە جە لایەنو کەسوکارەکەیشۆ بە کاردی کوشیا.
سۆهر پئجۆرە دمایش بە ئەرەیاۋناکەیش ئارڎ: "جە گەڕەکۊو موهاجرینی شارو حومسی گرووپێوە چەکڎار بەمەڵامەتو ناکۆکی سەرو چۆڵکەردەی یانێوە کەسێوەشا کوشت، جە ناوچەو ناهتەی ۋەرکۊتو دارای جوانێوە جە مەراسیمېوەنە بە تەقەی هەڕەمەکی کوشیا."
