گلێرگەو ژەنە ئازاداو وەرکەوتوو کوردسانی بە بۆنەو دووەمین ساڵیادوو سەرەوردای"ژەنی، ژیوای، ئازادی"یوە، داواش جە گردوو ژەنە کۆشەرا و گلێرگەی ئازادیوازی کەردە، دووەمین ساڵەو ئا شۆڕشە گەورەینە بەیانە جادە و مەیدانەکا.
گلێرگەو ژەنە ئازاداو وەرکەوتوو کوردسان (کەژار) بە بۆنەو دووەمین ساڵیادوو سەرەوردای 'ژەنی، ژیوای، ئازادی'ی ئەرەیاوناێوەش وەڵا کەردۆ. کەژار وستەنش ڕووە کە پەی بەدەسئاردەی ژیوای ئازادی ئازاد و دیموکراتیک پەنەوازییش بە یۆگێرتەیی و یەکڕزیی هەن.
ئەرەیاونایەکەو کەژارینە ئامان:
هەر کە جە دووەم ساڵیادوو شۆڕشوو 'ژەنی، ژیوای، ئازادی'ی نزیکێ بیمێوە،سیاسەتی هەژموونگەراو دنیێ، دەوڵەت و نەتەوەکاو هەرێمەکەی،دژوو گلێرگەی و بەتایبەتی ژەنا ڕۆ دماو ڕۆی مفاڕیۆ. سیاسەتوو نەژادپەرسی،ئاینی و نەتەوەپەرسی کە بە ڕۆح و هەست و داواکاریی گلێرگەی ناتەبێنێ،نەک پەی چالاککەردەیشا، بەڵکوم پەی پاشەکشەپەنەکەردەی و دەسملەرەگێرتەی مبریۆنە ڕاوە. ماوەو دووە ساڵی ویەردەینە ڕژێموو ئێرانی سیاسەتوو بەری و دلێنە ڕووبەڕوو چندین قەیرانا بییەنۆ. سەرکوتوو ناڕەزایەتی و وێنیشانەدایە هەرێمییەکا، جەنگوو بەروو سنووری، تێکدای ژیوگەی،دۆخی ئاڵۆزی ئابووری و گوزەرانوو هاموەڵاتا،فراونابییەی هەژاری و سزاو قەنارەدای و ..... تاد چا قەیرانانێ کە حکومەت ماوەو دوێ ساڵان خولقنێنێش".
ئەرەیاونایەکەو کەژارینە ئانەیچ وزیان ڕووە، کە ئەوەڵوو سەروردای 'ژەنی،ژیوای، ئازادی'یوە،هێزەکاو سەرمایەداری بەڕۆشنی هەڵوێستوو وێشا سەروو دۆخی ئیسەیی نیشانە دا و پێسە ئامان" ڕژێموو ئێرانی پەناش پەی سەرکوتوو،دەنگە ناڕازییەکا بەرد، چا بەینەنە ژەنی و گەنجێ کە مەکینە و دینەمۆو گلێرگەی و ورجەرخیانێ، زیاتەر جە گرد وەختێ کریێ ئامانج".
' زیندانەکانێ بیێنێ بە قەڵاو مدرامانی'
لایوە تەرۆ بابەتوو حیجابی بەزۆری و سەپنای پڕۆژەو نووری، گێرتەی چادەکا لاو پۆلیسوو ئەخلاقیوە،کوشتەی بە نامێ نامووسیوە، فرەو شارانە زیاد بییەن،چی بەینەنە ژەنی ئازادیوازێ، ڕووبەڕوێ سزاو قورسەو زیندانی بیێنێوە.زەینەب جەلالیانە،تاکە زیندانەی سیاسییەژەنی کە ئێرانەنە سزای هەتاهەتاییش هەن و ١٧ ساڵێن ئینا زیندانەنە. ماوەو ئا ساڵانە زیندانەنە فرەو جارا ڕووبەڕووەو ئەشکەنجەی دەروونی و جەسەیی بیێنۆ، بەڵام دەسبەردارەو ئامانجەکەیش نەبیێنە.
