پارێزگاو هەڵەبجەی هەنگامەش پەی وانای بە هەورامی گێرتەنەۋەر
ڕاوەبەریی پەروەردەی جە پارێزگاو هەڵەبجەی هەنگامەش پەی وانای بە هەورامی نیا و هەورامییەکۍ وازیارێنۍ؛ جە زووتەرین وەختەنە ڕاکارەکۍ دەستپنەکەردەی وانای بە هەورامی بگیریانەوەر.
جە هەنگامێوە دڵوەشکەرەنە پەی هەورامییەکا و پارێزنای زۋانەکەیشا، ڕاوەبەریی پەروەردەی جە پارێزگاو هەڵەبجەی بڕیاریێۋەی گرنگشدا.
ڕاوەبەریەکە جە نامێوەنە فەرمییەنە داواش جەسەرجەم وانگایەکاو پارێزگاکەی کەردەن، تا گردنای پەی سەرجەم وانکار (مسیار)ەکاشا بکەرانۍ کە زۋانشا هەورامییەن تا جە ڕاشەوە وەرچەم ڕۆشنی پەی ڕاکارەکاو دەستپنەکەردەی وانای بە هەورامی ببۆنە.
هەورامییەکۍ هەورامانی و پارێزگاو هەڵەبجەی و پانیشتو کوردستان، وەشحاڵێنۍ بە بڕیارەکەی و وازیارێنۍ؛ جە زووتەرین وەختەنە ڕاکارەکۍ دەستپنەکەردەی وانای بە هەورامی گیرینەوەر.
یاگۍ یادئاۋاریەن، جە ڕۊدیارو ٣٠ حوزەیرانو ساڵەو ٢٠٢١یەنە، حەمەو حەمەسەعیدی وەزیرو ڕۆشنویری ھەرێمو کوردستان بەنۋسیای ژمارە ٤٦ی، بە فەرمی داواش جە وەزارەتو پەروەردەو هەرمێو کوردستانی کەردەبێ؛ تاوەکو زۋانی هەورامی جە پارێزگاو هەڵەبجەیەنە بوانیۆنە.
دواکاریەکەو وەزیرەکەی کارۋەدای جۆربەجۆرێش شۆنیەرە ئاومێ و جە ئی چوارچوەنە، هەورامییەکێ و بەشێ جە پێکئامایەکاو کوردستانی پەشتیوانیشان ونەکەرد و وازیارێنێ وەزارەتو پەردەوەو هەرێمی بەزوویی وەڵامو داواکاریەکەی بڎۆنەوە و قبوڵش بکەرۆنە و شۆنیشەرە ڕاکارەکاۍ پەی وانای بە هەورامی جە پارێزگاو هەڵەبجەیەنە بگێرۆنەوەر.
