ئەندامو دەسەو ڕاوەبەری کەجەکەی خەبات ئاندۆک و ئەندامو کۆردیناسیۆنو جەمەکا جوانا ئۆزگور شەڕکەر، کە بەشدارییشا جە بەرنامەی تایبەتی ستێرک تیڤینە کەردەبۍ، جە بارەو ۋەنایۆ پارێزنامەکاو رابەرو گەلوو کورڎی عەبدوڵا ئۆجالانی جە فرەو ناوچەکا جیهانینە و کاریگەری ئاڎیی سەرو گلێرگەی هۊرسەنگنایشا کەرڎ.

ئەندامو دەسەو ڕاوەبەری کەجەکەی خەبات ئاندۆک باسش چانەیە کەرڎ، کە جە چوارچێوەو هەڵمەتەکێنە جە فرەو وڵاتا جیهانینە پارێزنامەکۍ عەبدوڵا ئۆجالانی ۋنیاوە و پی جۆرە بەردەوام بی: "رابەرایەتی جە ئاکامو پیلانگێڵنیۍ مېیاننەتەوەیینە کە بە دەیان وڵاتۍ چنەشەنە بەشدارۍ بێنۍ گیریا و رادەسو دۆڵەتو تورکی کریاوە. رابەرایەتی جە سیستەمو ئیمراڵینە کە جە لایەنو هێزە سەرمایەدارییەکاوە بنیاڎ نریا، ٢٥ ساڵێن ئینا چێرو گۆشەگیریێوە دژوارینە. دماو بەش بەشکەرڎەی کورڎەسانی پەی چوار پارچا پلانەو قڕکەردەی جە دژو گەلوو کوردی وزیا بوارو جابەجێ کەردەیۆ. رابەرایەتی کۊشش کەرد کە گەلوو کوردی چێرو چنگەو قڕکەردەینە رزگار بکەرۆ. ئارۆ جە جیهانەنە جە گەورۆ پەی گولانەی گرڎ باس جە کورڎەسانی و مڎرامانوو گەلوو کورڎی مکەرا. ئانەیچ بە ئەرەکۊشای و رەنج و مانیایی رابەرایەتی و گەشمەرڎا ئاما ئاراوە.

گەلوو کوردی بۆنەو ۋێش و ئشناسنامەکەیشۆ ئەرەکۊشۆ، ئانەیچ ئاکامو ئەرەکۊشای رابەرایەتیا. ئارۆ رابەرایەتی نوێنەرایەتی کورڎەسانی و کورڎی ئازاڎی مکەرۆ. ئەگەر رابەرایەتی نەبیۍ، نە پەکەکە و نە کورڎی ئازاڎیچ نەبێنۍ. ئاشکران کە چنی کورد بیۍ بە هیواو گرڎوو مرۆڤایەتی. رابەرایەتی دژو سیستەمو دەسەڵاتداری پیای و نەتەوە دەوڵەتی، نوێنەرایەتی سیستەمی دادپەروەرانەی، دیموکراتیک، یەکسانی و ئازاڎیی مکەرۆ. رابەرایەتی جە دژو پیلانگێڵنی خاوەن زانابیەیۍ فرە قەوەتین و جە ئیمراڵینە پارێزنامەکێش سەرو بنەماو تاریخی، فەلسەفەی و ئەقڵیەتی قووڵی هۆرمسەنگنۆ. چا پارێزنامانە ۋەرگری جە کوردی، ۋەرکۊتوو مېیامینی و گرڎو مرۆڤایەتی کەرڎەن. دژو سیستەمو هیرارشیکی و دەوڵەت پارێزنی ژەنی، گروپە ئیتنیکیەکۍ و گەلا چێردەسەی و چەوەسیایش پارێزنێنۍ.