جگە چا سزایا،زیندانیێ تەرێ ژەنیچ ڕوانە ڕووبەڕووی ئەشکەنجەو ڕژێموو ئێرانی بانێوە. بە سرووشتی، ماوەو دووە ساڵی ویەردەینە ڕژێموو ئێرانی بە تاکتیکەوو قەنارەدای و تەرسێ و تۆقنای گلێرگەنە نیشانەش مدۆ، کە ئاخروو ئی ڕازێ ئینا دلێ چێوەو دیوارە بەرزە پۆڵایەکانە. زیندان نامێ وێش ئینا وێشۆ،وەلێ ماوەو ساڵەکاو وەڵێنە و بەتایبەتی جە دووە ساڵی ویەردەنە، ئاشکرا بی کە زیندانەکێ بیێنێ بە قەڵاو مدرامانی.
ئاماروو ژمارەو قەنارەدریایا و گێرتەیەکاو ساڵێ وەڵینێ، تەرسەو ڕژێمی نیشانە مدۆنە، نەک تەرسەو گلێرگەی و ژەنا! بە پێچەوانەوە هەڵوێستوو ڕادیکاڵوو گلێرگەی، بەتایبەتی ژەنێ زیندانەنە بێ،کە ڕڕژێموو ئێرانی متەرسۆ، پەی زیندەمەنەیۆ پەنا پەی فشاری زیاتەری بەرۆنە، چالاکیی ژەنە زیندانییە سیاسییا سەرمەشقا، نیشانەشدا، کە مدرامان بە چە نۆعێوە ژیوای ئازاد مخولقنۆ. بێگومان ئا پشتیوانییە بە زیندانەکا سنووردار نەمەن. دلێ و بەروو جوگرافیای سیاسیی ئێرانیوە، هەڵمەتێ جیاجیێ پێسەو 'نا پەی قەنارەدای و بەڵێ پەی ژیوای ئازادی'، ڕاپیمایێ و وێنیشانەدایێ جیاجیێ، کە ڕوانە وەرفراوانتەرێ با، سازێ مکریا.ئینەیچە بە ماناو ئانەیە مێ کە گلێرگەی ئازادیواز جە گرد وەختێوە زیاتەر،پەی بەدەسئاردەی ژیوای ئازادی و دیموکراتی پەنەوازییش بە یەکڕیزی و یۆگێرتەی هەن.
بێگومان ماوەو دووە ساڵوو دماو سەرەوردای 'ژەنی، ژیوای، ئازادی'ینە چند یاگێوەن قسەوباس و شیکاری کریان. دماو دوێ ساڵا موینمێ ئی سەرەوردایە چە کاریگەرییوە قووڵش دلێ گلێرگەینە جیا ئاستەن و بییەن بایسوو ئانەیە کە گەل، هەڵوێستی ڕادیکاڵ نیشانە بدۆ. ڕاسینە متاومێ بواچمێ،خودوو دلێنە و ئامانجوو شۆڕشوو 'ژەنی، ژیوای، ئازادی'ی ڕادیکاڵ بییەن، پەوکای بییەن بایسوو چالاکییە ڕادیکاڵەکاو گەلی.جە چند مانگی ویەردەنە، سەرەڕاو گردوو پلانەکاو ڕژێمی پەی ئامادەکاری بەشداریکەردەی جە ورچنییەکانە، شارە جۆربەجۆرەکاو وەرکەوتوو کوردسانینە و ئێرانەنە 'هەڵوێستی چارەنویسساز و ڕادیکالانەو گەلی' بەڕۆشنی ناشەرعیەتوو ڕژێمیش نیشانە دا. ئیساتێنە گەلاو ئێرانی، مزانا چێششا گەرەکا و بە نامێ ژیوایوە قوربانیی قورسشا دان، تا بەدەسش بارا. پەوکای مکریۆ بواچمێ گلێرگە فرە جە ئامانجەکەیش نزیکا و ئی شۆڕشە هەڵای بەردەواما، چونکوم ئامانجشا بنیاتنیای پێوەژیوای ئاشتییانەو گەلا و خولقنای ژیواێوە ئازادی.
