هامسەرۆکایەتی دەسەو ڕاوەبەری کەجەکەی جە سەروبەڼو ساڵیاڎو پیلانگێڵنیی ٩و تشرینو یووەمینە ئەرەیاۋنێوەش وەڵا کەرڎۆ و ئەرەیاۋناش، "داوا جە گەلەکەیما جە هەر چوار پارچەو کورڎەسانی و جبەرو وڵاتی مکەرمۍ، کە چنی دۆسەکاشا ئەرەکۊشای بیاونا بە بەرزتەرین ئاست".
هامسەرۆکایەتی دەسەو ڕاوەبەری کەجەکەی جە سەروبەڼو ساڵیاڎو پیلانگێڵنیی ٩و تشرینو یووەمینە کە دژو رابەرو گەلوو کوردی عەبدوڵا ئۆجالانی کریا، ئەرەیاۋنێوەش ۋەڵا کەرڎۆ.
ئەرەیاۋناکەو کەجەکەی پی جۆرەنە:
"پیلانگێڵنیی مېیاننەتەوەیی ٩و تشرینو یووەمی، کە یۆ جە ئۆپراسیۆنە سیاسیە هەرە گۆرەکا تاریخو مرۆڤایەتیا و بە دوژمنکاریێوە گۆرە، خیانەتی و دووەڕوی ئەنجامدریا، ٢٦ ساڵێش ۋییەرنا. پیلانگێڵنیی مېیاننەتەوەیی ٩و تشرینو یووەمی کە جە کەسایەتی رابەر ئاپۆینە جە دژو گەلوو کوردی، گەلا ۋەرکۆتوو مېیامینی و ئەرەکۊشای ئازادیی گەلا چێردەسەو جەهانی ئەنجامدریا، ئا پیلانگێڵنییە و هەرپاسە گرڎو ئا هێزایچە جە پیلانگێڵنییەکەنە بەشدارۍ بێنۍ، جارێوەتەر شەرمەزار مکەرمۍ.
رابەر ئاپۆ بە دەسپنەکەردەو شۆڕشو ئازادی کورڎەسانی بیەو گەلوو کوردیش سەرجە نۆ مسۆگەر کەرد، پۊکەی پیلانگێڵنیی مېیاننەتەوەیی دژوو رابەر ئاپۆی، گەلوو کوردی، جمیەرو ئازادیی و جەنگاوەرا ئازادیش تەمام خەمبارۍ و توڕۍ کەردۍ. چالاکا، 'شمە نمەتاودۍ رۆو ئێمە تاریک بکەردۍ'، ئی توڕەییەشا کەرڎ بە چالاکی و جە دژو گۆرەتەرین پیلانگێڵنی تاریخی، ڕەسەنتەرین چالاکیشا کەرڎ، نیشانەشا دا کە نزیکبیەیۆ مامەڵەکەردەی چنی پیلانگێلنی مېیاننەتەوەیی مشۆم چنین بۆ و جوابو پەیجووری گەلەکەیما و جمیەرەکەیماشا داوە. گەلوو کوردی و جمېیەرو ئازادی سەرو هێڵۊو، 'شمە نمەتاودۍ رۆو ئێمە تاریک بکەردۍ' بێ مردای جە دژو پیلانگێڵنیی مېیاننەتەوەیی ئەرەکۊشایشا کەرڎ. ئەرەکۊشای دژو پیلانگێڵنیی مېیاننەتەوەیی خوڵقیا، فراوانتەر بی و کریا بە ئەرەکۊشای مېیاننەتەوەیی ئازاڎیی. پی جۆرە بی بە یۆ جە گۆرەتەرین هەڵمەتەکاو تاریخی. جە کەسایەتی خالید ئۆڕاڵ، ئاینور ئارتەنۍ و سەلامەت مەنتاشینە کە سەرمەشقەکا ئی هێڵەو ئەرەکۊساینۍ، ئێمە گەشمەرڎا 'شمە نمەتاودۍ رۆو ئێمە تاریک بکەردۍ'جارێوەتەر بە رێزو حورمەتۆ یاڎۍ مکەرمېوە و ئاستشانە سەرەو ۋێما منامنمێرە. جە کەسایەتی ئاڎیشانە گرڎو گەشمەرڎا دیموکراسی و شۆڕشی بە رێز، وەشەسیای و پنەزانایۆ ویرۍ مارمێوە و قەولو وەفاڎاری و سەرکۆتەی کە بە گەشمەرڎاما دان، سەرجەنۆ واوەیش مکەرمېوە.
