نویسەر و چەمڎاری سیاسی "لەتیف فاتیح فەرەج" باس چانەیە کەرۊ، پەیامەکەو "جەمیل بایک"ی هامسەرۊکوو دەسەو ڕاوەبەریی کەجەکەی، سەلەمنەروو ئەخلاقی ئاشتیوازانەو کورڎین بە دنیۍ.
جە نویستەێشنە "لەتیف فاتیح فەرەج" نویسەر و چەمڎاری سیاسی، باسش جە پەیامەکەو "جەمیل بایک"ی هامسەرۊکوو دەسەو ڕاوەبەریی کەجەکەی کەرڎەن، کە دلێشنە داواش جە گرڎوو هێزە سەربازییەکاشا کەرڎێبۍ بۊنەو دۊخوو بوومەلەرزەکەیۊ گرڎوو چالاکییەکاشا مرڎنا، چا بارۊ نویستەنش: ئا پەیامە ئەوپەڕوو ئەخلاقین و باسیچش چانەیە کەرڎەن، کە " مرڎنای چەنگی پەیامێوەن یاگۍ بایەخین پەی ئەنقەرەی و ئاکەپەی حەرپاسە نیشانەدای ئەخلاقی ئاشتیوازانەیچا بە دنیۍ، کە کورد پەی تۊڵەکەرڎەیۊ فرسەت نمارۊ، بەتایبەت کە ئێمە ئیسە ئینایمۍ یاڎوو شوباتوو پیلانگێڵنای ویس و چوار ساڵەو چێوەڵتەرینە ".
دەقوو نویستەیەکەو لەتیف فاتیح فەرەجی:
"بڕیارەکەو بایکی
ئاکاری سیاسی فرە زەروورا قسێش سەر کریا، نۊعۍ هێزی سیاسی هەن، جە وەختوو مشکیلە و قۊرتوو وەراوەرەکەیشنە زیاڎتەر زەخمەکا کولنۊوە و بارودۊخەکەی قۊزۊوە پەی ئێشپەنەیاونای ئەوی تەری، ئینەیچە ئەوپەڕوو بێئاکاریی سیاسیین، جە وەرانوەرنە نۊعێوتەر هەن چا نۊعە حاڵەتانە پێسە ئاکارێوە سیاسی دەسۍ جە گرڎ نۊعە ئازارڎایۍ سیاسی ور گێرۊ، گرڎما ئانەی زانمۍ کە ئانە تورکیان، دەیان ساڵێن چەنگوو چنیەیۊ قاڕوو کورڎی کەرۊ و گەرەکشا کورڎی بەشەرەفی نازۊ، وەراوەرشنە کورد پا سەروو "بییەی" و "مەنەیۊ" وێش گێرۊرە، گەرەکش نیا جەنگیچنە ئاکاری سیاسی جە ویر کەرۊ، دما پەیاموو "جەمیل بایک"ی هامسەرۊکوو "کۊما جڤاکێن کورڎستان"ی پەی مرڎنای گرڎوو چالاکییەکا، چی بارودۊخە تایبەتەو تورکیای و سەرنیشتوو کورڎستانینە ئەوپەڕوو ئەخلاقین.
"بایک" پێسە هامسەرۊکوو کەجەکەی تاوۍ بە نۊعێوە قازانج چا دۊخی کەرۊ، کە تورکیای و ئاکەپەی تەنگەتاو کەرۊ، وەلێم ئینەش نەکەرڎ و جەنگش مرڎنا، من "جەمیل بایک"م نزیکۊ دییەن، ئاڎ جگە چانەیە کە سەرکرڎێوە سیاسیین فەرمانڎێوە یارایچا، بەڵام دایمەوخوای گفتوگۊ و سەرووسیماشنە ئاشتیوازی وینیۊ، ئی پەیامیچشە ئینا چا چوارچوەنە، ئننا خۊ ئانە "پارتوو کرێکارا" و کورڎ نییەنۍ کە جەنگوو تورکیای کەرا، ئانە "تورکیا" و "ناتۊ"نۍ کە جەنگوو کورڎی بێوەی کەرا نەک "کەجەکە"، مرڎنای جەنگی پەیامێوە یاگەڎارا پەی "ئەنقەرە"ی و"ئاکەپە"ی و حەرپاسە نیشانەڎای ئەخلاقی ئاشتیوازانەیچا بە دنیۍ، کە کورڎ پەی تۊڵەکەرڎەیۊ فرسەت نمارۊ، بەتایبەت کە ئێمە ئیسە ئینایمۍ یاڎوو شوباتوو پیلانگێڵنای ویس و چوار ساڵەو چێوەڵتەرینە.
بایک پا پەیامیشە نەک حەر جەنگی مرڎنۊ، باوشەو هامکاریی کورڎایچ پەی برا و واڵە وەنەقۊمیایەکا کرێێوەتەرە کەرۊ، دڵنیانا ئی هەنگامۍ دەنگڎایۊیۍ گەورەی سیاسی و میدیاییش بۊ، بەڵام گرنگ ئانەن کە "ئاکەپە" و "ئەرڎۊغان" چی نۊعە پەیامەیە حاڵیۍ با، هەڵبەت پێسە وەڵێچنە واتم ئینە پەنڎێوە یاگەڎارەنە بۊ پەی ئانیشا دۊخی نەگونجیا و ناجۊر کەرا بە فرسەتە پەی زیاڎتەر برینڎارکەرڎەی وەراوەرەکەیشا، "بایک" و "کەجەکە" چونکوم ئینۍ جەنگێوە ئەخلاقی و ڕەوانە، حەرگیز هەرمانەی چانۍ مەکەرا، گەرەکشا نییا ئا کەلەبەرە کە ئیسە وەش بییەن پەی چەنگی و هیچفرسەتانە بەکارش بارا".
