پارتو ژیان و ئازاڎیی کورڎسانی (پەژاک) جە چڕیێۋەنە داواش کەرڎ، کە ھامکاری خێرا بېاۋۊ بە ۋنەقۊمېایا بومەلەرزەکەو سەرنېشتو ۋەرنېشتو کورڎسانی و ھەرپاسە تورکېاو سوریای.
جە چڕیێۋەنە پەژاک سەرەڕاو سەرۋەشی جە خانەواڎەو قوربانېا بومەلەرزەکەو سەرنېشتو ۋەرنېشتو کورڎسانی و تورکېای و سوریای ھومێڎو خاسبېەیۊیش پۍ زامڎارەکا واست.
پەژاک داواش جە گەلو ۋڵات پارێزی و مرۊڤدۊسۍ کورڎسانی کەرڎەن جە پاو یاۋناو ھامکاری بە خەڵکو ۋنەقۊمېاو سەرنېشتو ۋەرنېشتو کورڎسانی خێرا گنانە ۋێشا و ھامکاریەکاشا کېانانۍ.
دەق و چڕیەکەو پەژاکی پی جۊرەنە:
چڕیەو پەژاکی پۍ یاۋناو ھامکاری بە ۋنەقۊمېایاو بومەلەرزەکەو سەرنېشتو ۋەرنېشتو کورڎسانی.
بومەلەرزەکەو سەرسەعبو ٦ و شوباتو ٢٠٢٣ جە سەرنېشتو ۋەرنېشتو کورڎسانی، کە بی بە مەڵامەتو گېان جە دەس داو ژمارێۋی فرە جە ھامۋڵاتېا نېشتېمانپەروەری، مایەو خەمو پەژارەو گەلەکەیمانە. "پارتو ژیان و ئازاڎیی کورڎسانی (پەژاک)" سەرۋەشی جە بنەیانەو گېان بەخشایاو گەلو "کورڎی و عەرەبی و ترکی" جە سەرنېشتو ۋەرنېشتو کورڎسانی و تورکېای و سوریای مکەرۊ و ھومێڎو خاسبېەیۊ خێرای پۍ زامڎارەکا وازۊنە.
جە ئاکامو ڕوۋەداو بومەلەرزەی بەقوەتی جە سەرنېشتو ۋەرنېشتو کورڎسانی بەتایبەت جە شارو بازارجخی و دیلۊکی ژمارێۋە فرە بېنۍ ۋڕێنۍ، ژمارێۋی فرە فەوتشا کەرڎەنو زامڎارۍ بیێنۍ. چی سەرڎاو سڵێۋەو زمسانېنە و جە ۋەختێنە قەیرانو ژیۋای و کرڎەوە ستەمکارانەکۍ دۊڵەتا سەردەسی و گەلەکەما ئېنا چێرو فشاریەنە، بە ڕوەداو کارەساتۍ ۋێڕسکی پێسە بومەلەرزەی ۋنە قۊمېایا بومەلەرزەکەیش ۋەرەن ڕوو کارەساتو بژێۋی و گوزەرانی کەرڎەنۊ. بێگومان بەشێۋی فرەو ئی زەرەرە ماڎی و گېانیە دەرئەنجامو کارنامەو نامرۊیی ھەرمان بەدەساو دۊڵەتە دیکتاتۊرەکان و ئا سەرمایەدارە ۋۍ پەرستانە کە جە ڕوانگەو پارێزناو ژیۋایچۊ ستەم کەرا. دۊڵەتە باڵا دەسەکۍ کە تەنېا ۋیر جە سەرمایەو قازانجی و ۋەرڎەوامی دەسەڵاتېشا جە ڕاو زەبرو زەنگیۊ مکەراۋە، جە بوارو بېناسازیەنە سېستمێۋی تەرسناکشا بنېاڎ نېان. ئەگەر جە بوارەکاو یاۋنای و خزمەڎ گوزارېنە بە عالی ئەرکەکێشا بە یاگۍ یاۋنێنۍ، بە دڵنېایۊ زەرەرۍ بومەلەرزەکەی جە ئاکامو بێسەروبەری و خراپی بېناسازی کەمتەرۍ بێنۍ.
جە ئاژێۋەنە کە ماۋەو چن ڕوۋا ۋیەرڎەینە جە شارو خۊی جە ۋەرکۊتو کورڎسانی و ئارۊیچ جە سەرنېشتو ۋەرنېشتو کورڎسانی بومەلەرزە ڕوۋەش دا، جە دلۍ ڕاسەو زمسانیەنە بۍ یانە بۍ جاو ڕاو گەلەکەېما مایەو خەمو پەژارەین. ھەر پۊکەی "پارتو ژیان و ئازاڎیی کورڎسانی (پەژاک)" داوا جە گەلو ۋڵات پارێزی و مرۊڤدۊسا کورڎسانی کەرۊنە پۍ یاۋناو ھامکاری بە گەلە بێبەشکریاکەیما جە سەرنېشتو ۋەرنېشتو کورڎسانی خێرا گنانە ۋێشا . تەنیا بە پەشتېوانی گەلەکەیما پۍ ۋنە قۊمېایا بومەلەرزەکەی متاومۍ ئی ئاژە دژوارەیە ۋیەرنمۍ. پەژاک جارێۋەتەر سەرۋەشی جە بنەیانەو قوربانېا بومەلەرزەکەی و گەلو کورڎی و گەلو تورکېای و سوریای کەرۊ. پاڵپەشتی و ھەوڵەکاو گەلەکەیما جە ۋەرکۊتو کورڎسانی و ئۊروپا ی متاوۊ یاردی دەربۊ پۍ ساڕێژکەرڎەو ئێش و ئازارەکاو ۋنە قۊمیایا بومەلەرزەکەی.
پارتو ژیان و ئازاڎیی کورڎسانی (پەژاک)
ھ.ش
