کۆردیناسیۆنو گلێرگەو کوردەسانییەکێ ئەڵمانیای (کۆن-مەد) پەیوەس بە موبارەک کەردەو زەماوەنەو نەورۆزی ئەرەیاونێوەش وەڵا کەردۆ.

جە ئەرەیاوناکەینە ئاماژە کریان بە گرنگی نەورۆزی پێسەو جەژنەو ژیوایۆ و گەلا چێردەسی جە دژو ستەمی و زۆرداری، هەرپاسە گرڏو گەشمەرڏا نەورۆزی بە ڕێز و پنەزانایۆ یاڏێ کەردێ.

جە بەشێوە تەر ئەرەیاناکەینە ئامان: "ماوەو ٥٠ ساڵان جە کوردەسانەنە ئەوەکۆشای ئازادی درێژەش هەن، نەورۆز گرڏ کاتێ بییەن بە ڕۆو تازەبییەیۆ و گۆرەکەردەو مڏرامانی. ئایێرو نەورۆزی کە جەلایەنو کاوەو ئاسنگەریۆ کریاوە، گرڏ بیستێوە کوردەسانیش ڕۆشن کەردۆ. نەورۆز جە کوردەسانەنە بە درووشموو ئەوەکۆشای جە دژو ستەمی موبارەک کریۆنە. چی کاتەنە کە پێڤاژۆیێ تاریخییا، گەلوو کوردی بە هەمان درووشمۆ بە خاوەنداریکەردەیس نەورۆز موبارەک مکەرۆنە."

جە درێژەو ئەرەیاوناکەینە سەرنج وسیان سەر داواکارییە تاریخییەکەو ڕابەر ئاپۆی و ئامان: "ئی داواکارییە جە کوردەسان و، تورکیا و گرڏو وەرکەوتوو دلێڕاسەی بەرە ڕووەو ئاشتیرە مکەرۆوە. داواکاریی سەدەیی ئێژا ئۆجالانی چنی نەورزۆی یەکانگیربییەن. بە درووشموو چارەسەری دیموکراتیک پەی پرسو کوردی و پەی ئازادی ئێژا ئۆجالانی گەلەکەما مچیۆرە مێدانەکا."

جە دماین و ئەرەیاوناکەینە داوا کریان بە بەشداریێ بەهێزۆ گەلوو کوردی و دۆساش جە ٢٩و ئاداری بەشداری چالاکی موبارەک کەردەو نەورۆزی مییانو ببنی شرپارو فرانکفۆرتینە.