سەعات ١٠:٣٠ی دەیەقۍ شەوەی ۋییەرڎۍ، "شانەو هەڵۆی هەواڵگری عێراق"ی جە دامێوەنە جە جاڎەو دووە سایزو بەینو بازاڕو گەڕەکەو پەنجا عەلینە جە شارو کەرکوکی، هەوڵشا دان دووۍ کەسۍ گوماناویۍ کە ماتۆڕێوە "یەرە تایە"شا پنەبیەن گێرانە، بەڵام ۋێشا نەڎان دەسۆ و پا مەڵامەتۆ رووبەڕووبیەیۆ وەش بیەن.

سەبارەت بە ڕووەداکەی، واتەواچو شانەو ئەرەیاۋنای ئەمنی وەزارەتو دلێینەی، عەمید میقداد میری ئەرەیاۋناش، بە کۊششێوە هەواڵگری و ئۆپەراسیۆنێوە تایبەت، کە چنەشەنە شانەی هەواڵگری  تاواش جە ئەنجامو شۆنیرەلواکاشەنە دووۍ تیرۆریستۍ جە گەڕەکەو پەنجا عەلینە تەوقە بڎۆ تەقەشا ۋنە بکەرۆ، بەرکۊت کە تیرۆرستەکۍ بیبینی بەبۆمب چنیاشا وەرەنەبیەن کە جە ئاکاموو تەقەکەرڎەینە تەقانۆ، کە بیەن بە مەڵامەتوو کوشیایشا.

 یاگۍ ئاماژەینە کە جە چن ڕۆی ۋییەرڎەنە ڕووەدای هامشێوە شارو کەرکوکینە ڕووەشدان، ڕۊو چوارشەممەی ۋییەرڎەی، جە دەگاو سێکانیانی سنورو کەرکوکی، ڕووبەڕووبیەیۆ چەکڎاری جە ما بەینو هێزێوە ئەمنی هامبەشی و دووۍ چەکدارا داعشینە ڕووەشدا، پا مەڵامەتۆ چەکڎارێوە کوشیا و یۆتەرشا بڕەما، هەرپاسە یەرۍ کارمەندۍ هێزە ئەمنییەکا زامڎارۍ بیۍ کە زامو یۆیشا سەخت بۍ.