کۆنگرەو سەندیکاکا سکۆتلەندای سەرو قۆناغەو دووەمو هەڵمەتەو 'ئازاڎیی پەی عەبدوڵا ئۆجالانی' ئەرەیاۋنێوە وەڵا مکەرۆوە. سەرۆکی وەڵینو STUC و سکرتێرو گرڎی کۆنفیدراسیۆنو سەندیکاکاو دووندەی، مایک ئارنۆت واتش: " بە دڵنیاییوە مشۆم عەبدوڵا ئۆجالان ئازاڎ بۆنە".
بە پاو هەواڵێوە ڕۆنامەو یەنی ئۆزگور پۆلەتیکای؛ کۆنگرەو یۆبیەی سەندیکاکاو سکۆتلەندای (STUC) کە ٥٥٠ هەزار ئەندامێش هەنۍ و ٤٠ سەندیکۍ و ٢٠ ئەنجومەنۍ سەندیکایی، ئینۍ ئاماڎەکارینە پەی ئانەی جە ساڵوەگەڕو دووەمو هەڵمەتەو 'ئازاڎیی پەی عەبدوڵا ئۆجالان'ینە بەیاننامێوە وەڵا بکەراوە.
جە چوارچێوەو هەڵمەتەکێنە جە مابەینو ١-١٠و تشرینو یووەمی جە مېڎانەکانە، پەرلەمان، شارەوانییەکانە کۆنفرانسو ڕۆنامەوانی، چالاکی کولتووری، کۆنفراس، پانێڵ، ۋێنیشاندای کولتووری و ئیکۆلۆژی، چالاکی سیاسی و چالاکیەکاو ژەنۍ ئەنجام مڎریا. جە ئەڵمانیا، فەرەنسا و ئیتاڵیا...چڼین وڵاتۍ تەرو ئۆروپاینە ئاماڎەکاریەکۍ پەی کەمپینەکەی بەردەوامێنۍ.
جە مابەینو ١-١٢و تشرینو یوەمینە چالاکیۍ جە چڼین وڵاتێنە ئەنجام مڎریا
بەریتانیانە کە کەمپینەکەش چنە بەردەواما، جە ما بەینوو ١-١٢و تشرینو یووەمی چالاکی ۋەرفراوان ئەنجام مڎریۆ. کۆنگرەو یۆبیەی سەندیکاکاو سکۆتلەندای (STUC) قەرارا جە ٢ۍ تشرینو یووەمینە جە بیناو سەندیکاینە کۆنفراسێوە ڕۆنامەوانی ئەنجام بڎۆ. STUC جە بەیاننامەکەشەنە نامێوە پەی ڕای گرڎی وەڵا مکەرۆوە کە ئاڕاسەو داڤید لاممی وەزیرو جبەرو بەریتانیایش مکەرۆ، جە نامەکەنە باس جە گۆشەگیری سەرو ڕابەرو گەلوو کورڎی و پەرسەکا کورڎی مکریۆ.
هەر چا وڵاتەنە بە سەرمەشقی ئەنجومەنو گەلوو کوردی و تەڤگەرو جوانا شۆڕشگێڵنی جە فرەو شارەکانە چالاکی و ڕاپیمای ئەنجام مڎریۆ.
'پەی پەرسە مېیاننەتەوەییەکایچ چارەسەرییا'
مایک ئارنۆت داواش جە تورکیای کەرد کە پەی چارەسەرکەرڎەی پەرسەکا کورڎی و دلێینەو تورکیای چنی تەڤگەرو ئازادی کوردی ئەرەنیشتەی بکەرۆ و واتش: "ئازاڎیی عەبدوڵا ئۆجالانی پەی ئەرەنیشتەو بەینو گەلوو کوردی و تورکیای گرنگ و پەنەوازییا. پەی ئامای دی وەڵێکۆتەی جە گفتووگۆنە، بە دڵنیاییوە پەنەوازا ئازاڎ بۆنە."
هەر جە قسەکاشەنە مایک ئارنۆت ئاماژەش پانەیچ کەرڎ؛ فکر و فەلسەفەو عەبدوڵا ئۆجالانی جیا جە چارەسەرکەردەی پەرسەکا کوردی، پەی پەرسە مېیاننەتەوەییەکایچ چارەسەرییا.
