سەبارەت بە گۊشەگێریی تنڎوو دۊڵەتوو ترکی، جە وەرانوەروو ڕابەروو گەلوو کورڎې "عەبدوڵڵا ئۊجەلان"ېنە کە زېاڎتەر جە (٢٠) مانگێن ھیچ ھەواڵێوەش سەر مەزانریۊ، "نیازحامیڎ" چەمڎاری سیاسی، ئاژانسوو ھەواڵوو فورات (ANF)یش نرخنا و مەڵامەتوو ئا گۊشەگێرییشە جە لاو ترکیەېۊ ڕۊشن کەرڎۊ.

نیازحامیڎ جە سەرەتاو قسەکاشنە واتش: ماوەو زېاتەر جە (٢٠) مانگان گۊشەگیریۍ تنڎ سەروو ڕابەر ئاپۊی ملۊ ڕاوە.

گەرەکشانە جە ڕاو سزادای ڕابەر "ئاپۊ"یۆ، سزاو گەلوو کورڎی بڎا. بە مەعنایێ تەرە، گەرەگشانە جە ڕاو گۊشەگیرکەرڎەی ڕابەر "ئاپۊ"یۆ وەر بە چارەسەرکەرڎەی پەرسەو کورڎی  جە مەنتێقەکەنە گێرا. چونکوم ڕابەر "ئاپۊ" چارەسەرش پەنەن پۍ ئا مژارییە، کە ئیساتێ مەنتیقەکەنە هەن.

*پەکەکە پۍ چارەسەروو پەرسەو کورڎې درووس بییەن.

"نیازحامیڎ" ئاماژەش پانەی دا، کە گەلوو کورڎی خۊتان تارێخێوە ھەزار ساڵەن مەنتیقەکەنە، وەلۍ ئیسە ئینا چێروو ئەرەگێرتەینە، پەکەکەیچ پۍ ئانەی وەش بییەن کە گەلوو کورڎی چی ئەرەگیرییە نەجات بڎۆ، پەکەکە جە وەشبییەیشۊ پۍ چارەسەری وەش بییەن، نەک پۍ جەنگی، خەباتیچش چا ڕێنە بییەن.

*گەلوو کورڎی وابەسەو ڕابەر "ئۊجەلان"ین.

"نیازحامیڎ" سەرنجەش وستە سەروو کۆشیایەکاو "عەبدوڵڵا ئۊجەلان"ی پۍ چارەسەریی پەرسەو کورڎی، ئا چەمپنەکەوتەیشە ېاڎ ئاردۊ، کە دووۍ ساڵۍ چێ وەڵتەر ڕابەر "ئاپۊ" چەنې خانەواڎەکەیش کەرڎەبێش. چا چەمپنەکۊتەینە ڕابەر "ئاپۊ" بەئاشکرا واتەبێش ئا گیروگرفتێ  کە سەرنیشتوو کورڎسانینە ھەنۍ، ئەگەر هەل و دەرفەتم درېۊ پەنە، توانامەنە ھەن بە حەفتێوە خاسش کەروو. نامبرېا ماچۊ ڕابەر "ئاپۊ" ئا توانێشە ھەنە  و کەسایەتیێوە خۊتان پڕۊژەن،  بە ملوێن کەسۍ پەشتیوانییش کەرا، ئا جمیەرە دیبلۊماسی و سەروازی و جەماوەرییە، کە جە کورڎسانوو دېاسپۊرایچنە ھەن وابەستەن بە ڕابەر "ئاپۊ"یۊ ھەر ئاڎیچ متاوۋ ئا پەرسە ڕەوێ وەش کەرۊ، ئەگەر نیەتێوە خاس جە لاو وەرانوەریۊ بۊ.

جە دماېې قسەکاشنە "نیازحامیڎ" ئاماژەش پانەی کەرڎە، ئانەی ڕا جە چارەو پەرسەو گەلوو کورڎی مگێرۊ دۊڵەتوو ترکیەېن، چونکوم ئا دۊڵەتە جە چوارچووەو ئیسلامی سیاسینە وێڕاوەبەری کریۊ. تەمەنوو وێش درێژ کەرۊوە بە وەرپاکەرڎەی جەنگی دژوو گەلوو کورڎی، بە پەیلوای من سیاسەتوو جەنگوو دۊڵەتوو ترکیەی ئەرەگیری، کە وەڵۍ جە ئاشتیی گەلا گێرۊ، مەڵامەتا پۍ ئانەی ڕابەر "ئاپۊ" گۊشەگێر کرېۊ و زینڎاننە مەنۊوە، چونکوم ڕابەر "ئۊجەلان" ئەگەر هەلەش پەنە درېۊ متاوۋ کێشەکا چارە کەرۊنە و وەڵۍ جە جەنگی گێرۊ.

ھ.ئ