پیلانگێڵنیی ٩و تشرینو یووەمی یۆن جە ڕووەدایە گرنگەکاو سەردەمو ئێمە کە مشۆم چنەش بیاومێنە. فرێوە جە هێزە جەهانی، هەرێمی و دلێینەکا فشارشا وست سەرو سوریای، ڕابەر ئاپۆ دیش کە دۆڵەتو سوریای وەرگەو ئا فشارا نمەگێرۆ، پۊکەی ناچار بی سوریای جیابازۆ و پیلانگێڵنیی مېیاننەتەوەیی پی جۆرە دەسش پنەکەرڎ. فرەو هێژا پیلانگێڵنییەکەنە دژو ڕابەر ئاپۆی یۆشا گێرت و پێوەرە هەنگامەشا نیا. ئینەیچ عیلاقەش بە دەرەنجامەکا هێڵۊو ڕابەر ئاپۆی و پەکەکەی سەرو کوردەسانی و ۋەرکۆتوو مېیامینیۆ هەن. بەشێوە فرە جە هێزەکا کە سەرو مەسڵەحەتەکاشا رێکێنەگنێنۍ، چی پیلانگێلنییەنە یۆشا گېرت. ئینەیچ بەرش وزۆ کە پیلانگێڵنییەکە پېسە ئۆپەراسیۆنی و پلانەو هێزە هەژمونگەراکا ئەنجامدریان. ئا هێزە هەژمونگەرۍ مۆدێرنیتەو سەرمایەداری کە پلانەشا نیارە و پیلانگێڵنیەکەشا ئەنجامدا ئینۍ بێنۍ "ئەمریکا، بەریتانیا و ئیسرائیل". ناتۆ و دۆڵەتا ئەوروپایچ هامبەشۍ ئا پلانێنۍ کە وزیا بوارو جابەجێکەردەیۆ. پیلانگێڵنیی پېسە ئۆپراسیۆنێوە ناتۆ-گلادیۆی جابەجێکریا. جگە جە ئەمریکا، ئیسرائیل، ناتۆی و دۆڵەتا ئەوروپای فرەو هێزا و دۆڵەتۍ پەشتیوانیشا چا پیلانگێڵنییەینە کەرڎ و بەشدارۍ بێنۍ. ئینۍ گرڎ پەی ئەنەیاوای جە پیلانگێڵنیی فرە گرنگا. تا مەرامو ئا پیلانگێڵنییە درکش پنەنەکریۆ، پلانەو هێزە هەژمونگەراکا ۋەرکۆتوو مېیامینی و چا رووەدایا کە ئارۆ جە ۋەرکۆتوو مېیامینی ڕووە مڎا، مەیاومێنە.
