واتەواچەو مەجلیسو ژەنا پارتو یەکسانی و دیموکراسیی گەلا (دەم پارتی) خالیدە تورکئۆغلوە دەربارەو پێشئامایەکا ئی دماییە، جە بیناو پارتەکەیشەنە کۆنگرێوە ڕۆنامەنوویسیش بینا.

تورکئۆغلوە بە یاڎکەردەیۆ ئەکادیمیە و ڕۆنامەنوویسە ناگیهان ئاکارسەلۍ کە ٤ و تشرینو دووەمو ٢٠٢٢ جە سلێمانینە گەشمەرڎۍ کریا، دەسش بە قسەکاش کەرڎ و واتش: "کوشتەی ناگیهان ئاکارسەلۍ بە هەمان ئا زیهەنیەتۆ ئەنجامدریا کە ژینا ئەمینیەش کوشتە. چونکی ئێمە مزانمۍ کە ئا ژەنۍ دژوو پیاسالاری ئەرەکۊشا و شۊنەو حەقیقەتیرە مگێڵا، بانۍ بە مەرامو ستەمی و دۆڵەتەکا".

تورک ئۆغلوە سەرنجش وست سەرو کوشتەی نارین گورانۍ و ئەرەیاۋناش ۋنەپەرسایۆ جە کۆمکوژی ژەنا و زاوڵا مکەرا، جەختش کەرڎۆ کە گرڎو ئا هەرمانا کە کورڎەسانەنە مکریا جە چوارچێوەو سیاسەتو جەنگی تایبەتینە مکریا، ئانە ٤٠ ساڵێن دۆڵەت جە جوگرافیاو کورڎەسانینە سیاسەتو جەنگی تایبەتی ڕاوەبەرمکەرۆ.

هەرپاسە سەرنجش وست سەرو بەئامانجگێرتەی پەیامکیانەو ژەنی نیوزی ڕابیعە ئۆنڤەرۍ چونکی جە جولەمێرگەنە گوزارشتە سەرو چەتەکا مادەی هۆشبەری و لەشورەشی ئاماڎە کەرۍ. ئەرەیاۋناش ئۆنڤەرە بە مەڵامەتوو ئاشکراکەردەی جەنگی تایبەتی، کریا ئامانج.

هەرپاسە ئاماژەش بە کۆمکوژی ژەنا کەرڎ و ئەرەیاۋناش تەنیا مانگەو ئابینە ٣١ ژەنی کوشیێنۍ، ١٥ ژەنی بەشێوێوە گوماناویی مەردێنۍ، جەختش کەرڎۆ ئینە تەنیا داتاکۍ وەرو دەسانۍ و ژمارەکۍ چانەی زیاتەرێنۍ، یاساکۍ وڵاتەکەی بەپاو پەنەوازی نیەنۍ پەی پارێزناو ژەنا. واتش: "ۋنەپەرسایۆ جە کوشتەو هەر ژەنێوە مکەرمۍ. بە پارېزنای ماف و ژیۋایما و گۆرەکەردەی یۆگێرتەی، دەس جە ڕێککۆتەی ئیستەنبوڵی هۆرنمەگێرمۍ".

جەختش کەرڎۆ، جە چوارچێوەو ۋەرەنگاربیەیۆ تنوتیژی دژو ژەنانە بە نزیکایەتی ڕاوەبەردەی هەرێمو ئەرەکۊشای قەوەتتەر مکەرمۍ.

گۆشەگیری ئیمراڵی

خالیدە تورکئۆغلوە سەرنجش وست سەرو گۆشەگیری ئیمراڵی و ئەرەیاۋناش ٤٢ مانگێن هیچ زانیاریێوە دەربارەو ڕابەرو گەلوو کوردی عەبدوڵا ئۆجالانی نییا، کەچی وەزیرو دادی ماچۆ گۆشەگیری تورکیانە نییا، بەڵام گۆشەگیری هەن و بیەن بە گۆشەگیریێوە سەرو هیواو ئاشتی و گەلا تورکیای و ژەنا، واتش: "ئێمەی ژەنا سەرمەشقی مکەرمۍ جە ماڕای ئی گۆشەگیرییەینە. ئانۍ گەرەکشانە بە ئەرەیاۋنای جەنگی دژو گەلوو کوردی و بەهاکاش، درێژە پی گۆشەگیرییە بڎا، مشۆم عال بزانا کە ئێمە سەرۍ گنمۍ. ئێمەی ژەنا چینەی زیاتەر وەرگەو ئی دەسەڵاتیە نمەگێرمۍ کە بە قووڵکەردەیۆ گۆشەگیری و هەژاری و بێکاری ، جەخت جە سیاسەتو جەنگی مکەرۆوە. دژو ئی جەنگیە، چنی ژەنا جمیەری ۋەرفراوان دژو جەنگی بنیاڎ منیەیمۍ. هێزو ئینەیما هەن، باوەڕیما هەن، تاریخو ئەرەکۊشای ئیلهامبەخشیما هەن. چی چوارچێوەنە، ٣٠ ی ئەیلولی ئەنقەرەنە بە درووشمەو "پاگیرێنمۍ سەرو ژیۋای ئازادی و یەکسانی، دژۍ جەنگینمۍ" کۊششو کەمپینی دەس پنە مکەرمۍ".