بە شێوۍ گرڎین گرڎو ئا گلێرگاشە پارێزنۍ کە جە لایەنو هێزە دەسەڵاتدارەکاوە کۆیلۍکریێنۍ. رابەرایەتی پارێزنامەکۍ ۋێش پېسە مانیفیستی مەدەنیەتی دیموکراتیکی پێناسە کەردۍ. هەرپۊکەی ئارۆ فرەو ناوچەکا جیهانینە گەل ئا پارێزناما موواناوە، خاوەنداری جە رابەرایەتی مکەرا، داواو ئازاڎیی جەستەیی مکەرا و پەی ئانەیچ ئەرەکۊشا. مانیفیستۆو هیرارشی دیموکراتیکی کە رابەرایەتی جە دژو دەوڵەتی و سیستەمو دەسەڵاتداری پیای وەڵێش وستەن، نەک هەر پەی کوردا، بە گرڎی پەی تەمامو مرۆڤایەتین.  پەی گەلا چێردەسەی مانیفیستۆو مرۆڤی ئازاڎی و ژیۋای ئازاڎین. جە پاڕێزنامەکانە باس مکریۆ کە ژیۋایۍ دیموکراتیک و پێوەس بە بەها کۆمەڵایەتیەکاوە، چنی وەش مکریۆ".

'مشۆم قورسایی وزمۍ سەرو بەدیئاورڎەی و دەسەبەرکەرڎەی ئازاڎیی بەڎەنی رابەرایەتی'

خەبات ئاندۆک دەسنیشانش کەرڎ کە پارێزنامەکۍ رابەرو گەلوو کورڎی عەبدوڵا ئۆجالانی، سەرچەمەو حەقیقەتینۍ و جە درێژەو قسەکاشەنە واتش، "جە چوارچێوەو ئا هەڵمەتێنە کە پەی ئازاڎیی بەڎەنو رابەر ئاپۆی دەسشپنەکریان، جە گرڎو ناوچەکا جیهانینە پارێزنامەکۍ موونیاوە. ئانۍ پارێزنامەکا موواناوە مشۆم سەرەتا چانەی بیاوانە. رابەرایەتی رابەرێوە چنینا، چی دژمن پا حەدە چنەش متەرسۆ، پەیچێشی ئانڎە دژمنش هەن؟ کاتێ مژارەکە مبۆ بە رابەرایەتی، یاسا، سیاسەت، ئەخلاق، ویژدان و مرۆڤایەتی، پەی چێشی گرڎو جیهانی جە دژو ئاڎی یۆ مگێرۆ؟ چی پەی گێرتەی رابەرایەتی ئا گرڎ هێزۍ کۊتۍ ئامادەباشیۆ؟ سەرەڕاو نەبیەی بێدەرفەتی، رابەرایەتی چنی متاوۆ سەرو ئاستی مېیاننەتەوەیی پا حەدە کاریگەر بۆ؟

ئا کەسە کە پارێزنامەکا موانۆوە، موینۆ کە ڕابەرایەتیی چندە ئازادا،چندە هومێدی بە گەلی مبەخشۆ و چندە تەرسی موزۆ دڵوو دوژمنیوە پەوکای وەختێو پارێزنامەکاش موانیوە مشۆمبزانمێ کە ئێمە چە حەقیقەتێوە موانمێوە  ڕابەراایەتی بە پارێزنامەکاش ڕاو ئازادیی نیشانە مدۆ، ئینسان چەنی قەوەت بۆ دژوو دوژمنی مجەنگیۆ، چەنی مبۆنە بە هامڕا و چەنی نوێنەرایەتی ئینسانێوی ئازادی مکەرۆ گلێرگەی ئازاد چەنی مخولقیۆ پەوکای پارێزننامە شۆڕشوو عەقڵیەتین،مشۆم وانایۆ پارێزنامەکا تەنیا چوارچوەو هەڵمەتێنە نەبۆ،من بە ڕێزۆ سڵام وەنەو گردوو ئا کەسا مکەروو،کە چا چالاکییانە بەشدارێ بێنێ، وەلێ مشۆم زیاتەرێ با.