جە مابەینو پیلانگێلنی مېیاننەتەوەیی و هەوڵدای پەی دیزاینکەردەیۆ ۋەرکۆتوو مېیامینی جە لایەنو هێزەکاو مۆدێرنیتەی سەرمایەدارییوە عیلاقێوە فرە نزیک هەن. ئەمریکا و هێزەکاو مۆدێرنیتەی سەرمایەداری ڕابەر ئاپۆ و پەکەکەشا پېسە کۆسپێوە وەرو دەمیشانە وینا، پۊکەی ئاڎشا کەرڎ ئامانج. ۋەرو ئانەی رابەر ئاپۆ و پەکەکە هێڵێوەشا جە ۋەرکۆتوو مېیامینینە نیارە، ڕێکوستەی و مەژگو سیستەمو داردەسەیی، دماکۆتەیی، ڕەگەزپەرسی، قڕکەر، کۆلۆنیالیستو سەرو گەلوو کوردی و گەلا ۋەرکۆتوو مېیامینیش ماڕاو ئازاد کەرڎ. ئی هێڵۍ کە جە ۋەرکۆتوو مېیامینینە سەرو بنەماو پێوەرەژیۋای یەکسانی و ئازادی وەشە بیە، بە هەڕەشۍ پەی سەرو بەرژەوەندی مۆدێرنیتەو سەرمایەداری نریارە. هەر پۊکەی بە پلەی یووەم ئەمریکا و ئیسرائیل، هێزەکاو مۆدێرنیتەی سەرمایەداری هەوڵو لاوازکەردەی و دلېنەبەردەی پەکەکەیشا دا. سەرو ئا بنەمایۍ، جە چوارچێوەو هامکاریی ناتۆینە، پەشتیوانیێوە تەمامشا جە دۆڵەتو تورکی قڕکەری-کۆلۆنیالیستی کەرڎ. دماو دمایی ئامای جەنگی سەردی، دیزاینکەردەیۆ ۋەرکۆتوو مېیامینی بە سەرۆکایەتی ئەمریکای وزیا بەرنامەو کاریۆ و پیلانگێڵنیی مېیاننەتەوەییچ جە چوارچێوەو ئی پڕۆژەیەنە پلانەش پەی نریارە و ئەنجامدریا. هێزەکاو مۆدێرنیتەی سەرمایەداری پەیشا بەرکۊتەن کە تا ئا هێڵۆو پەکەکەې بیەیش بۆ، کە ژەنی و گەلا ۋەرکۆتوو مېیامینی ڕزگار مکەرۆ و چارەسەر پەی کێشە کۆمەڵایەتییەکا وەش مکەرۆ، ئاڎۍ نمەتاوا ۋەرکۆتوو مېیامینی بە زېڵۍ ۋێشا دیزاین بکەراوە. پۊکەی دلېنەبەردەو هێڵۊو پەکەکەیشا بە یۆ جە هەنگامە گرنگەکا پەی دیزاینکەردەیۆ ۋەرکۆتوو مېیامینی نیارە. ۋەرو ئانەیچ پیلانگێڵنیی مېیاننەتەوەیی جە چوارچێوەو جەنگی جەهانی یەرەمینە پلانەش پەی نریارە و جابەجێ کریا. پیلانگێڵنی مېیاندۆڵەتی یۆبۍ بۍ جە قۆناغە گرنگەکا جەنگو جەهانی یەرەمی.
یۆ جە ئامانجەکا پیلانگێڵنیی مېیاننەتەوەیی زیڼەکەردەیۆ ئا کوردایەتیە داردەسەیە بۍ کە بەمەڵامەتو بەرکۊتەی و سەرهۊردای پەکەکەیۆ لاواز بی، پەی ئانەی ئا کوردایەتیە داردەسە سەرجەنۆ کاریگەری سەرو کوردەسانی وەش بکەرۆ. سەرو ئا بنەمایۍ دەور دریا بە هێڵۊو داردەسەیی کوردی، بەتایبەت هەوڵێوە فرە پەی قەوەتکەردەی ئی هێڵۊو داردەسەییە جە پانیشتوو کوردەسانینە دریا. ئینە جە چوارچێوەو بەرژەوەندییەکا مۆدێرنیتەو سەرمایەدارینە جە ۋەرکۆتوو مېیامینی پاکتاوکەردەی کوردایەتی ئازادین کە پەکەکە نوێنەرایەتیش مکەرۆ. هێزەکاو مۆدێرنیتەی سەرمایەداری جە بنەڕەتەنە پەشتیشا بە کوردایەتی داردەسی بینا بۍ و پی جۆرە پلانەشا پەی پیلانگێڵنیی مېیاننەتەوەیی متەرە و جابەجاش کەرێنۍ. پۊکەی دەورو کوردایەتی داردەسی جە پیلانگێڵنی مېیاننەتەوەیینە فرە گۆرەن. ئەنەیاوای چی حەقەتینیە و کۊششی قەوەتی جە دژو هێڵۊو خیانەتکار-داردەسی کوردی، گرنگتەرین بەشو ئەرەکۊشاین دژو پیلانگێڵنی مېیاننەتەوەیی. خیانەت جە هێڵۊو هامکاری و داردەسەیی کوردی ۋەردەمو حەقەتینەو پیلانگێڵنی مېیاننەتەوەیینە کە ئارۆیچ بە گۆشەگیریی ڕەهای بەردەواما، ئی حەقەتینەیە وزۆ ڕووە.
