جەمیل بایک، هامسەرۊکوو کۊنسەو ڕاوەبەریی کەجەکەی، بانگەوازێوەنە داواش ئۊو گرڎوو هێزەکاشا کەرڎە، بۊنەو بومەلەرزەکاوە گرڎوو چالاکییە لەشکرییەکاشا مرڎنا، سەرەوەشییچش جە کەسوکاروو قوربانییەکاو گەلی کەرد.
جەمیل بایک، هامسەرۊکوو کۊنسەو ڕاوەبەریی کۊماجڤاکێن کورڎستان- کەجەکەی، پێوەس بە بوومەلەرزەکەو ششوو شوباتوو مەحاڵوو پازاچخی مەرەشی سەرنیشتوو کورڎسانی و بومەلەرزەکاو تورکیای و مەنتێقەکەی پەیامێوەش دا.
بایک پەیامەکەشنە بانگەوازێوە گرنگش کەرد و دلێشنە داواش جە گرڎوو هێزەکاشا کەرڎە، بۊنەو بومەلەرزەکاوە گرڎوو چالاکییە لەشکرییەکاشا مرڎنا.
”هەتا ڕژێموو تورکی هجووم نەکەرۊ هێزەکێما چالاکی مەکەرا“
بایک ئەرەیاوناش: ئێمە قەرارما دان، هەتا ڕژێموو تورکی هجووم نەکەرۊ و نەدۊ سەرەمارە، هێزەکێما حیچ پەرچەکرڎارۍ و چالاکیێوە دلۍ شارەکانە و مەترۊپۊڵەکانە و تورکیانە مەکەرا. پێویسا گرڎما و گرڎوو هێزەکاما پابەندۍ ئی قەراری با. هەڵبەت هەڵوێسوو دەوڵەتوو تورکیایچ وەراوەروو قەرارەکەیما دیاریکەر بۊ پەیما.
”دۊخوو گەلە کارەساتبارەکەیما غەمبارێش کەرڎیمۍ “
جەمیل بایک، ڕووەو گەلی و ڕووەو ڕای گرڎینۍ ئەرەیاونانش: گەلە دڵسۊزەکەما، بوومەلەرزەی بەقووەت کارەساتی گەورەش خولقنان. پا بۊنەوە سەرنیشت و وەرنیشتوو کورڎسانینە، تورکیا و سووریانە گەلەکەما و گەلۍ تەرێچ ئینۍ دۊخێوە سەختنە. بەتایبەتی بۊنەو سیاسەت و کردەوەکاو دەوڵەتی ئەرەگیر و قاڕچنوو تورکیوە، خەڵک رووەبەڕوو و ئێشی و مەینەتێوە زیاڎتەری بیێنێوە. گەلاو کورڎی و تورکی و عەرەبی کەوتێنۍ دۊخێوە فرە دژوار و ناهەموارۊ. ئا دۊخە و هەستوو گلێرگەی کاریگەریی فرەش وستەن سەرما و خەمبارێش کەردێنمۍ. پەی مەردەکا لاو خوایۊ داواو بەزەیی و یاگەئارامییشا پەی کەروو. پەی بریندارەکایچ ئاواتوو زووخاسبییەیۊشا پەی موازوو، پەرسە و سەرەوەشیی وێچم پەی کەسوکاری سەربەرزوو قوربانییا و گرڎوو گەلەکەیم کیانوو.
