پەرلەمانتاروو هەدەپەی "ئیدر حەبیب ئەکسیک" واتش، کە مەبۊ وەراوەروو سیستموو گۊشەگێریوە بێدەنگۍ بیمۍ و داواش کەرڎە سیستموو گۊشەگێری، ئیمراڵینە دەموودەس ورگێریۊ و دماییش بۍ و گرڎوو مافەکا پەی دەسبەسەرکریایەکا بگێڵاوە.
پەرلەمانتاروو پارتی دیموکراتیکوو گەلا (هەدەپە) "حەبیب ئەکسیک" سەبارەت بە گۊشەگێرکەرڎەی ڕابەروو گەلوو کورڎی "عەبدوڵڵا ئۊجالان" و ئێشکگێری وەرڎەموو وەزارەتوو داڎینە قسێش پەی ئاژانسوو هەواڵوو فورات (ANF)ی کرد.
ئەکسیک باسیچش چانەیە کەرد، کە دەسەڵات دەستووری دایمیی ئێستێ و یاساو میاننەتەوەیی پاشێل کەرۊ، پی جۊرە گۊشەگێری سەروو ئیمراڵیرە سەپنۊ، "سی پی تی"یچ چەمێ ئاستشنە قووجنۊ. پەرلەمانتار "ئەکسیک" واتیچش، "سی پی تی، جیای ئانەی ڕا جە ئەشکەنجەی گێرۊ بییەن دەزگێوە چەمڎاریی. ئانێ گەرەکشانە ئا سیستمە نەمرۊ ئا هێزێنۍ کە پیلانگێڕی ٩ تشرینوو یووەمیشا کەرد. سیستموو گۊشەگێریی ئیمراڵی وزا وەرڎەموو چارەسەری ئاشتییانەو پەرسەو کورڎی. بەرێز "ئۊجەلان" یۊ جە کاراکتەرە سەرەکییەکاو چارەکەرڎەی پەرسەو کورڎین. پەوکای گۊشەگێرکەرڎەی بەڕێز "ئۊجەلان"ی گەورەتەرین وەربەسا وەرڎەموو ئاشتیێوە شکۊمەنڎانەی و پێوەژیوایێ یەکسانینە".
مشۊم جەم گنۊ بە عەبدوڵڵا ئۊجەلان"ی
ئەکسیک ئانەش وست ڕووە، کە کێشەو گەلاو تورکیای و وەرکەوتی دلێڕاسینی بە دیڎار جەنی وەردەنگەکا چارە بۊ و واتیچش، "وەختوو دایوساناینە دەسەڵات جە ئیمڕاڵینە دیڎارچەنی بەڕێز ئۊجەلانی کەرۊ. ئا وەخت ئاهۍ ئاماوە وەروو مەنتێقەکەیرە، ونی نەمجیا، گرڎد کەس دیش کە ژیوای جە گرڎوو ڕووەکاوە وەشتەر بۊ. پەوکای مشۊم دەموودەس گۊشەگێری ور گێریۊ و دیڎار چەنی بەرێز ئۊجەلانی کریۊ. مشۊم 'مافوو هیوای' بارەو ئاڎیوە بەڕسمی بشناسیۊ، کە مافێوە دەسووری و یاسایی میاننەتەوەیین و مشۊم بە جەسەیچ ئازاڎ کریۊ".
'با کەس چەمەڕا ئانەی نەبۊ کە ئێمە بێدەنگێ بیمۍ'
پەرلەمانتاروو هەدەپەی "ئەکسیک" واتش، کە ئامانجی سەرەکیی چالاکییەکەیشا جە وەردەموو وەزارەتوو داڎینە ئانەن، کە سەرنجەو خەڵکی پەی سەروو سیستموو گۊشەگێری ئیمراڵینە کێشا، مافەکا پەی بەڕێز"عەبدوڵڵا ئۊجەلان"ی گێڵناوە و واتیچش: "ئا پەرلەمانتارۍ نوێنەرایەتیی ئیراڎەو گەلی کەرا، بێگومان پەی چارەسەرکەرڎەی پەرسەو کورڎی و دماییئارڎەی بە کرڎەوە نایاساییا، مشۊم داواکاری ئاڕاستەو وەزارەتوو داڎی کەرا کە هەرمانەکاش جا بەجا کەرۊ. نزیکەو ٢٢ مانگان حیچ هەواڵێوە بەڕێز "ئۊجەلان"ی و زینڎانییەکای تەری نمەزانییۊ، ئانە دۊخێوە تەرسیدارا. ئی دەسەڵاتە وەرەچەماو تەماموو دنێێوە ئیمراڵینە جە ڕاو سیستمو گۊشەگێریوە ئەشکەنجە کەرۊ. بێگومان مشۊم کەس چەمەڕاو ئانەی نەبۊ، کە ئێمە وەراوەروو ئی سیستموو گۊشەگێرینە جە دژوو یاسی و مافەکاو مرۊڤی بێدەنگۍ بیمۍ، پێویسا سیستموو ئیمراڵی دەموودەس دماییش پەنە بۍ و بەتایبەتی بەرێز "ئۊجەلان" مافەکاو زینڎانییەکای تەریچ گێڵیاوە".
