هەڵوێسو چین و توێژە جیاجیاکا گلېرگەی ۋەرا ۋەر بە ئەرەگیریەکا دۆڵەتو تورکی فاشیستی تا مۍ ئینا فراوانبیەینە، چی بارۆ مامۆسای ئایینی، مامۆسا مژدە واتش: "ئەرەگیریەکۍ دۆڵەتی سەرو خاکەکەیماوە پاشێلکارییا و خاکما پنەشا حەراما."
ئەرەگیری و پاشێلکارییەکۍ دۆڵەتو ئەرەگیری تورکی پەی سەرو پانیشتوو کورڎەسانی بەردەواما، خەڵکو پانیشتوو کورڎەسانی جە چین و توێژە جیاجیاکا چی بارۆ نیگەرانۍ و ناڕەحەتێنۍ و بەردەوام هەڵوێسەکۍ ئینۍ فراوانبیەینە.
جە بارەو ئەرەگیریەکا دۆڵەتو فاشیستو تورکی، مامۆسا مژدە، مامۆسای ئایینی و ڕاوەبەرو ئەوقافو چەمچەماڵی، جە دیڎارێوە تایبەتەنە قسێش پەی ئاژانسوو هەواڵوو فوراتی (ANF) کەرڎۍ و واتش: "بە پاو دینو ئیسلامی، هەر سنوربەزنایۍ و پاشێلکاریێوە ۋەرا ۋەر بە خاکی و سنورو گەل و نەتەوێوەتەری حەراما، ئێمە پېسە مامۆسایا ئایینی بە تنی ئیڎانەو ئی هرووژما مکەرمۍ ۋەرا ۋەر بە خاکەکەیما، پېسە چنی پێغەمبەرما سڵامو خوڎایش سەر بۆ جە وتارەو خواحافیزینە پنەش فەرماوایمۍ، خاک و شەرەف و ۋنیتا سەرو یۆترینی حەراما، هەر پی جۆرە خاک و نیشتمانو ئێمەیچ بە تورکیای و هەر وڵاتێوە تەری، کە گەرەکش بۆ سنورەکا بەزنۆ حەراما و ڕاش پنە مەڎریۆ و یاگۍ قبوڵی نییا."
ئی مامۆسا ئاینییە سەبارەت بە بێهەڵوێسی وڵاتا جبەری و بەتایبەت وڵاتە ئیسلامییەکانە، واتش: "پېسە چنی هەر گەلێوە تەر، هەر چێوۍ ۋەرا ۋەرش بکریۆ، گرڎو دنیۍ سەرش مېوە جواب، ئێمەی کوردیچ بەردەوام ۋەرا ۋەر بە زووڵم و ستەمو گرڎ شۆنۍ تەری جوابما بیەن و ئیڎانەو گرڎ پاشێلکاریێوەما کەرڎەن، بەڵام جە ۋەرا ۋەرەنە بێهەڵوێسیی و بێدەنگیێوە سەیر جە وڵات و ڕێکوزیا مېیاننەتەوەییەکانە موینمۍ، جە ۋەرا ۋەرو ئا پاشێلکارییاو دۆڵەتو تورکیای ۋەرا ۋەر بە خاکەکەیما مکەرۆش، جە کاتێنە ئەرکو ئاڎیشا پېسە برای دینی و پېسە برای نیشتیمانی ئانەنە کە بێدەنگۍ نەبا، ئانا تورکیا بیەن بە مەڵامەتوو چۆڵکەردەی چڼین دەگایا هامسنوری و پاسشەکەرڎەن کە بانگ جە مزگیەکاشانە نەڎریۆ، کە ئینە جە دینو ئیسلامی و یاسا جەهانییەکایچەنە پاشێلکارییا، پەنەوازا گرڎو وڵاتا هەڵوێس هۆرگێرا دەربارەو ئی پاشێلکارییەو دۆڵەتو تورکی ۋەرا ۋەر بە خاکی و گەلوو کوردی."
ئا مامۆسا ئایینیە باسش چانەیچ کەرڎ کە ئەرکو گرڎو لایەنە سیاسییەکا و خەڵکین جە چینە جیاجیاکانە، یۆ گێرا و دژ پی ئەرەگیریە مرداوە و هەڵوێس برمانا و واتیچش: "پەیامو من پەی گرڎو لایەنەکا ئانەنە، کە ئی ئەرەگیریە و سەرو خاکی و شەرەفیما قبوڵ نەکەرا و گرڎ بەبێ جیاوازی ڕەنگۍ و پەیلوای و ئایدیاکاشا دژ پی ئەرەگیریەو تورکیای مرداوە، کە نەک پېسە ئەرەگیری تەماشەش نمەکەرۆ، بەڵکم ئی سنوربەزنایە بە هەقو ۋێش مزانۆ و هیچ بەهێوەش لاوە گرنگ نییا."