”مشۊم بە گرڎوو توانا و دەرفەتێوە سەفەربەرۍ بیمۍ و دەموو وەنەقۊمیایەکاوە بلمۍ “
کارەساتبارەکۍ و کەسوکاروو قوربانییەکا، ئێمە ئێش و ئازارەکاتا هەست پەنە کەرمۍ و چەنیتا مژیومۍ. بومەلەرزە گرڎ شۊنۍ و گرڎ لایۍ دنیێنە ڕووە مڎۊ. وەلێم ئانەش کە گرنگا فرەو دەوڵەتا ڕاوشۊن پەی ڕووەبەڕووبییەیۊش گێرانە وەر. پەوکای چا وەڵاتانە زەرەرەکاو بوومەلەرزەی کەمتەرێنۍ. وڕیای یانەی و باڵەخانەکا و زەرەرە گیانییەکا کەمۍ کریاوە. وەلێم کە مدیەی پەی دۊخوو تورکییەی. گێرتەیرەوەروو ڕاوشۊنی بە پاو پێویسی مەوینی، چێگەوەن کە کارەساتۍ گەورۍ قۊمیا. هەڵای بە هەزارا جە کەسوکاریما ئینۍ چێروو سەقف و پایە و یانە و باڵەخانە وڕیایەکانە، پێویسا ئێمە زووتەرین وەختنە بەرشا بارمێوە و ڕزگارێشا کەرمۍ. چوونکوم زمسانا سەرداوسۊڵەن و وەروو وارانا، گێرا بۊنەو دێرلوایدەمیشاوە فرێشا مرا. پەوکای مشۊم حەرکەس چێشش جە دەس مۍ کەرۊش و درێغی نەکەرۊ، چەمەڕوانی نەکەرۊ، بە گرڎ توانێوە سەفەربەر بۊ و دەموو وەنەقۊمیایا و خەڵکە کارەساتبارەکەیۊ بلۊ.
ئاکەپە-مەهەپە تورکیای پێسە کۊمپانیێوە بەرا ڕاوە
ئاکەپە-مەهەپە جە دەسەڵاتوو وێشانە زەڕێوە فرەشا کۊ کەرڎەنۊ، گرڎ ساڵێوە پەی بوومەلەرزەی زەڕشا کۊ کەرڎەنۊ. وەلێم وینمۍ کە ئا زەڕە نییا ئارانە. گرڎشا جەنگنە خەرج کەرڎەن، وەروو ئانەی جە ڕاو جەنگیوە ملیاران دۊلارێشا قازانج کەرڎەن. ئەگەر ئا زەڕەشا پەی گەلی خەرج کەرڎۍ، پەی بوومەلەرزەکەی ڕاکارێشا گێرتێنێرە وەر، وەروو ئانەی تەندروسی و پەروەردەو گەلی بەرەو وەڵۍ لووۍ، ئا گرڎ ئێش و کاولکارییە ڕووە نەدۍ. گەلوو تورکیای دلۍ وەشگوزەرانینە ژیوۍ. ئەگەر ئارۊ بڕێوە فرۍ دەوڵەمەنڎۍ و گەلیچ بێحەڎ هەژار بییەن، ئانە دەرەنجاموو سیاسەتوو ئاکەپە-مەهەپەین، کە دژوو گەلوو کورڎی بەرۊش ڕاوە. وەروو ئانەی گەرەکشا قاڕوو گەلوو کورڎی چنۊوە، پەی ئینەیچە گرڎوو تواناکاو تورکیای و بەریچش وستێنۍ خزمەتوو ئا جەنگیوە. ئاکەپە-مەهەپە تورکیای پێسە کۊمپانیێوە بەرا ڕاوە. پێسە ئاغای و سەرمایەڎارێوە بێویژدانی و ستەمکاری مامەڵە چەنی خەڵکی کەرا. وێشا مەکەرا بە ساعیبوو حیچ پێویسیێوە گەلی. پەی ئانەیچ پێویسا گەلەکەما، گەلوو کورڎی، تورکی، عەرەبی، گەلاو تورکیای چەنەپێتەیۊ(لێپێچینەوە) و ئانەیشا چەنی کەرا. هەم چەنەپێتەیۊ کەرا، هەم هامکارییەکاشا پەی باڵاتەرین ئاستی بەرزۍ بکەراو.
