جەنگاوەراو ئازادیی کوردستانی (ماک) ئەرەیاوناشا، جە جوابدایوە بە سەرکوتی سیاسی و سەروازییەکاو دەوڵەتی ئەرەگیروو تورکی، بە تەقەمەنیی بنکێوە پۆلیسوو شاروو گەڤەریشا کەردەن ئامانج.
جەنگاوەراو ئازادیی کوردستانی (ماک) سەبارەت بە چالاکییەکەیشا بەیاننامێوەشا وەڵا کەردۆ و ئەرەیاوناشا:" شەوەو ٦و ئەیلولی، سەعات ٢٣:٤٠ دەیەقێ، جەنگەوانێما هجوومشا کەرد سەروو بنکەو پۆلیسی گەڕەکەو ٧٥ شارەکڵەو گەڤەری."
ئەرەیاونایەکەینە ئامان: "جەنگەوانێما بە تەقەمەنییوە بیناو بنکەو پۆلیسوو ئەرەگیراشا کەردێ ئامانج، ئەنجاموو چالاکییەکەینە زەرەرێوە فرە وەروو بارەگاکەیشا کەوت و هاموەخت ئایرێوە گەورە بیناکێنە کەوتۆ و هێزی ئەمنی و پەشتیوانی ڕوانەو مەنتێقەکەی کریێ. چی چالاکییەنە ژمارێوە فرەو ئەرەگیرا بریندارێ بیێ و کە ئیساتێچ بەوردی ژمارەشا وەردەس نییەن، دماو کەردەی چالاکییەکەی، جەنگەوانێما بەسەرکەوتەی گێڵێوە یاگێ وێشا."
ئەرەیاونایەکەو ماکینە سەرنجە بوزۆ سەروو هجووموو ئەرەگیرا، سەرکوتی سیاسی و سەپنای گۆشەگیری و مدرامانوو گەریلای. ئەرەیاونیانیچ: "داوا جە گەلی وەڵاتپارێزن و گەنجە قارەمانەکاما مکەرمێ وەراوەروو هجووموو تیرۆریستانە بێدەنگێ نەبا و وێشا ڕیزوو کۆشەراو ئازادیی کوردسانینە ڕێکێ بوزا و بلا گژێ ئەرەگیرارە، پەنەوازا بە ڕۆحوو مدرامانوو کۆبانێوە، دەوروو ڕابەر ئاپۆینە دژ بە دوژمنا جەمێ بیمێوە."