هەڵبەت ڕابەرایەتی  ئینا دلێ گۆشەگیریێوە فرە گەورە و سیستموو قڕکەردەینە مکۆشیۆوەلێ ئەندێشەو هۆش و هەستەکێش ئازادێنێ،سیستموو سەرمایەداری و نەتوەو دەوڵەت هەرگیز سەروو ڕابەرایەتیوە کاریگەرییشا نەنیانرە.  وەلێ وەروو ئانەیە  گرد لاێوە و ئێمەیچ چا بەینەنە ئاستی جیا جیانە،کاریگەری سیستمو هیرارشیکی دەوڵەتپارێزنییش سەرماوە بۆ، تا حاسێوە نوێنەراتیەتییش مکەرمێ، سەروو ئا بنەمێ ئێمە پەنەوازییما بە ئازادی مبۆ. وەلێ رابەرایەتی پێویسیش پەنە نمەبۆ وەلێ کەسێوە پێسەو ڕابەری نمەبۆ زیندانەنە بمەنۆوە. پەوکای مشۆم ئێمە دوژمنی ماڕمێ. چا بوارەنە قورسایی بوزمێ سەروو بەدیئاردەی و دەسەبەرکەردەی ئازادیی جەسەیی ڕابەری."

'گەلوو کوردی جەنگ و مەنەی و نەمەنەی مکەرۆ'

ئەنداموو دەسەو راوەبەریی کەجەکەی خەبات ئاندۆک واتش، "ئامانجوو رابەری بنیادنیای ژیواێوی تازەین، گلێرگێوە نەوی و ئازادین" و واتش" هەڵبەت پێسەو جمیەری و پارتی و ڕابەرایەتی ئێمەیچ ڕابەرایەتی بە بنەما مگێرمێ هەوڵێ مدەیمێ ڕاسیی رابەرایەتی جە ژیواینە، جە پەیوەندی و خەباتمانە ڕەنگە بدۆوە بە عەمەلی بکەرمێش، تەنیا پانەیچۆ وێما سنووردار نەکەرمێ، ڕاسا پەکەک پارتوو کادیران، دەور و وەرپەرسییما هەن، کە ئێمە گەلوو کوردی چنگە و پەنجێ قڕکەردەینە نەجات مدەیمێ، هەوڵێ مدەیمێ واوەی گەلوو کوردی بخولقنمێوە، چا سیستموو کولتووری و فیوداڵی و سەرمایەدارییە نەجاتش بدەیمێ، ئانە هەرمانە و وەرپەرسییمانە،سیستموو کەجەکەی ئینەنە. پێسەو کادیرەکاو پەکەکەی ئێمەیچ پێسەو گرد لاێوە ڕابەرایەتی و حەقیقەتیش موانمێوە،ئاندە جە ڕابەرایەتی بیاوینە،متاوی نوێنەرایەتییش بکەری، وەختێ وێما موزمێ وەڵێ ڕووە مکەرمێنە گلێرگەینە، گەرەکمانە چوارچوەو نەتەوەی دیموکراتینە، فاڕیای و ورچەرخیای بسازنمێ.

ڕابەرایەتی نەک هەر هینوو کوردسانی، بەڵکوم هینوو گردوو گەلین، وەلێ کێشەو گەلوو کوردی و گەلای تەری جیاوازا، پەی نموونەی قۆرتە کۆمەڵایەتییەکاو گەلا جیاوازێنێ، وەلێ کورد کێشەو بییەیش هەن. یانێ ئەگەر گەلوو کوردی چند ساڵێن ئینا چێروو هەڕەشانە، وەلێ هجووموو قڕکەردەی وەراوەروو گەلوو کوردی نەک حەر جە ڕووەو کولووتریوە هەمان وەختەنە هجوومی جەسەییچش هەن. سەدەو ٢٠یسینە تەنیا سەرنیشتەنە سدەان گەزار کوردێ کوشیێنێ، چوارپارچەو کوردسانینە گەلوو کوردی هەڕەشێ قڕکەردەی جەسەییش ئینا سەرۆ، دەوڵەتی ئەرەگیروو تورکی بە هامکاریی هێزەکاو مۆدێرنیەتی سەرمایەداری، چا وەختەوە کە هجوومو جەنگی یەرەموو جیهانی ڕووە مدۆ، ئیسفادەش چەنە ورمگێرۆ، گەرەکشا ڕێخەو گەلوو کوردی هورمتەکنۆ. گەلوو کوردی کێشێ جیاجیێ فرێش هەنێ. بەڵام گرنگتەرین پەرسەپارێزنای بییەیشا. مشۆم جە ڕووەو جەسەییوە، جەسەو وێش و وەڵاتەکەیش بپارێزنۆ. گەلوو کوردی ئیساتێنە ناچار بە کۆچبەری مکریۆ، بە سیاسەتی جیا جیا کوردسانی ماڵۆرە جە خەڵکەکەیش. پەی نموونەی ئانێ جە چوارچوەو سیاسەتوو قڕکەردەی و جینۆسایدینە مکریا، گەلوو کوردی مشۆم دژوو ئانەیە گرد مەیدانێوەنە وێش بپاریزنۆ".