پەی ئەنەیاوای جە ڕووەداکا ئیساتۍ ۋەرکۆتوو مېیامینی فرەگرنگا جە پیلانگێڵنی مېیاننەتەوەیی بیاومێنە. ئاڎۍ جە ڕاو بێکاریگەرکەردەی هێڵۊو ڕابەر ئاپۆی و پەکەکەی، جە ئەساسەنە گەرەکشا بۍ مۆدێلو ژیۋای ئازادو ڕابەر ئاپۆی و پەکەکەی دلېنەبەرا کە ئەڵترناتیڤێوەن پەی گەلاو ۋەرکۆتوو مېیامینی. پی جۆرە گۆرەتەرین ۋەربەس ۋەردەمو مۆدێرنیتەی سەرمایەدارینە جە بەین بریۍ. بەشداری چالاکانەو ئیسرائیلی جە پیلانگێڵنیی مېیاننەتەوەیینە پەی ئانەی بۍ کە سیستەمو مۆدێرنیتەی سەرمایەداری جە دیزاینکەردەیۆ ۋەرکۆتوو مېیامینینە دەورش پنەبەخشابۍ. ئیساتۍ بە پاڵپەشتی ئەمریکای و وڵاتا ئەوروپای، ڕا پەی ئیسرائیلی مکریۆوە و هامکات پیلانگێڵنی مېیاننەتەوەیی جە شێوەو گۆشەگیری ڕەهاینە بەردەواما، ئینەیچ فرەو چێوا بەر وزۆ. ئی ئاژە بە تایبەت راسی دۆڵەتو تورکی سەردەسەی فاشیست تەیب ئەردۆغانی وزۆ ڕووە، کەمامەو سەرو میاچەمایشا ماڵۆرە. بە تایبەتی مامەڵە چنی رابەر ئاپۆی و ڕاوەبەردەی سیاسەتو قڕکەردەی کوردا بە گرڎو رێبازە مەترسیڎارەکاوە، بە شێوۍ ڕۆشن بەرش وزۆ کە هامکار و خزمەتکارو سیاسەتو ئەمریکای، ئیسرائیل و ناتۆنۍ جە ۋەرکۆتوو مېیامینینە. ئی حەقەتینە ئانەما پەی بەروزۆ کە پیلانگێڵنی مېیاننەتەوەیی پەی دلېنەبەردەی مۆدێلو ژیۋای ئازادی یاگەگیری و دیزاینکەردەیۆ ۋەرکۆتوو مېیامینی بە پاو بەرژەوەندییەکا سیستەمو مۆدێرنیتەی سەرمایەداری، جە لایەنو هێزەکاو مۆدێرنیتەی سەرمایەدارییوە درێژەش پنە مڎریۆ. درێژەدای بە سیستەمو قڕکەردەی و گۆشەگیریی ئیمراڵی نیشانێوە ڕۊشنەو ئینەینە. تەیب ئەردۆغان و ئاکەپە ئی پلانۍ جابەجێ مکەرا، کە ئاماژەن پەی ئا ئامانج و پڕۆژا کە هەرمانەشا پەی مکەرا. ئا ئەرکە دریان بە ئاکەپەی و تەیب ئەردۆغانی پەی درێژەدای بە پیلانگێڵنی مېیاننەتەوەیی و سەرو ئا بنەمایۍ سیاسەتەکاو کوشتەی کوردی جابەجێ بکەرا. پەی ئینەی ئاماڎۍ کریێبێنۍ و وزیۍ سەرو حوکمی.