چی دووە ساڵەنە ژەنی نیشانەشا دێنە، کە نە پێناسە تندەکاو سیستموو سەرمایەداری و نە پێناسە ئایینییەکاو ڕژێموو ئێرانی نمەتاوا ڕزگارێشا بکەرا! چونکوم هەردووە پێناسەکێ جە کەلیمێ پیاسالاری وەشێ بیێنێ، ئەدەبی ڕەگەزپەرسانە مەژگوو گلێرگەینە وەش مکەرا. دروشمی ماناداروو 'ژەنی، ژیوای، ئازادی'ی کوردسان، ئێران و وەرکەوتوو دلیراسەینە و جیهانش گێرتەبێ وێش، ئاما سەروو زوانوو گرد لاێوە. چونکوم زانێنێ،ئازادیی گلێرگەی بەبێ ئازادیی ژەنێ نمێ دی.پەی ئانەیچە سەرمەشقایەتیی ئی شۆڕشە کۆمەڵایەتییە گەورەیەیشا کەرد. بنەڕەتەنە پێناسەکاو ڕژێموو ئێرانیشا ڕەت کەردۆ، پێناسێوە تازەشا پەی وێشا متەرە. ئیساتێنە دەنگوو ژەنا، ئێرانۆ تا هندسان، کوردسانۆ پەی گردوو جیهانی مژنەویۆ. یۆگێرتەی بەشەکای تەروو گلێرگەی و پێوەسبییەی بە شۆرشیوە بە ماناو پەشتڕاسکەردەیوە، ئا قسێنە کە ماچۆ ' ئاستوو ئازادیی گلێرگەی پێوەسا بە ئازادیی ژەنێوە' جونکوم پەرسەو ئازادیی ژەنێ،پەرسێوە کاریگەرەنە سەرەە گردوو گلێرگەیوە. سیستموو سەرمایەداری و دەوڵەتە نەتەوەییەکاو مەنتێقەکەی فرە خاس مزانا کە، بە سەرکوتکەردەی دەسەڵاتوو ژەنا متاوا زاڵێ با ملوو گلێرگەیرە. چا یاگێنە کە ژەنی جەنگشا کەردەن، ئیتر قوربانی نەدریان، تەنانەت بیێنێ سەرمەشقێ گلێرگەی، متاوا گلێرگەنە پیمانەکاو سیستموو پیاسالری دوورێ بوزاوە، ئینەیچە تەمام پێچەوانەو سیتستموو پیاسالاریین. پەوکای متاومێ بواچمێ، سیاسەتەکاو دژوو ژەنا بەردەوامێنێ، خەبات و چالاکییەکاو ژەنا دژ پا سیاسەتەیە بەردەوامێنێ.
پېسە جەمەو ژەنا ئازاڎیی ۋەرکۆتوو کورڎەسانی بۆنەو دووەم ساڵوەگەڕو سەرهۆرداو 'ژەنی، ژیۋای، ئازاڎیی'ۆ گرڎوو گەشمەرڎا سەرهۆرداو 'ژەنی، ژیۋای، ئازاڎیی'بە ڕێزدارییوە یاڎۍ مکەرمێوە. دووۍ ساڵۍ کۆششی بەردەوام و چالاکی گەل بە تایبەت ژەنی جە دژو سیاسەتو سەرکوتکەرانەو ڕژێمو ئێرانی مردێوە و جە دووە ساڵی ۋییەرڎەنە هەوڵشا دا بانۍ بە دەنگو ژەنا ئازاڎیوازی جە ئێرانەنە. چ جە دلێینە و چ جبەرو ئێرانی هەنگامەشا نیێنە پەی ڕێکوستەی و یۆوستەی ژەنا کۊششکاری. هەرپاسە چالاکییەکاشا فراوانتەر مکەرا پەی یاوای بە ئامانجو ئازاڎیی حەقەتینەی پەی گلێرگەی و ژەنا. پێوەس پینەی، بەمەبەسو دمایئارڎەی بە سیاسەتەکا ڕژێمو ئێرانی دژ بە ژەنا، گەرەکمانە گرڎو ژەنا کۆششکاری و گلېرگەی ئازاڎیواز، چین و توێژە جیاجیاکاو گلېرگەی جە ٢ەمین ساڵوەگەڕو ئی شۆڕشە کۆمەڵایەتییە گۆرەینە جە مېڎانەکانە یۆبگێرا.
