پەرلەمانتارەی وەڵینەو هەدەپەی کە بەناچاری ڕووەش کەرڎێنە تاراوگە، باسش چانەی کەرڎ، قۆناغەکۍ ئۆسلۆی و ئیمراڵیی نیشانەشا دا بە بێ بەشداری رابەرو گەلوو کورڎی عەبدوڵا ئۆجالانی پەرسو کورڎی چارەسەر نمەکریۆ.
پەرلەمانتارەی وەڵینەو هەدەپەی نورسەل ئایدۆغانە باسش چانەیە کەرڎ، کە ئاکەپە- مەهەپە بە سیاسەتو ناچارەسەری نمەتاوا بیاوا بە هیچ ئەنجامێوە و واتش، "گێڵایۆ پەی پرۆسەو ئاشتی و چارەسەری نەک هەر پەی کورڎا هەرپاسە پەی گەلاو تورکیای تەنیا ڕاو چارەسەرینە".
ئایدۆغانە جە چەمپنەکۆتەیێنە چنی ئاژانسوو هەواڵوو فوراتی (ANF) باسش چانەیە کەرڎ کە ئاڎۍ لایەنگرۍ ئاشتی و چارەسەرینۍ، پەی ئانەی ئەرەکۊشا و واتش، جە ئاژەو ئیساتێنە ئاگاڎارۍ دژوار و تەنگوچەڵەمەکا ئەرەکۊشای ئاشتی و چارەسەرینمۍ. نورسەل ئایدۆغانە ئەرەیاۋناش کە جە کاتێنە هامکاری ئاکەپە، ئەرگەنەکۆن، مەهەپەی و هامبەشەکا تەریشا بەردەواما، محاڵا بتاومۍ چەمەڕاو چارەسەری و ئاشتی بیمۍ و واتش، "پەرسو کوردی تەنیا پەرسو تورکیای نییا، جە هەمان کاتەنە کێشە و پەرسو ۋەرکۊتوو مېیامینی و دۆڵەتا جیهانی و گرڎو ئا هێزانە کە پلانە و بەرنامەشا جە ۋەرکۊتوو مېیامینینە هەن. ئێمە بەردەوام ئانەی ماچمۍ؛ ئانەی پەرسو کورڎی چارەسەر بکەرۆ و ئاشتی دەسەبەر بکەرۆ، هێزو گەلین. بێگومان فاکتەرو جبەری و هێزەکا جبەریچ بیەیشا هەن، ئانەیچ گرنگا. ئەرەکۊشای گەلوو کوردی، دۆسەکێشا، هێزە چەپ و سۆسیالیستەکۍ و دیموکراسیوازۍ یەکلای کەرەوێنۍ."
هامکاری ئاکەپە-مەهەپەی و ئەرگەنەکۆنی نمەتاوۆ بیاوۆ ئەنجام
نورسەل ئایدۆغانە ئانەش وست ڕووە کە ئیتر جە چوار لاو جیهانیۆ خەڵک و هێزەکۍ مزانا کە مشۆم پەرسو کورڎی چارەسەر بکریۆ؛ مشۆم ئانە جە لاو تورکیایچۆ بوینیۆ و واتش، "هەم پرۆسەو ئۆسلۆی و هەمیچ پرۆسەو ئیمراڵی نیشانەش دا، بە بێ بەشداربیەی بەڕێز ئۆجالانی چا پرۆسانە پەرسەکە چارەسەر نمەبۆ. بەڵام چا بابەتەنە پاشەکشێوە هەن. بە تەمامی ۋییەرڎەی رەڎمکەراوە و گەرەکشانە سەرو ئا رەڎکەردەیۆ پرۆسێوە تازە خوڵقنانە. جە روانگەو منۆ هامکاری ئاکەپە-مەهەپەی و ئەرگەنەکۆنی نمەتاوۆ چا ڕێوە بیاوۆ ئەنجام. گېڵایۆ پەی پرۆسەو ئاشتی و چارەسەریچ نەک هەر بە تەنیا پەی کوردا، بەڵکم هەرپاسە پەی گەلاو تورکیایچ، پەی وڵاتێوە کە ئابووریەکەش وڕان و خەڵکەکەش بیەن بە نائارامتەرین و نادڵنیاتەرین خەڵک، تاکە ڕاو رزگارییا".