کاتێ ئینی گرڎ هۆرسەنگنایشا پەی مکریۆ، موینیۆ کە پیلانگێڵنیی مېیاننەتەوەیی تەنیا پەی دمایئارڎەی بە ئەرەکۊشای ئازادیی گەلوو کوردی نییا، بەڵکم جە هەمان کاتەنە پلانێوەنە کە جە دژو هێڵۊو ئازادی جە ۋەرکۆتوو مېیامینینە ئاماڎۍ کریێنە، دلېنەبەردەی ژیۋای ئازادی و مرۆڤایەتی ئازادی پەی ۋێش کەرڎەن بە مەرام پۊکەی پیلانگێڵنیی ٩و تشرینو یووەمی دژ بە هێڵۊو ئازادی، هرووژمېوە ئایدیۆلۆژیاو مۆدێرنیتەی سەرمایەداریین پەی سەرو گەلا و مرۆڤایەتی، ئۆپەراسیۆنێوە سیاسین سەرو ئی بنەمایە. هامکات ئەرەکۊشای جە دژو پیلانگێلنی مېیاننەتەوەیی ئەرەکۊشایۍ ئایدیۆلۆژی و سیاسییا. هەڵوێسو ڕابەر ئاپۆی پەی شکسپنەئارڎەو پیلانگێڵنی و پڕۆژەو ژیۋای دیموکراتیکی کە پەشتیش هێقمەنە بە ئازادی و ئیکۆلۆژی کە جە ئاکامو قووڵبیەیۆ جە ۋەرکۊتوو مېیامینینە ئامان ئاراوە، پاسشە کەرڎ کە ئی ئەرەکۊشایە ئەنجام پەی گەلا بەدەسبارۆ. رابەر ئاپۆ جە دژو مەژگو مۆدێرنیتەی سەرمایەداری کە دژمنو ژەنا، گلېرگە، ژیۋگەین و ژیۋایش یاونان بە ئاستو وڕایرە، جە هەمان کاتەنە جە دژو سیستەمو پیاسالاری، نەژادپەرسی، نەتەوەپەرسی و نەتەوە-دەوڵەتپەرسی مەزگوو نەتەوەی دیموکراتیک و مۆدێرنیتەو دیموکراتیکیش خوڵقنا و پېسە کاریگەرتەرین چەکۍ رادەسو گەلا، ژەنا و مرۆڤایەتیش کەرد. متاویۆ وچیۆ، جە ڕاو هەڵمەتەو ئازادیی مېیاننەتەوەیی جە دژو گۆرەتەرین پیلانگێڵنیی تاریخی گۆرەتەرین ئەرەکۊشای ئازادی و حەقیقەتی جە تاریخەنە یاوان ئا ئاستەی کە ئشیۍ یاوابیۍ. بە جابەجێکەردەی ئامانجەکا هەڵمەتەو ئازادیی مېیاننەتەوەیی پیلانگێڵنی تاریخی ئەوەڵجار بە گرڎو رەهەندەکاشۆ ئاشکرا مکریۆ و سیستەمو ژیۋای ئەڵترناتیڤی سەردەمی خوڵقیۆ. ئەرەکۊشای دژوو پیلانگێڵنیی مېیاننەتەوەیی سەرو ئا بنەمایۍ بە گوڕدای بە هەڵمەتەو ئازادیی مېیاننەتەوەیی و یاونای مەنزڵو ئامانجەکاش سەرگنۆ. سەرو ئا بنەمایۍ جە ساڵەو ٢٧ەمینو پیلانگێڵنیی مېیاننەتەوەینە جە چوارچێوەو هەڵمەتەو ئازادیی مېیاننەتەوەیینە مشۆم پەرە بە ئەرەکۊشای بڎریۆ، ئازادیی جەسەیی رابەر ئاپۆی مسۆگەر بکریۆ و پیلانگێڵنیی مېیاننەتەوەیی بە تەمامی دلێنەبریۆ".