'هاموەخت چەنی هەڵمەتەو میانەتەوەییە سەروو ئاستوو جیهانی واتەواچ بارەو پارێزنامەکاوە مکریۆ'

ئۆزگور شەڕکەر ئەنداموو کوردیناسیۆنوو کۆمەڵەکاو گەنجا، ئەوەڵوو قسەکاشنە، سڵامش وەنەو مدرامانوو ڕابەروو گەلوو کوردی کەرد، ئیمراڵینە و ئاماژەش پانەیە دا کە بەهەڵمەتەو "ئازادیی پەی عەبدوڵا ئۆجالانی و چارەسەر پەی کیشەو کەردی" کە جە ١٠و مانگەو تشرینو یوەموو ٢٠٢٣ دەسش پەنە کەرد،  پارێزنامەکێ سەروو ئاستوو جیهانی قسەوباسش سەر مکریۆ، ئۆزگور شەڕکەر ئاماژەش پانەیە دا، کە دماو پیلانگێڵنی میاننەتەوەیی ئۆجالان مدرامانێوە کلاسیکییش نەکەرد و واتش:" پارێزنامەکێ دەرەنجاموو مدرامانی گەورەو ڕابەر ئاپۆینێ ئیمراڵینە، پارادایموو ڕابەر ئاپۆینە پەرسەکاو دەوڵەتی، دیموکراسی، سیاسەت، کۆمەڵشناسی، ژەنی و گەنجێ بەوردی هورمسەنگیا، بێگومان ئینێ بابەتێ گرنگوو پارێزنامەکانێ.

وەختێ دەسەڵاتدارێ و هێزەکاو سەرمایەداری تەماشەو کوردستانی مکەرا و کەسانێوە موینا، نەوتێ موینا کەسانیوە موینا کە گەرەکشانە بکەرانێشا بە کۆیلێ وێشا، وەلێ وەختێ تەماشەو سەرۆکایەتیی کوردسانی مکەرا،بێشکێ وێشا موینا، دۆڵەمەندیی بەها ئینسانییەکا موینا، سەرچەمەو کولتووری و ڕەسەنایەتی موینۆ، کاتێ دەسەڵاتدارا پېسە ڕۆبۆتی تەماشەو ئینسانی مکەرا، ئیتر ڕۆبۆت ئینا گرڎ شۊنێنە ئیتر پەنەوازشا بە ئینسانی نییە. ئاڎۍ ئینسانی جە ئینسانیەتی دور موزاوە. بەڵام ڕابەر ئاپۆ بە پرۆسێوە کە مرۆڤایەتی جەکەسایەتی گەلوو کورڎینە مافەکێش پاشێلکریێبێنۍ بەرئاوردەیۍ گۊرەش دەس پنەکەرڎ، گۊرەتەرین بەڵگە پەی ئینەی بە هەزاران پەڕۍ پارێزنامەکاشەنۍ.

