ڕابەر ئاپۆ جە گلېرۆبیەیشەنە چنی شاندو ئیمراڵیی ئەرەیاۋناش کە پرۆسەکە پایې منیۆنە قۆناغێوە تازۆ، واتش: "بە گېرتەینە ۋەرو هەنگامە تازەکا، ۋەرپرسیاری گنۆنە ئەستۆو گرڎیما پەی جابەجاکەرڎەو پەنەوازیەکا پرۆسەکەی".
وەڵۍ ئا حەفتەینە کە چەمەڕا مکریۆ پێشئامایې گرنگې چنەشەنە ڕووە بڎۆ پېوەس بە چارەسەری پرسو کوردی؛ شاندو ئیمراڵیی پارتو یەکسانی و دیموکراسیی گەلا (دەم پارتی) جە دوورگەو ئیمراڵینە دیدارشا چنی ڕابەر ئاپۆی کەرد. پەروین بوڵدانە و میدحەت سانجار و ئۆزگور فایەق ئەرۆڵ جە شاندەکەنە بەشدارې بێنې. دیدارەکە، دووې سەعاتې و نیمش خواینا. شاندەکە دەربارەو دیدارەکەیشا ئەرەیاۋنێوە نوویسیاش وەڵا کەرڎۆ.
ئەرەیاۋناکەی پی جۆرەنە:
"پەی ئەرەیاۋناکا و ڕای گرڎیی:
ئارۆ پېسە شاندەکەیما جە دوورگەو ئیمراڵی، پەی ماوەو دووې سەعاتا و نیمی دیدارێوە بەرهەمدارما چنی ئېژا عەبدوڵا ئۆجالانی کەرد.
تەندرووسی و مۆراڵو ئېژا ئۆجالانی فرە خاس بې.جە دیدارەکەنە، ئەرەیاۋناش کە پرۆسەکە پایې منیۊنە قۆناغێوە تازۆ. تەئکیدش کەرڎۆ کە بە گێرتەینە ۋەرو هەنگامە تازەکا، ۋەرپرسیاری گنۆنە ئەستۆو گرڎیما پەی جابەجاکەردەی پەنەوازیەکا پرۆسەکەی.
واتش، بەگرنگیۆ تەماشەو ئا گلېرۊبیەی مکەرمې کە شاندەکەما چنی ئېژا سەرۆککۆماری ئەنجامش مڎۆ و بە گلېرۊبیەیې تاریخی جە قەڵەمش مڎۆ. هەرپاسە جەختش کەرڎۆ، ئا کۆمیسیۆنەی جە پەرلەمانەنە پێکمې، دەورێوە گرنگ گێڵنۆ پېوەس بە ئاشتی و چارەسەری.
ئېژا ئۆجالان تەئکیدش کەرڎۆ، ئی پرۆسە بەشێوێوە گرڎیی بە ئیسفاڎەو دیموکراتیکبیەو تورکیای مەڕیۆوە؛ چی ڕوانگۆ، دیما کە هیوا و باوەڕ و متمانێوە بەهێزش هەن.
جە کاتو گلېرۊبیەکەینە ئەژنیما کە جە خاکو هەرێمو کوردەسانینە، چن سەروازێوە بە مەڵامەتو گازی میسانیوە ژەعراویې بیێنې و گیانشا جە دەسدان. ئېژا ئۆجالان و ئێمەیچ پی قۆمیایە فرە خەمبارې بیەیمې. پی بۆنۆ، دوعاو ڕەحمەتی پەی ئا کەسا مکەرمې و سەرەوەشی جە بنەیانە و کەسوکاریشا مکەرمې".
