دۆڵەتو تورکی ئەرەگیری جە لێوە بە هامکاری بنەیانەو بارزانی هرووژمی ئەرەگیری و لکنای جە دژو پانیشتوو کوردةسانی درێژەپنە مڎۆ و جە لێوەتەرۆ فشار و زۆرداری پەی سەرو کولتور و زۋانی کوردی پەیڕەو مکەرۆ. دۆڵەتو تورکی چی دماییانە هورشکوا سەرو ناوەندەکا زۋانی کوردی و هۆگرا زۋانی و وێژەو کوردیش گێرتۍ. گەلوو کوردی دژ بە قڕکەردەی زۋانی و کولتورو ۋێش ئینا چالاکینە. بە تابەتیچ کورد جە ئەوروپانە پەی زیڼەکەردەیۆ کولتور و زۋانی کوردی فێستیڤاڵ ساز مکەرا. جگە جە کوردی ژمارێوە فرە جە ئەوروپیەکایچ بەشداری جە فیستیڤاڵەکا کوردینە مکەرا و دڵوەشی ۋێشا وزا ڕووە.

یووە چا کەسا ئەندامەو پارتو سەوزەکا (یۆبیەی ٩٠/سەوز)ی جە پەرلەمانو ئەیالەتو هەسەنی مارتینا فێلدمایەرە. مارتینا کە بەشداریش جە ٣٢ەمین فێستیڤاڵی کولتوری کوردینە جە فرانکفۆرت کەردەبۍ، جە بارەو فشاری و تاونایۆ کولتوری دۆڵەتو تورکی ئەرەگیری و هرووژمەکا پەی سەرو زۋانی کوردی قسېش پەی ئاژانسوو هەواڵوو فوراتی (ANF)ی کەرڎۍ.

کولتور و مویقاو کوردا فرە وەشا

پەرلەمانتارە مارتینا فێلدمایەرە سەبارەت بە جۆش و خرۆشو فیستیڤاڵەکەی واتش، "کولتور و موزیقاو کوردا فرە وەشا، هۆرپڕای کوردی زەریفا و واردەکێچشا فرە لەزەتیێنۍ. گرڎ چێوۍ چۍ فرە ئاراما. فرە دڵوەشەنا پانەی کە فێستیڤاڵێوە وەش و زەریفی پی جۆرە جە فرانکفۆرتەنە ساز مکریۆ".

' تورکیانە ستەم جە کوردا مکریۆ'

مارتینا فێلدمایەرە جە بارەو سیاسەتەکا تاونایۆ کولتوری و فشار پەی سەرو زۋانی کوردیچ قسێش کەردۍ و ئەرەیاۋناش، "جە هەواڵەکانە ئانەی بەردەوام یاگۍ سەرنجیا ئانەن کە ماچا ڕا بە کوردا نمەڎریۆ بە زۋانو ۋێشا قسۍ بکەرا. تورکیانە ستەم جە کوردا مکریۆ، نمازا بە کوردی قسۍ بکەرا و زاوڵەکاشا فێرو زۋانو ۋێشا بکەرا، ڕا نمەڎا بە کولتورو ۋێشاوە بژیۋا. هیج ئینسانۍ جە ئینسانۍ تەری گۆرەتەر نییا. گرڎو گەلا مافو یەکسانیشا هەن و ئا مافێچە گەرڎونیێنۍ. ۋەرو ئانەیچ پا جۆرە مایۍ قبوڵکەردەی نییا، هەر پۆکەی ئێمە پېسە کەسانۍ دیموکراسیوازی داوا جە دۆڵەتو تورکی مکەرمۍ دەسبەردارۍ چەوەسنایۆ و ستەمکەردەی جە کوردا بۆ، با گەلوو کوردی بە زۋانو ۋێشا بوانا و بە کولتورو ۋێشاوە بژیوا".