بڕۍ وەختۍ ماچمۍ ئەنەیاوای جە پارێزنامەکا فرە قورسا و بڕۍ وەختێچ ماچمۍ ئاسانا، نە ئاسانێنۍ و نە قورسێنۍ. ڕابەر ئاپۆ بەهەزاران پەڕێش نوویستێنۍ و دەیان هەزار پەڕێش ۋەنێنێوە و ئەوەکۊڵیایش سەر کەرڎێنۍ پەی ئانەی ئا هەزاران پەڕەیە بنویسۆ. زیاڎ جە ٢٠ هەزار کەسایەتیا شۆڕشگێڵنی و مرۆڤێش پەروەردە کەرڎێنۍ. واتە پارێزنامەکێش جە ئەنجامو ئی سەنتێزانە بەرهەم ئامان. پۊکەی مشۆم بە شێوێوە قووڵ چی پارێزناما بیاومێنە. ئانەی گرنگا ئانەنە کە ئێمە چن بە قووڵی ئەوەکۊڵیای جە پارێزمەکا مکەرمۍ. گرنگا تا چن چا پەیلوای و جیاوازییا بیاومێنە کە ڕابەر ئاپۆ جە نوویستەکاشەنە بەرجەسەش کەرڎەن. چونکی تا چنە عالتەر بیاومێنە، زووتەر حەقەتینەکێما پەی بەرۍ گنا."

'پارێزنامەکۍ سەرۆکایەتی بانۍ بە ڕۊشنایی پەی مرۆڤایەتی'

ئۆزگور شەڕکەر ئەندامو کوردیناسیۆنو جەمەکا جوانا ئاماژەش پانەیە کەرد کە نەک تەنیا جوانا کورڎەسانی و ۋەرکۊتوو مېیامینی جە ٢٤ وڵاتاوە جوانۍ بەشدارییشا جە کۆنفرانسو جوانانە کەرڎ و واتش: "جە گفتوگۆکا کۆنفرانسەکەینە ئاڼەی شۊنیرەلوایما پەی کەرڎەن هەوڵێوە ۋەرفراوان پەی ئەنەیاوای جە ویرۆکەکا ڕابەر ئاپۆی دریان، جە فرەو وڵاتانە جوانۍ و ژەنا باس سەرو ڕابەر ئاپۆی و ویروڕا و پارادایمەکاش مکەرا. هەر جە سەرنیشتوو ئەفریقایۆ تا ئەمریکای لاتین، ئی ویرۆکە کاریگەریش سەرو گرڎو گەلا هەن. ئێمە ۋێما پانەیۆ سنووردار نمەکەرمۍ و مەواچمۍ وەسێن، بێگومان دژمن هەرچیێوە بکەرۆ نمەتاوۆ فشار بوزۆنە سەرو هێز و تواناکا سەرۆکایەتی. ڕاسا ئارۆنە سەرۆکایەتی بەینو چوار دیوارانا دەسبەسەر کریان. مشۆم جوانۍ کورڎی ئانەشا یاڎەنە بۆ ئا ژورەی ڕێبەرایەتیش ئینا چنە ٣پەی ٦ مەترا مبۆ و یاگۍ ئیسراحەتیش نییەنە، ڕوانە ئیمرالینە هرووژمی دەروونی مکریۆ، جەنگێوە تایبەت ئینا ئارانە، هێزە مېیاندەوڵەتییەکۍ دەسشا گرڎو ئا ئاژەو ئیمرالینە هەن و ڕوانە فشار و دڕندەیی جە دژو سەرۆکایەتیما ڕاوەبەر مکەرا.

