پەژاک بۆنەو ٢١/٢/٢٠٢٥ ی ڕۊو جەهانی زۋانی ئەڎاییوە، ئەرەیاۋنێوەش وەڵا کەرڎۆ و ئی ڕووەشە جە گەلوو کوردی و گرڎوو مرۆڤایەتی پیرۆز کەرد و ئەرەیاۋناش: "ئەوەکۊشای پەی ۋەنای و فێربیەی بە زۋانی ئەڎایی، مانا بە ئەوەکۊشای ئازاڎیی مڎۆ."
مەجلیسو پارتو ژیۋای ئازادی کوردەسانی (پەژاک) بۆنەو ٢١/٢/٢٠٢٥ ڕۊو جەهانی زۋانی ئەڎاییوە ئەرەیاۋنێوەش وەڵا کەرڎۆ. پەژاک ڕۊو جەهانی زۋانی ئەڎاییش جە گرڎو گەلا ستەم ۋنەکریای بەتایبەت گەلوو کوردی پیرۆز کەرد و داواش جە گرڎو گەلوو کوردی کەرد کە پەی پارېزنای زۋانی کوردی ئەوەکۊشایشا بەرز بکەراوە و ئەرەیاۋناش: "پەنەوازا گرڎو یانە و شۊنێوە پەی پارېزنای زۋانی کوردی و فێرگەو زۋانی کوردی بکریۆ بە وەننگە. ئینە تەنیا ڕانە پەی ڕزگاربیەی جە ستەمی و چەوەسنایۆ نەتەوەیی و کولتووری."
جە درێژەو ئەرەیاۋناکەو پەژاکینە بە نامونیشانو "ئەوەکۊشای پەی پەروەردەی بە زۋانی ئەڎایی، مانا بە ئەوەکۊشای ئازاڎیی مڎۆ و زەریفیش پنەبەخشۊ" ئامان:
"٢١و شوباتی پېسە ڕۊو جەهانی زۋانی ئەڎایی ئشناسیان. گەلوو کوردی جە دنیاو ئارۊینە بە پارېزنای زۋانی زگماکی ۋێش کولتوورو ۋێش پارېزنان، بەڵام هەڵای ڕووبەڕوو قڕکەردەی کولتووری بیەنۆ. جەنگو پارېزنای زۋانی کوردی پەی کوردی تەنیا ڕێوەنە پەی پارېزنای بیەی و پووچکەردەیۆ قڕکەردەی کولتووریی.
سیاسەتو هەر چوار حکوومەتو ئێران، تورکیا، عێراقی و سووریای ۋەرا ۋەر بە کوردی و قەڎەغەکەردەی ۋەنای بە زۋانی ئەڎایی، سەرو بنەماو پارادایمو شۆڤێنیستییا کە ئینا هەوڵی ئانەینە یەک زۋان، یەک نەتەوە، یەک کولتوور، یەک تاریخ و یەک ئاڵای سەپنۆنە. زیاڎ جە سەدێوەنە ئی ستراتیجە گڵیا و شۆڤێنی و ڕەگەزپەرەسیە ۋەرا ۋەر بە گەلوو کوردی بەکار مارا. گومانش چنە نیا کە ئارۆ گەلوو کوردی پەی پارېزنای زۋانی کوردی و پەروەردە کەردەی ئینا ئەوەکۊشایۍ بێوێنە و فیداییانەنە. زۋانی کوردی، بیەیۍ کولتوورییا، کە چا ڕێوە متاویۆ تەمامو میراتی تاریخی پارېزیۆنە، بوچیۆ و بە جەهانی بشناسیۆ. وەش بیەی جەهانێوە دیموکراتیک بەبێ مافو ۋەنای بە زۋانی ئەڎایی محاڵا. پۊکەی قەڎەغەکەردەی مافو ۋەنای بە زۋانی ئەڎایی سەرو بنەماو سیاسەتو ئاسیمیلاسیۆنی(تاونایۆ) مەبۆ بە مەڵامەتوو دلېنەشیەی یاساو ناوچەیی و جەهانی.
زۋانی کوردی یۊن جە ڕەهەندە بنەڕەتییەکا بیەی و مەنەیۆ گەلوو کوردی، کە جە لایەنو دەسەڵاتداراوە بە گرڎ جۊرێوە نکۆڵیش ۋنە مکریۆ و جە لایەنو حکومەتە هەژموونگەرە جەهانییەکاوە حیچ ڕاگیریێش چنە نەکریان. بە قەڎەغەکەردەی ۋەنای بە زۋانی ئەڎایی، مافو ژیۋای ئازادی گەلەکەیما پاشێل کریان. پۊکەی ئەوەکۊشای پەروەردە بە زۋانی ئەڎایی ئەوەکۊشای ئازادیی ماناڎارتەر و زەریفتەر مکەرۆ.
ئارۆ گەلوو کوردی بە ئەوەکۊشای و فیداکاریی بێوچانو ۋێشۆ جە قۆناغو قڕکەردەی فیزیکی ڕزگارش بیەن و کاتو ئانەی ئامان کە بە ئازادیی یەکجارەکی دمایی بە سیاسەتو قڕکەردەی کولتووری دژمنا بارۊنە. بە دڵنیاییوە سەپنای "زۋانی ڕسمی" جە لایەنو دەسەڵاتە فاشیستەکاوە، گەلا چېردەسەو ۋەرکۊتوو مېیامینی جە دەرفەتو وەشکەردەی گلېرگېوە ئازادی بێبەش کەردەن. گلېرگەی ئازاد ئا گلېرگەنە کە بتاوۆ جە ڕاو هونەر و ئەدەبیاتیوە ئشناسنامەو کولتووری ۋێش وەڵۍ وزۆ و زەریفیش پنە بەخشۆ. پۊکەی سەپنای زۋانی ڕسمی دۊڵەتا دەسەڵاتداری سەرو نەتەوە چېردەسەکارە نمایندێوە ڕۊشنو قڕکەردەی کولتوورییا. چی جەهانە دەسکردەو ۋێشانە، گرڎو دۊڵەمەڼیە کولتوورییەکا گلېرگەکا دلېنە بەرا و ماف بە زۋانی ئەڎایی گەلێوە نمەڎۆ. پۊکەی ئی مافە تەنیا بە ئەوەکۊشای سەرەمڕۆ بەدی مۍ.
مەجلیسو پارتو ژیۋای ئازادی کوردەسانی (پەژاک) سەرەڕاو پیرۆزبایی ڕۆو جەهانی زۋانی ئەڎایی جە گرڎو گەلا چېر دەسەی بەتایبەت گەلوو کوردی، داواش جە گرڎو گەلوو کوردی کەرد کە پەی پارېزنای زۋانی کوردی ئەوەکۊشایشا بەرز بکەراوە و ئەرەیاۋناش: "پەنەوازا گرڎو یانە و شۊنێوە پەی پارېزنای زۋانی کوردی و فێرگەو زۋانی کوردی بکریۆ بە وەننگە. ئینە تەنیا ڕانە پەی ڕزگاربیەی جە ستەمی و چەوەسنایۆ نەتەوەیی و کولتووری. هەرپاسە قسەکەردەی بە زۋانی ئەڎایی ئەرکێوە بنەڕەتییا پەی هەر تاکێوە جە پارېزنای زۋانی کوردینە و چا چوارچێوەنە مافە کولتوورییەکاما پارېزنمۍ و گەشەش پنە بڎەیمۍ. پارېزنای زۋانی کوردی یۆن جە ئازادییەکا گەلەکەیما. بژیۋۆ گلېرگەی ئازاد."
