شاندو ئیمراڵی دماو چەمپنەکەوتەکەیشا چنی ڕابەر ئاپۆی، جە ئەستەنبوڵەنە داواکارییەکەو ڕابەر ئاپۆیشا پەی ڕاو گرڏی وەڵاکەردۆ. ڕابەر ئاپۆ جە پەیامەکەشەنە سەرنجش وست سەرو کەردەیۆ دەروازەی پەی سیاسەتو دیموکراتیک و واڵەو-برایەتی بەینو کوردی و تورکی.

سیاسەتمەدار موسا پیرئۆغلۆ جە هورسەنگنایش پەی بانگەوازییەکەو ڕابەر ئاپۆی واتش: "بەراسی ئی داواکارییە پەی دامی ئاردەو بە چێوی نییا. بە پێچەوانۆ داواکاری دەسپێکو قۆناغێوە تازەین. ئێژا ئۆجالان جە پەیامەکەشەنە سەرنجیش وست سەرو چێوی فرەی. بەڕێز سری سوورەیا ئۆندەرە جە تێبینەییەکەینە وەڵاش کەردۆ سەرنجش وست سەرو خاڵێ گرنگێ و گرڏ چێوێ جا بەربڕییەیا و وشا شاریێوە. بەراسی 'ئەر شمە مەڵامەتەکا ئەرەمەرزنارەو پەکەکەی نمازدێ، ئانە پەکەکە بە ئاسانی دامی بەوێش مارۆنە.' بەڵام وەرپرسیارەتیش پەی کۆنگرەی جیا ئاست. مشۆم دان بە ڕەهەندی سیاسی دیموکراتیک و یاسایی نریۆرە. چێگەنە دووێ خاڵێ گرنگێ بەرێبگنانە؛ ئا چێوەی جە ئەستۆو ئێژا ئۆجالانینە بێ جابەجێش کەرد، ئیتر وەرپرسیارەتییەکەش گنۆنە ئەستۆو دۆڵەتی. خاڵی دووەمیچ داواکاریێ جە ڕاو گرڏی کریا و داواو هامپشتیکری کەردەین پەی بنیادنیاو مەرجەکا ئاشتی. هەرپاسە بانگەوازش جە هێزە مییاننەتەوەییەکا کەرد پەی ڕەخسناو هەلومەرجەکا چەکنیارەی. بە براو من داواو قسەکەردەی و هەنگامنییایش کەرد. واتش 'دمای ئاردەی بە ڕاستەخۆو پرۆسەکەی، دامی بەوێما مارمێنە' دلێ ئینەینە نەبێ."