مەسعود عەبدولخالق نویسەر و چەمداری سیاسی و ەرپەرس و ڕاوێژکاروو دەزگاو ستاندەری پەی ئەوەکۆڵیای و ئەرەیاونای،کە ناوەندێوی تایبەتا بە کەردەی ئەوەکۆڵیای سەروو پەرسە سیاسییەکا کوردسانەنە و مەنتێقەکەنە،نامێ بریا قسێوە تایبەتەنە سەبارەت بە هجوومەکاو دەوڵەتی ئەرەگیروو تورکی پەی سەروو خاکوو پانیشتوو کوردسانی، بێدەنگیی حزب و لایەنەکاو پانیشتوو کوردسانیش وەراوەروو ئا ئەرەگیریینە،هەوڵەکاو تورکیای پەی دلێنەبەردەی و ناستەی قەوارەو هەرێموو کوردسانی و چەند پەرسێوی لکەدریێ ئا بابەتەیە،پەی ئاژانسوو هەواڵوو فورات (ANF)ی دوا.

'تورکیا دلێ خاکوو پانیشتوو کوردستانینە یاگێش نمەبۆوە'

مەسعود عەبدولخالق ئەوەڵوو قسەکاشەنە ئاماژەش بە تەرسەو پیلانەو دەوڵەتوو تورکی سەروو سەروەریی پانیشتوو کوردسانیوە کەرد و واتش:" ئا هجووم و پەلامارێ تورکیا مکەرۆشا، ئامانجشتەنیا دلێنەبەردەی پارتێوی سیاسیی نییەن، بەڵکوم ئەرەگیری و دلێنەبەردەی تەماموو خاکوو هەرێموو کوردسانییا،وەلێ ئەگەر جە ورچنییەی ئایندەو پەرلەمانوو هەرێموو کوردسانینە، فاڕیای بنچینەیی ڕووە بدۆ، یاگێ تورکیای دلێ خاکوو هەرێموو کوردسانی و عێراقینە نمەبۆوە."

'ڕێکەوتەینامەکێ بە هانیدای وەزیرەکاو پەدەکەی کریێنێ'

درێژەو قسەکاشنە، مەسعود عەبدولخالق ئاشکراش،کەرد کە عێراق ئا ڕێککەوتەیێ بەینوو وێشو دەوڵەتوو تورکیش قبووڵێ نەکەردێ کە بەینوو وەزیروو پەدەکەی وەزیروو بەروو عێراقی و وەزیروو دلێ هەرێموو کوردسانی ئیمزا کەردێبێنێ و واتش:" ئیساتێ کوردسان پێسەو جارا نییەن، ساعیبوو وێش هەنش کە عێراقا و وەڵاتێوی ئەنداموو نەتەوە یۆگێرتەکان، پەوکای تورکیا فرسەتوو ئانەیش نییەن برشمی پانیشتوو کوردسانی ئەرەگیر بکەرۆ، ڕاسا بەینو تورکیاینە و وەزیروو بەروو عێراقینە ڕێککەوتەی کریابێ،وەلێ وەشبەختانە  هەنگامێوی تازێ عێراقینە ئا ڕێککەوتەی و جەیۆییاواینەیە قبووڵ نەکریا، کە وەزیروو بەروو عێراقی و  تورکیای کەردەبێ چەنی وەزیروو دلێ هەرێموو کوردسانی."

'قبووڵنەکەردەی ڕێککەوتەینامەکەی دژوو تورکیای هەنگامێوە فرە خاسەنە' 

مەسعود عەبدولخالق بەردەوامیینە ئاماژەش بە گرنگیی قبووڵنەکەردەی ڕێککەوتەینامەو بەینوو ئەنقەرەی و وەزیرەکاو پەدەکەی کەرد و واتش:" قبووڵنەکەردەی ڕێککەوتەی تورکیای و وەزیرەکاو پەدەکەی، هەنگامێوە فرە خاسەنە دژوو تورکیای،گێرا ئایندەو تورکیای خاکوو هەرێمینە پێسنە نەبۆ، بەتایبەت ئەگەر ئی جارە ورچنییەی پەرلەمانینە هەرێموو کوردسانی بفاڕیۆ."

'بێدەنگیی پارتەکاو پانیشتی یاگێ نیگەرانیینە'

ئاخروو قسەکاشنە مەسعود عەبدولخالق نویسەر و ڕۆشنویروو کوردی ڕەخنەش جە بێدەنگیی پارتەکاو  پانیشتوو کوردسانی وەراوەروو ئەرەگیرییەکاو دەوڵەتو تورکی کەرد و واتش:" فرە ناوەشا کە موینمێ لایەنێووە حیزبی پانیشتوو کوردسانینە"پەدەکە" بە نامێ ڕێککەوتەی ستراتیژیی تورکیایشئاردەن پانیشتوو کوردسانیوە، وەلێ کە موینمێ حیزب و لایەنەکێ تەرێ بێدەنگێنێ، وەختێوەنە ئشیا ئامێنێوە جواب سەروو ئەرەگیرکاریی دەوڵەتوو تورکی وەروو ئانەیە تورکیا فرە بەئاشکرا درووشمەکەش ناستەی قەوارەو هەرێموو کوردسانیین."