بزووتنەوەو گۊڕانی، حیزبوو شیوعى، زەحمەتکێشان، بزووتنەوەو دیموکراتى گەلوو کورڎستانی و یەکێتى نەتەوەیی دیموکراتیی کورڎستانی، سەرێشا جە نوێنەرایەتیی هەدەپەی جە هەولێرنە دا، پەشتیوانیى وێشا پەی ئا کەمپینەیە بەر وست، کە پەی زەرەروەنەکەوتاو بوومەلەرزەکەی ئەرەیا
هەریۊ جە بزووتنەوەو گۊڕانی، حیزبوو شیوعى، زەحمەتکێشان، بزووتنەوەى دیموکراتیى گەلوو کورڎستانی و یەکێتیی نەتەوەیی دیموکراتیی کورڎستانی سەرێشا جە نوێنەرایەتیى هەدەپەی جە شاروو هەولێرینە دا.
ئا پەنج لایەنە سیاسییە پەشتیوانیى وێشا پەی ئا کەمپینەیە بەر وست، کە لاو هەدەپەیۊ پەی زەرەروەنەکەوتاو بوومەلەرزەکەو سەرنیشت و وەرنیشتوو کورڎستانی ئەرەیاونیابۍ، چاگە داواشا کەرڎە هاموەڵاتییۍ بەگەرمى بەشڎارییش چەنە کەرا.
چا بارۊ "ناهیدە ئارمیش'ە، ئەندامەو نوێنەرایەتیی هەدەپەی کۊنگرێوە ڕۊنامەوانینە واتش، سپاسوو گرڎوو ئا لایەنا کەرمۍ، کە ئینۍ چەنی کەمپەینەکەو ئێمە بە مەبەسوو هامکاریکەرڎەی زەرەروەنەکەوتاو بوومەلەرزەکەو سەرنیشت و وەرنیشتوو کورڎسانی.
"ناهیدە ئارمیش"ە ئاماژەش پانەیچ کەرد، کەمپینوو هەدەپەی درێژەش هەن و پێویسییە ڕوانەییەکۍ هاموەڵاتییا ڕوانەو وەرنیشتوو کورڎسانی کەرمۍ و هامکاریى ماددی پەی سەرنیشتوو کورڎسانی کیانمۍ، داواکارێنمۍ هاموەڵاتییاو پانیشتوو کورڎسانی بە پاو تواناو وێشا بەشڎاریی چی کەمپینەینە کەرا.
لاو وێشۊ "کورڎۊ ساڵح" بە نامۍ هەریۊ جە حیزبوو شیوعى، زەحمەتکێشان، بزووتنەوەو دیموکراتیی گەلوو کورڎستانی و یەکێتیی نەتەوەیی دیموکراتیى کورڎستانی ئەرەیاوناش، پەشتیوانیی وێما پەی کەمپینوو هەدەپەی بە مەبەسوو هامکاریکەرڎەی زەرەروەنەکەوتا بوومەلەرەزەکەو سەرنیشت و وەرنیشتوو کورڎسانی بەر وزمۍ.
ئانەیچشە وات، بەشڎاریکەرڎەی چی کەمپینەینە، بە ئەرکوو سەروو شانەو وێما و گرڎوو هاموەڵاتییا مزانمۍ و داواکارێچنمۍ گرڎوو لایەنگێراما چی هەڵمەتێنە بەشڎارۍ با.
حەرپاسە، "شاخەوان خالیڎ" سەرکرڎە جە حیزبوو یەکێتیی نەتەوەیی دیموکراتیی کورڎستانی ئەرەیاوناش، بەشڎاریکەرڎەی چی کەمپینەو هەدەپەینە پەی هامکاریکەرڎەی زەرەروەنەکەوتاو بوومەلەرزەکەى سەرنیشت و وەرنیشتوو کورڎسانی، بە ئەرکێوە نیشتمانی، نەتەوەیی و ئاینی مزانمۍ و داواکارێنمۍ هاموەڵاتییا بەیا دەموو کەمپینەکەیۊ.