قەرارما دا، کە ئێمە چالاکی نەکەرمۍ
ئاکەپە-مەهەپە دۊخی نائاساییشا ئەرەیاونا، پەی چێشی ئەرەیاوناشا؟ خەیاڵشانە بوومەلەرزەکەی پەرڎەپۊش کەرا و شاراشۊ. گەرەکشانە سەرەباروو خەفەتوو گەلی، هاواروو گەلیچ پۊژنارە، وەروو ئانەی حیچ وەخت دەنگشا نەیاوۊ حیچ یاگۍ. گەرەکشانە سەرەو بوومەلەرزەکەی بەتەمامەتی پۊژنارە، وەروو ئانەی کەس هەستش پەنە نەکەرۊ و پەنەش نەزانیۊ، ئا قۊرتێچە کە گناوە و ڕووە مڎا کەس پەنەشا نەزانۊ. وەروو ئانەیچ ئەرەیاونای(ڕاگەیاندن)وو وێشا وستەنشا جووڵەوە. پێسە چەنی گەلاو جیهانیچ خەڵەتنا، سەروو ئا بنەمۍ هاشووهووشۍ و فڕوفیشاڵۍ کەرا و فرەو چێوەکا شاراوە، پاسە بەرش وزا گرڎ یاگێوەنە یارمەتیی خەڵکی مڎا، کە ئانەیچە گرڎش دروێنۍ. ئەرەیاونای سەربەوێ(ڕاگەیاندنی سەربەخۊ) گرڎووئا درواشە ئاشکرۍ کەرڎۍ. گەرەکشانە ڕاگێری چا هامکارییا کەرا کە خەڵک پەیشا ڕوانە کەرۊ. خەیاڵشانە ڕا چا یۊگێرتەیە گێرا، کە دلۍ خەڵکینە ئامان وەرۊ و وەڵی کەوتەن و بەتەمامەتی دەسەڵاتوو وێشا جا یاگانە سەپنا. ئا هامکاری و توانۍ کە بەرۊ یام دلۍ تورکیایۊ ئامێنۍ جارێوە تەر وزاشۊ خزمەتوو وێشا. پەی ئینەیچ مشۊم چی وەختنە دیموکراسی، گەلاو تورکیای، گەلوو کورڎی درێژە بە هامکارییەکاشا بڎا. نازا دەسش ملەرە گێرا و سەرەیش پۊژنارە. جە وەختێنە کە گەل دلۍ کارەساتێوە چیمنەینە مژیوۊ، دلۍ وێمانە پێسە جمیەری بە پێویسما زانا دۊخوو ئیسەی، هاموەخت ئا پەرەسانایۍ کە ڕووەشا دێنە ور سەنگنمۍ و سەروو ئا بنەمۍ یاومۍ بە ئەنجامۍ. وەروو ئانەی ڕێز جە گەلی، جە ژیوای گەلا و ئینسانیەتی گێرمۍ، ئێشۍ تەر مەکەرمۍ سەرباروو ئێشەکاشا. جە ڕووەو ئینسانیەتی، ویژدانی و ئەخلاقیوە ئێمە دۊخەکەما ورسەنگنا. داوا جە گرڎوو هێزەکاو چالاکیی سەروازی کەرمۍ کە جە تورکیانە، جە گەورە شارەکانە، چالاکییە سەروازییەکاشا مرڎنا. حەرپاسە قەرارما دا تا دەوڵەتوو تورکی هجووم نەکەرۊ سەرما، ئێمە چالاکی نەکەرمۍ و دەسۍ نەوزمۍ وەڵۍ. تا ئێشوو گەلەکەیما کەم بۊوە و زەخمەکاو وێشا ساڕێژۍ کەرا، ئا قەرارەیما یاونمۍ یاگۍ. هەڵبەتە هەڵوێسوو دەوڵەتیچ یۊلاکەرەوە بۊ جە بارەو قەرارەکەیماوە. جارێوە تەریچ ماچووشۊ؛ ئانۍ مەردێنۍ گنا وەروو ڕەحموو چەنەوەشبییەی خودای و هومێدوو خاسبییەیۊ پەی بریندارەکا موازوو، دیسان ماچووشۊ گەل سەرەش سڵامەت بۊ، یۊگێرتەی کۊمەڵایەتییچ سەروو ئا هجوومارە زاڵ بۊ، بە دەساو وێچما زەخمەکاما ساڕێژۍ کەرمۍ و پەترۊکشا پەنە بەسمۍ ".