دژمن ئاژێوە چامنەش خوڵقنان. بەڵێ هێزو ڕابەر ئاپۆی جە هەلومەرجێوە چامنە سەختەنە سەرهۆرمڎۆ. لاو ڕابەر ئاپۆیۆ دیوارەکۍ ئیمرالی نەبیێنۍ بە ۋەربەس چانەی درێژە بە ئەرەکۊشای  و مڎرامانی بڎۆ، ئارۆ هێز و قەوەتو ڕابەر ئاپۆی بە گرڎوو دنیێرە وەڵابیەنۆ. ئایدۆلۆجیاو ڕابەر ئاپۆی جە ئاکامو هەوڵ و ئەرەکۊشایۍ گۊرەینە سەرش هۊردا. دژمن هەمیشە ماچۆ پەکەکە ئینا گرڎ شۊنێنە، جە ژاپۆن، پانیشتوو ئەفریقای. ماچۆ، جە هەر شۊنێنە با، پەنەوازا قەڎەغەشا بکەرمۍ. جە حەقەتینەنە جە سەیەو ئەرەکۊشای و مڎرامانی بێ وێنەو ڕابەر ئاپۆی، پەکەکە جە گرڎ شۊنێنە وەڵاو مبۆوە. دژمن موینۆ کە هێزێوە گۊرەی ئایدیۆلۆژی بیەیش هەن. سەرۆک ئاپۆ ماچۆ: "جە گلێرگەکا دنیێنە گەمژەیێوە فیکری هەن". سیستەم کەسانێوە خوڵقنۆ کە مەژگ و زێڵێشا بەکار نمارا. جە ۋەرا ۋەرو ئینەینە پارێزنامەکۍ ڕابەرایەتی بانۍ بە مەڵامەتوو ڕۊشنای و ئازاڎیی پەی مرۆڤایەتی.

ئینەیچ سەرنجو مرۆڤەکا کێشۆنە. پۊکەی گەلوو ئەفریقای پانیشتی ماچا مشۆم کۆنفیدرالیزمی دیموکراتیک جە وڵاتەکەمانە ئەرەمەرزنمۍ. کاتێ گەلوو کەتەلۆنیای پارێزنامەکاو سەرۆک ئاپۆی موانۆوە، ماچا ئینە پەیلواو ئێمەیچا و چێگەنە قیمەتی مرۆیی هەن. پی مەڵامەتیچۆ دەوڵەتو تورکی گۆشەگیریی سەرو ڕابەر ئاپۆی زیاتەر مکەرۆ بەڵام هەرچێوۍ بکەرا نمەتاوا ڕا جە ویرۆکە و ئایدیۆلۆژی سەرۆکایەتی بگێرا کە جە سەرانسەرو جیهانینە ئینا وەڵاو بیەیۆینە. کەواتە هەرچڼە دژمن جە سەرۆکایەتی متەرسۆ، بەڵام  گەل بە وەشەسیای، سۆز و متمانەی فرۆ سەرۆکایەتی جە ئامێز مگێرا. پۊکەی ئێمە دڵنیێنمۍ کە ئایدیۆلۆژی سەرۆک ئاپۆی ڕۆ دماو ڕۆی ئینا گەشەکەرڎەینە و وەڵا مبۆوە. هەرپاسە بێگومان ئەرکی سەرەکی چێگەنە گنۆ ئەستۆو ئێمە."

'جە ئەرەکۊشای ئازاڎینە سەرەکیتەرین ئەرک گنۆ سەرو جوانا و ژەنا'

ئۆزگور شەرکەر ئاماژەش پانەیچدا کە گرنگتەرین ۋەرپرسیاری جە ئەرەکۊشای ئازاڎیی کورڎەسانینە گنۆ سەرو شانا ژەنا و جوانا و جە درێژەو قسەکاشەنە واتش: "تەنها واچمۍ من ئاپۆیینا، من جوانەنا وەسۍ نییا. ئینە چڼە پەی ئێمە ڕەوان، ئانڎەیچ پەی گرڎوو جوانا کورڎەسانی ڕەوان. چونکی نمونەو جوانا دلۍ پەکەکەی جە هیچ شۊنێوە دنیێنە نییا. جە تاریخەنە تا بە ئارۆ ژەنی و جوانۍ سەرمەشقۍ جە هیچ جمیەرێوە شۆڕشگێڵنانەنە ئڼەو ڕیزەکا پەکەکەی نە وینیێنۍ. ئینەیچ جە سەیەو ئایدۆلۆژی ڕابەر ئاپۆیۆ سەرشهۊردان. ئارۆ تورکیانە پارتە سیاسییەکۍ فرێنۍ، جە سەیەو ڕابەر ئاپۆینە گەشەشا کەرڎەن. مافو ژەنا و جوانا دیاری کریان. ئاڼەی کە سەرۆکایەتی بیەن بە مەڵامەتوو فاڕیای جە گلێرگەو کوردینە، بەهەمان شیوەیچ بیەن بە مەڵامەتوو فاڕیای جە گلێرگەو تورکیچەنە. هەر ۋەرو ئی مەڵامەتیە پەنەوازا ئێمەی کورڎ و جوانا کورڎی عالتەر چانەی بیاومێنە و بەها و قیمەتش بزانمۍ.

