جەمۍ ڕۆنامەنوویسۍ سەرو داواو ڕۆژنی و دەسوەڵێوستەی ڕۆنامەنوویسا کورڎەسانی بۆنەو ڕۆنامەنوویسا گوڵستان تارۍ و هێرۆ بەهادینێوە کە جە لایەنو دۆڵەتو تورکیوە گەشمەرڎې کریۍ، یاوۍ سلێمانی. شاندەکە پەی ماوەو یەرۍ ڕووا جە شارەکەنە گلېرۆبیەی ئەنجام مڎا.
سەرو داواو ڕۆژنی (ڕۆنامەنوویسا ژەنا کورڎەسانی) و دەسوەڵێوستەی ڕۆنامەنوویسا کورڎەسانی بۆنەو گوڵستان تارۍ و هێرۆ بەهادینێوە، کە ٢٣ۍ ئابینە جە ئاکامو هرووژمېوە درۆنی دۆڵەتو تورکی ئەرەگیرینە سەرو ڕاو سەیسایەق- سلێمانینە بەئامانج گیریۍ، جە ئۆروپاوە جەمۍ ڕۆنامەنووېسۍ سەردای سلێمانیشا کەرڎ.
شاندەکە کە پێکئامان جە ڕۆنامەنوویس ئالیجە ماگارە، ئێمما ئاودریە، دلێر ئاکرێی، هەندرێن فەرەج محەممەد، ژاڵان زیاعیە و دەڤریم ئاڵپە پەی ماوەو یەرۍ ڕووا جە شارو سلێمانی سەردای لایەنەکا مکەرا.
شاندەکە سەردای کۆمپانیاو چەتر پرۆدەکشنی شۆنەماو کۆششو گوڵستان تارۍ و هێرۆ بەهادینۍ، بنەیانەو هێرۆ بەهادینۍ، شۊنەماو کۆمکوژییەکەی و سەردای ڕێبین بەکری کە جە کۆمکوژیەکەنە زامڎاربیەن مکەرا هەرپاسە، قەبرەو هێرۆ بەهادینی و ئا مۆنۆمێنتەی کە پەی گوڵستانۍ و هێرۆی وەشکریان سەرکەراوە، هەرپاسە چنی پارێزگارو سلێمانی کوۍ باوە، هامکات سەردای ڕێکوزیا پیشەییەکا، ڕۆنامەکا، تەلەفزیۆنۍ و ڕادوێنەکا شارو سلێمانی مکەرا.
ئی سەرۋنەدایۍ بە مەرامو پەشتیوانی چا ڕۆنامەنوویسا ئەنجام مڎریا کە ئینۍ چېرو هەڕەشۍ هرووژمو دۆڵەتو تورکیاینە. قەرارا جە دما دمایی سەرۋنەداکەینە شاندەکە ئەرەیاۋنێوە پەی ڕای گرڎی وەڵا بکەراوە.
هەرپاسە چەمەڕا مکریۆ ئا ڕۆنامەنوویسۍ دماو سەرۋنەدایە مەیدانییەکەیشا، چنی ڕێکوزیا پیشەییەکا ئۆروپای کوۍ باوە و ئەنجامو سەرۋنەداکەیشا پنە ئەرەیاۋنا.
