دماو ئانەیە هیزی مامۆسا جاسم کەلاری باسوو ئانەیش کەردەبێ کە قەبرەنە بەکوردی جوابوو مەلایکەکا مدۆوە، تۆڕە کۆمەڵایەتییەکانە کاردایوەش شۆنەو وێشرە ئارد،چی بارەوە کۆنگرێوی ڕۆنامەوانییش مزگیی شێخ عەبدوڵقادری گەیلانینە کەلارەنە گێرت.

"سەردەمێوەنە وچیان حەرکەس تورکی نەزانۆ نمەلۆنە بەهەشت"

مەلا جاسم کەلاری کاردایوەکاو گێڵایوە پەی غەڵەتیایواینەی و فەرموودێوە کە کۆمەڵێوە زانایا، گێڵنانۆ واتش "موچیۆ پەوکای من عەرەبم وەش مسیۆ چونکوم قورئان عەرەبییا، زوانوو خەڵکوو بەهەشتیچ عەرەبییا. ئی فەرموودێ ڕاسە نییەنە و بە نامێ پەیامبەر محەمەدیوە کرییێنە.

خودا قورعانەنە فەرماوانش خاستەرین کەس ئا کەسەنە کە فرەتەرین تەقواش هەنە، تۆ مەی چی بنەمێوە پەنەما ماچی عەرەب جە من خاستەرا،سەردەمیوەنە وچیان حەرکەس تورکی نەزانۆ، نمەلۆنە بەهەشتۆ."

مامۆسا جاسم کەلاری باسوو ئانەیش کەرد فەزڵوو هیچ زوان و نەتەوێوە سەروو هیچ زوان و نەتەوێوە تەریوە نییەن، ئاخروو تەمەنیشنە پێغەممەر محەممەد پەی خەڵکی قسێش کەردێ و واتش کە کەستا چەوی تەریتا جیاواز نییا، خوداتا یۆن، واتش:" پێغەممەر فەرماوۆ فەزڵوو عەرەبی سەروو هیچ کەس و نەتەوێوە تەریوە نییەن، تا ئیساتێچ خەڵک پاسە یاوانەنە، کە عەرەبی نەزانی نمەتاوی قەبرەنە جواب بدەیوە، ئانە باوەڕیوە لاوازا و قورعانی دژایەتیش کەردەن."