مەراسیمو چەک دلێنەبەردەی جە مەڕەو جاسەنەو سنوورو سلێمانینە، جە فرەو شارەکا کوردسانی و تورکیاینە جەلایەنو خەڵکیۆ وەردەمو شاشەکانە بە پەرۆشۆ، جۆش و خرۆش، هیوا و هەستیارییۆ تەماشاکریۆ.

ئامەد

ئامەدەنە فرە و کەسا جە مییانو مەبیا-دەر گلێرێ بیێوە. گلێرۆبییەکە و خەڵکی کە چن سەعاتێ تەماشاو مەراسیمەکەیشا کەرد، یاگێ سەرنجی بێ. دیمەنەکێ بە چەپڵێ و دروشم پێشوازیشا چنەکریا. دروشمەکێ 'بژیوۆنە سەرۆک ئاپۆ'، 'بژیوۆنە مڏرامان و گەریلای' و 'گەشمەرڏە مەمرۆ' بەبەرزی وچیێوە. بڕێ ژەنێ هەڵسی مچێنێ، کەسوکارو گەشمەرڏەک وێنەو گەشمەرڏەکاشا دەسۆ بێ.

بسمل و خانا ئاخپار

جە بسمیل و خانا ئاخپارەنە خەڵک یانەنە و جە بارەگاو پارتەکا تەماشاو مەراسیمەکەیشا کەرد. ئەڏایاو ئاشتی ماقبوولە ئاکیوز کە کارەبا بڕیا، جە ڕاو مۆبایلیۆ تەماشە و مەراسیمەکەی کەرێ و شایەتحاڵە و ئا ساتەوەختە تاریخییەی بییە.

سێرت

جە سێرتەنە خەڵکی بەکۆمەڵ جە تەلارە و کۆنفرانسو دەنیز پۆیرازی گلێرێ بیێوە، کاتو تەماشاکەردە و دیمەنەکانە، دروشمو 'بژیونە سەرۆک ئاپۆ' وچیاوە. بەتایبەتی ئا ئەڏایا کە ڕۆڵ گێڵنێنێ، جە ماوەو چەک دلێنەبەردەینە هەڵسی مچێنێ.

ئێلح

ئێلحەنە خەڵکی بە کۆمەڵ جە مییانو مەبیا-دەر گلێرێ بیێوە، بە دروشم و چەپڵێ تەماشاو مەراسیمەکەیشا کەرد. کاتێ چەکەکێشا دلێنەبەردێ، ژەنێوە جوانە قۆمێ وێش وینا دلێ ئا گەریلایانە کە چەکشا دلێنە بەرد و ئینەیش فرە تەئسیرش کەرد سەر.

شڕناخ و ناوچەکا دەوروبەری

جە مییانو شڕناخ و ناوچەکا جەزیرەینە، هەزەخ و سلۆپیا بە سەرمەشقایەتی دەم پارتی و مەبیا-دەر خەڵک بەکۆمەڵ گلێرێ بیێوە. جزیرەنە ئەڏایا و ئاشتی مەقبوولە دەمیر ئەرەیاوناش، "ڕوێ تاریخییا پەی گەلا وەرکەوتوو دلێڕاسەی" و داواش کەرد کە هەنگامەی سیاسیە بنیۆ و هەموارکەردەیۆ یاسێ ئەنجام دریۆ.

ئەستەنبول

ئەرەنیشتێ ئەستەنبوڵی جە بارەگاو دەم پارتی جە شارەکەنە گلێرێ بیێوە. وەڵێ ڕوماڵەکەینە خەڵکی بە کۆمەڵ، بەپەرۆشۆ و چەمەڕای و جۆش و خرۆشێوە گۆرەشا بێ.

مێردین (قۆسەر)

جە ناوچەو قۆسەرو مێردینی بە سەرمەشقایەتی مەبیا-دەر هامووڵاتیێ گلێرێ بیێوە و بە جۆشۆ تەماشە و مەراسیمەکەیشا کەرد.