ئارۊ برۊکسلوو پایتەختوو بەلجیکاینە، بە بەشڎاریی هامسەرۊکا و سەرجەم ئەنداماو کۊنسەو ڕاوەبەریی تازەو کۊنگرەو نەتەوەیی کوردستانی کەنەکە، یووەمین کۊبییەیۊ کۊنسەکەی لوا ڕاوە. بەشێوە جە ئەنداماو کۊنسەی جە وڵاتنە کە دەرفەتوو ئاماڎەبییەی راستەوخۊو کۊبوونەوەکەیشا نەبۍ جە برۊکسلنە، جە ڕاو ڤیدۊیۊ و بە ئۊنلاین بەشڎارۍ بیۍ.

کۊبییەیۊکە کە جە بارەگای سەرەکیی کەنەکەینە رێک وزیابۍ، بە دەیەقۍ رێزگێرتەی جە گیانوو پاکوو گەشمەرڎەاو ڕاو ئازادی دەسش پەنە کەرد، دلێشنە بارودۊخوو هەرچوار بەشوو کوردستانی و مەنتێقەکەی و جیهانی، تەرسی و ئاڵنگارییەکاو وەردەموو گەلوو کوردستانی و دۊزەکەش و رێبازەکاو کۊشیای وەراوەەرشاوە و پارێزنای دەستکەوتەکاو گەلوو کوردی حەرچوار بەشوو کوردستانینە، باسوخواسشا سەرۊ کریا. پەیوەست پانەیچ کار و خەباتوو کەنەکەی و ئەرکوو پارت و لایەنەکا و چین و تووەکا گەلی گفتوگۊشا جە بارەوە کریا.
هامکات، بابەتۍ پێسە، هجووم و ئەرەگێریی تورکیای، سەرەوردای و ناڕەزایەتییەکاو گەلاو وەرکەوتوو کوردسانی و ئێرانی، بارودۊخوو وەرنیشتوو کوردستانی و پانیشتوو کوردسانی و وەرکەوتوو سوریای دۊخوو سەرنیشتوو وڵاتی و ئێراقی، گۊشەگێریی ئیمراڵی و دۊخوو زیندانییە سیاسییەکاو کوردی و کۊکوشییەکاو پاریسی و کورداو دیاسپۊرای تاوتۊ کریۍ.
بەشێوە کۊبییەیۊکەی تەرخان کریا پەی ورچنیەی یاگەڎارا و هامسەرۊکا و ڕاوەبەراو کۊمسیۊنەکان. بە فرەتەرین دەنگ حەریۊ جە فاروق جەمیلی، وەزیری وەڵێنووی دادوو هەرێموو کوردستانی و هێڤی موستەفا، هامسەرۊکەو کانتۊنوو عەفرینی بە یاگەڎارا هامسەرۊکاو کەنەکەی ورچنیۍ، کە هامکات ئەندامۍ کۊنسەو ڕاوەبەریی کەنەکەیچنۍ.

ڕۊو جومعەی رێککەوتوو 2ێ12و ساڵەو 2022 جە شاروو  ڤێن لوی شانشینوو هۊڵەنداینە، ٢١مین کۊبییەیۊ جڤاتی گشتیی کەنەکەی بە بەشڎاریی سەدان ئەنداما و دەیان مێمانە کوردا و بێگانا کریابۍ، جگە تاوتۊکەردەی دۊخوو کوردستانی و مەنتێقەکەی، هامسەرۊکا و ئەنداما و کۊنسەو ڕاوەبەریچ ور چنیێبێنی. کۊبییەیۊکەو ئارۊو کۊنسەکەی، جە دماو بەستەی 21مین جڤاتی گردینیوە، یووەم جارا کریۊ.

هـ.هـ