نوێنەرو ئەنجومەنو پەرلەمانتارا کۆنسەو ئەوروپای ستێفان شێناچ سەبارەت بە سەرۋنەداکەیش پەی تورکیای گوزارشتێوەش ئاماڎۍ کەردە. چنەشەنە ئانە وزیان ڕووە، پەی جابەجێکەردەو قەرارەکا دادگاو مافەکا مرۆڤو ئەوروپای جەبارەو گۆشەگیریۆ، مشۆم دەمودەس ڕاوجا بگیریۆنە وەر.
یۆ جە ریپۆرتەرا و نوێنەرا ئەنجومەنو پەرلەمانتارا کۆنسەو ئەوروپای پەی کاروبارو تورکیای، ستێفان شێناچ سەبارەت بە سەرۋنەداکەو ١١-١٤و حوزەیرانو ٢٠٢٤ پەی تورکیای گوزارشتێوەش ئاماڎۍکەردێنە. جە
گوزارشتەکێنە کە جەلایەنو شێناچی و جیل مۆرتیمەریۆ ئاماڎەکریێنە، باس جە هەلومەرجو گۆشەگیری سەرو ڕابەرو گەلو کوردی عەبدوڵا ئۆجەلانی کریان.
جە گوزارشتەکێنە سەرنج وزیان سەرو گۆشەگیریی عەبدوڵا ئۆجەلانی
گوزارشتەکێنە پێوەس بە گۆشەگیریی عەبدوڵا ئۆجەلانی ئامان، "دەربارەو ئاژەو بەڕێز عەبدوڵا ئۆجەلانی کە ئیسە جە زینانو دوورگەو ئیمراڵینە زینانیا، من ئاگاڎار کریانیۆ کە. جە ئادارو ٢٠٢٠یۆهیچ کەسۍ جە قەومو کەسەکاش نەتاوانشا سەرش ۋنە بڎا دماین جار جە ئادارو ٢٠٢١ی بە تەلەفون چەنی براکەیش قسێش کەردێنێ. جە ئابو ٢٠١٩یچۆ پارێزنەرا نەتاوانشا بویناش".
٥ گوزارشتۍ سی پی تی وەڵانەکریێنێوە
گوزارشتەکێنە هەرپاسە ئانەیچ وزیان رووە کە ٥ گوزارشتۍ کۆمیتەو ڕاگیری جە ئەشکەنجەو سی پی تی وەرو ئانەی کاربەدەسا ڕاشا نەڎان، وەڵانەکریێنێوە.
زیڼان و هەلومەرجو راگېرتەی
جە گوزارشتەکېنە چەمڎاری سەرو زیڼانی و هەلومەرجو زیڼانیا جە تورکیانە ئاماژەش پنەدریان و نیگەرانیەکۍ دەربارەو قەرەباڵغی دلۍ زیڼانەکا و سزاو زیڼانی ماوەدرێژی و ماوەو راگێرتەی و ئاستەیۆیشا هۆرسەنگیێنۍ.
جە گوزارشتەکێنە بە ۋەرفراوانی ئاماژە بە ئاژەو هامسەرۆکی وەڵینو هەدەپەی سەلاحەدین دەمیرتاشی و عوسمان کاڤالای کریان کە بە مەڵامەتو دۆسیەو پارکو گەزیوە ئینا زیڼانەنە، نیگەرانی جە بارەو ئاژەو زیڼانیا نەوەشیۆ وزیان ڕووە.
جە گوزارشتەکێنە هەرپاسە دەسنیشانکریان، کە سەرەڕاو ئانەی ۋەرپەرسا تورکیای پەیامو 'سازش نەکەردەیشا ۋەرا ۋەر بە ئەشکەنجە'ی دان، بەڵام چی ساڵا دماینە جە کاتو باڵبەسکەردەی کەسەکانە جە لایەو پۆلیسیوە و هەرپاسە جە زیڼانەکانە ئەشکەنجە و مامەڵەی خراپ زیاڎش کەرڎەن و واتشا تورکیا وەڵێکۊتەیەکۍ ۋێش چا بوارەنە سەرو چێر کەردێنۍ. جە گوزارشتەکێنە لایۍ جە دۆسیەکا مەردەی جە زیڼانەکا جۆرو ئێفیچ دریانۆ.
مشۆم تورکیا قەرارەکا دادگاو مافەکا مرۆڤو ئۆروپای جابەجێ بکەرۆ
جە گوزارشتەکێنە قەرارەکۍ دادگاو مافەکا مرۆڤو ئۆروپای کە جە لایەنو تورکیایۆ جابەجێنەکریێنۍ یاڎ وزیێنۍ و ئانە وزیان ڕووە ئا قەرارۍ کە پێوەسێنۍ بە پاشێلکەردەی ئازادی ڕابەربڕیەی و ئەرەیاۋنای، پاشێلکەردەی ئازادی گلێرۆبیەی و کاری رێکوزیایی، پاشێلکەردەی ئازادی ۋیر و ڕای، ئایین و باوەڕی، کارەکاو دادوەری، بێکاریگەری ۋەنەپەرسایۆ دەربارەو کردەوەکا هێزە ئەمنییەکا، قوتاربیەی جە سزا و تنووتیژی دلۍ خێزانینۍ.
نوێنەراو ئەنجومەنو پەرلەمانتارا کۆنسەو ئەوروپای جە دیڎارەکاشانە چنی کاربەدەسا ئەنقەرەی جەختشا چانەی کەرڎەنۆ کە جابەجێکەردەی قەرارەکاو دادگاو مافەکا مرۆڤو ئەوروپای ۋەرپرسیاریۍ تاریخیا ۋەرا ۋەر بە پەیماننامەو مافەکا مرۆڤو ئەوروپای و داواشا جە کاربەدەسا تورکی کەرد کە دەموودەس ئا قەرارا پێوەس بە دەمیرتاشی و کاڤالای جابەجێ بکەرا.
جە گوزارشتەکێنە زەوتکەردەی ئیراڎەیچ ئاماژەش پنەکریان
ریپۆرتەرا پێوەس بە سیاسەتو زەوتکەردەی شارەوانییەکا هەدەپەی و دەم پارتیچ هۆرسەنگنایشا وستەن ڕووە و باسشا چانەی کەرڎەن کە جە گرڎو دیڎارەکاشانە چنی ئەنقەرەی ئاماژەشا پا مژاریە کەرڎەن.
