چەنی دەسپەنەکەرڎەی مەراسیمەکاو ١٠ ڕووەو یاڎوو شۊڕشوو ساڵەو ١٩٧٩، وێنشاندای و ناڕەزایەتییەكۍ دژوو دەسەڵاتی جە وەرکەوتوو کوردستانی و ئێراننە وەردەواما و تا مۍ سەروو ئاستوو بەیننەتەوەییچ پەشتیوانییەکۍ جە سەرە وڎای ژەنی، ژیوای، ئازاڎیی فراوانتەر بۊ.
گرڎ ساڵێوە، دەسەڵاتوو كۊماری ئیسلامی بەینوو ١ پەی ١١ شوباتی (١٢ و ٢٢ی ڕابەنڎان)ی یاڎوو سەركەوتەی شۊڕشوو ١٩٧٩ کەرۊوە، كە پێسە شۊڕشی ئیسلامی مشناسۊش و ئێساڵ یاڎكەردەیۊكەی هامكاتا چەنی وەردەوامیی درێژخوایەنتەرین و وافرتەرین شەپۊلەو ناڕەزایەتی، جە تەمەنوو ٤٤ ساڵەو دەسەڵاتوو كۊماری ئیسلامینە.
هیزی، كە هامكات بۍ چەنی مەراسیمەكاو ١٠ ڕووەو یاڎوو شۊڕشوو ١٩٧٩، جە شارو ئابدانانوو پاڕێزگاو ئیلامینە، جارێوە تەر گەنجۍ مجیۍ سەروو جاڎەکاو دژوو دەسەڵاتی درووشمێشا واتێوە.
گەنجاو كوردی جە ئابدانان، جە مەیڎانۍ شارەكەینە، پەیكەروو بەسیجیشا سۊچنا و بەتەمامی دلێشانە بەرد.
هامكات شەوەی ویەرڎۍ، جە تەبرێزنە تاوەرێوە پەیوەندییەكا، كە جە لاو كەناڵی فەرمیی دەوڵەتیوە بەكار ئۍ، گەنجاو شارەکەی ئاویرشا وەر دانە.
چەنی بەردەوامیی ناڕەزایەتییەكا، هەڵمەتەكاو گێرتەی، ئڕفانای و بێسەروشۊنكەردەی چالاكایچ درێژەش هەن و هیزی دەیان كەسۍ جە شارە جیاجیاكاو ئێرانی و وەرکەوتوو كوردستانینە گیریێنۍ،
هامكات جە شاروو جوانڕۊو وەرکەوتیچ، یەرۍ جە وێنیشاندەرە گیریایەکاو ئاگەی بە نامەكاو، “ئەرشیا بەرزین، كیانوش ئەعزەمی و پارسا كەریمی” بە كۊی گرڎین سزاو ٥٨ مانگا زینڎانی و دایوەنەی ٢٢٢ قامچییاشا سەرەر سەپیا.
جە چوارچووەو ناڕەزایەتییەكایچنە جە دژوو هەڵمەتەكاو گیرتەی و فشاروەشكەرڎەی پەی سەروو چینە جیا جیایەکا، هیزی سەندیكاو ئازاڎیی كرێكارا جگە ئیدانەكەرڎەی گێرتەی، سزاڎای و بەرکەرڎەی ژمارێوە جە مامۊستایاو شارەكاو وەرکەوتوو كوردستانی و ئێرانی باسشا چانەیە کەرڎەن، وەزارەتوو پەروەردەیچ جە ڕای جیا جیاوە فشارەكاش پەی سەروو مامۊستایا هەس کەرڎێنۍ.
جە ئەرەیاوناكەینە ئامان، كە حوكمەت هامكات چەنی سەركوتوو مامۊسایا، تەلەبا، كرێكارا و چینە جیاجیاكاو گلێرگەی، وچکلەتەرین هەنگامۍ پەی چارەسەركەرڎەی بەشێوە كەمی جە دۊخوو ناهەمواروو دارایی و كەمكەردەیۊ قەیرانە كەڵەكەبییەكا مەنیۊ و تەنیا چێوۍ، كە گرنگییش مدۊ پەنە تاڵانكەردەی سامانوو وڵاتەكەین
سەروو ئاستوو جبەریچ پەشتیوانییەكا جە سەر ورڎای ژەنی، ژیوای، ئازاڎی زیاڎۍ بیێنۍ و هیزی جە نامێوەنە ٤٧٠ كەسایەتێی، كە ژمارێوە جە بریێوەكاو خەڵاتوو نۊبڵیچشا چەنەن جە ئەرەیاوناێنە، ڎاواشا جە گلێرگەی بەیننەتەوەیی کەرڎە، كە هەوڵۍ تەمامەتیۍ بدۊ پەی ڎاکۊکیی جە مافوو وێنیشاندەرو ئێرانی.
جە ئەرەیاوناکەینە ئامان، ئامانجوو وێنیشاندەرا ئێراننە ڕەتكەردەیۊ دەسەڵاتێوە تنڎڕەوی ئاینین و درووشمەكێچشا ئینەن"ژەنی، ژیوای، ئازاڎی" و یەك ڎاواكارییشا هەن ئاڎییچ ئازاڎین.
باسیچشا چانەیە کەرڎەن، كە سەركەوتەی ئا وێنیشانڎایا بە ماناو دەسەڵاتێوەن کە دوژمنوو ژەنان و ئینەیچ ورچەرخیایۍ گەورەن سەروو ئاستوو دنیێنە.
وێنیشانڎایەکا وەرکەوتوو كوردستانی و ئێرانی، كە جە دلێڕاسەو مانگەو ئەیلوولوو ساڵۍ ویەرڎێوە تا ئیسە سەرەمڕێنۍ، چارەنویسوو دەسەڵاتوو كۊماری ئیسلامیشا جە ٤٥ ـەمین ساڵیاڎوو ئەرەمەرزیایشنە بەرەو لایۍ ئاراسە كەرڎێنۍ، كە گرەو سەروو نزیكبییەیۊ واڎەو دماییئامای ئا دەسەڵاتی کریۊ.
ڕ.ڕ
