ئارۆ جە قەزاو کەلاری ناوەندو ئیدارەو گەرمیانی، جەلایانو  دەزگاکا فام، ڕەهەند، بەختیاریی و ئەدیبا، نمایشگێوە هامبەشو کتێبا کە ٦٠٠ نامونیشانێ فرە جۆرێ گێرۆ وێش، جە کتێبخانەو گردی کەلارینە کریاوە. نمایشگاکە حەفتێوەش پنەمشۆ و مەڕیای پەی گردوو کتێبەکا کریان.

'ساڵانە دووێ پەی یەرێ جارا نمایشگاو کتێبا کەرمێوە'

 یۆ جە ئەرەمەزنەرا نمایشگاکەی، نەوزاد علی پەی ئاژانسو هەواڵو فوراتی (ANF) قسێش کەردێ و واتش: "ساڵانە دووێ پەی یەرێ جارا نمایشگاو کتێبا کەرمێوە، گرنگی و نمایشگاو کتێبا ئیناچانەینە کە ئەرەماڕای پەی کتێبەکا کریۆ چونکی جە ئیسەنە دۆخو ئابووری خراپا و ئانەیچ هامکاریێوە خاسا پەی وانەری. پەنەما وەشا خەڵک گرنگی بە وانایۆ دۆنە نەک فرەتەرین وەخت بە تۆڕەکۆمەڵایەتییەکاوە بەسەر بەرۆ."

'وانایۆ پەی تاکی و گلێرکەی گرنگا'

واتش: "چی نمایشگانە کتێبێ فرەجۆرێ هەنێ پێسەو تاریخی و جوگرافی و سیاسی، وە هەر چی نمایشگانە کتێبێ هۆرگێڵنای هەنێ پەی سەرو زوان و کوردی کە جە لایەنو نویسەرە بیانییەکاوە نویسیێنی.

وەنایۆ پەی تاکی گرنگیێ فرەش  هەن بە تایبەتی جە ئێسەنە بەمەڵامەو تۆڕەکۆمەڵایەتییەکا و ئی دۆخە سیاسییۆ، پۆکەی گرنگا گێڵمێوە پەی وانایۆ پەی ئانەی تاومێ ڕزگارما بۆ چی ئاڵۆزییەی کە دروست بییەن."

دماین قسەکاشەنە نەوزاد علی ئاماژەش پانەیە کەرد چی دۆخەنە کە ئیسە وەش بییەن بەمەڵامەو بێ هەرمانی و ئاڵۆزیی سیاسی گرنگا گێڵمێ پەی لاو کتێبی، واتش: "بەمەڵامەو خراپی گوزەرانو خەڵکی و بێ هەرمانی و ئاڵۆزیی دۆخو سیاسی ئانەی پەنەوز بۆ پەی خەڵکی وانایۆن پەی بەرزکەردەیۆ ئاستو ڕۆشنویری و مەعریفی."