ڕۆزا لوکسەمبورگە بە لینینی ماچۆ مشۆم جوانۍ بە شێوێوە جیاواز بە ڕێکوستەی بکریا، بەڵام لینین ماچۆ ئەگەر شۆڕش ئەنجام بڎەیمۍ کێشەو ژەنا و جوانا چارەسەر مبۆ. بەڵام سەرۆک ئاپۆ بەهوشیاریێوە بەرزۆ سەرو ئا پیمانەیرە ۋییەرڎ و سەرەو نخونش کەرد. مرۆڤ تا زیاتەر ئەرەکۊشای بکەرۆ زیاتەر مبۆ بە کۊششکار و لایەق بە ڕابەر ئاپۆی، ڕابەر ئاپۆ تەنیا بە پەیلوای و هەزاران پەڕۍ جە پاراێزنامەکاش نییا کە کاریگەریێوە چامنە گۊرەش وەشکەرڎەن بەڵکم پێگە، ئەرەکۊشای و مڎرامانەکێچش سەرچەمەو هێزی و فاڕیاینۍ. بڕۍ کەسۍ ماچا فاشیزم هەن، ئێمە نمەتاومۍ هیچ بکەرمۍ، مشۆم پاسیڤۍ بیمۍ و ۋێما بێدەنگ بکەرمۍ. بەڵام ئاپویی بیەی جیاوازا و جە دژو زوڵمی و چەوەسیایۆ مڎرامان و ئەرەکۊشای مکەرۆ.

جە تورکیانە ڕۆژەڤێوە چامنە هەن کە ئینسان شەرم مکەرۆ تەماشەشا بکەرۆ. هیچ کەسێک نییا بواچۆ زاوڵێوە ٨ساڵان چێشش سەر ئامان. ئینە چنی ڕوەشدا جە ئاکامو چ عەقڵییەتێوەنە یاوان پی ئاژەیە، بێگومان دەرەنجامو عەقڵیەتو ئاکەپە  مەهەپەین، سیستەم و دەوڵەتی ٥٠٠٠ ساڵەین، ڕابەر ئاپۆ جە ۋەرا ۋەرەنە  ئەڵتەرناتیڤێوەش متەنەرە ئەگەر ئارۆ گۆشەگیریێوە پاسە قورس جە دژو سەرۆکایەتی هەن ئانە یۆ چا مەڵامەتانە. ئەگەر وەربەسەکۍ نەبیێنۍ و سەرۆکایەتی بەئاسانی تاوابیێش دەورش گێڵنابیۍ، تاوۍ بەکاریگەرییەکاش کێشەکا چارەسەر بکەرۆ و کەس نەتاوۍ گلێرگەی پەی بەرژەوەندیە گڵیاوەکاش بەکار بارۆ، ۋێش ورەشۆ یان بازرگانی بە مرۆڤەکاوە بکەرۆ. پۊکەی پېسە جوانا پەنەوازا ۋیرۆکەکا سەرۆکایەتی جە ژیۋایمانە جابەجێ بکەرمۍ. چی پرۆسەنە ئەرکو سەرەشانا ئێمەی جوانان کە بەشداریێوە کارا بکەرمۍ چا هەنگامێنە کە پەی ئازاڎیی جەستەیی ڕابەر ئاپۆی دەسشپنەکەرڎەن ئەگەر بە عالی ئەرکەکاما بە یاگۍ بیاونمۍ متاومۍ بواچمۍ ئێمە فیدایۍ ڕابەر ئاپۆینمۍ."