شاندو رۆنامەوانا کە بە مەبەسو ئەوەکۊڵیای جە گەشمەرڎەکەردەی گوڵستان تارۍ و هێرۆ بەهادینی سەردای سلێمانیشا کەرڎەن، جە چوارچێوەو دیدارەکاشانە کۆمپانیاو چەتریشا سەرکەردۆ، کە ئا دووە رۆنامەوانە گەشمەرڎۍ چا کارشا کەردەن.
سەرو داواو ڕۆژنی (ڕۆنامەنوویسا ژەنا کورڎەسانی) و دەسوەڵێوستەی ڕۆنامەنوویسا کورڎەسانی، سەبارەت بە پەرسو گەشمەرڎەکەردەی ئەرەیاۋنکارا ئازادی (گوڵستان تارۍ و هێرۆ بەهادین)ۍ، جە ئۆرووپاوە جەمۍ ڕۆنامەنوویسۍ سەردای سلێمانیشا کەرد، ئارۆ سەرشا ۋنەو کۆمپانیاو چەتری دا پەی بەرهەمئاوردەی میدیایی.
شاندەکە کە پێکئامابۍ جە ڕۆنامەنوویسا ئالیجە ماگارە، ئێمما ئاودریە، دلێر ئاکرێی، هەندرێن فەرەج محەمەد، ژاڵان زیاعیە و دەڤریم ئاڵپە پەی ماوەو یەرۍ ڕووا شارو سلێمانینە مەناوە و سەرۋنەو لایەنەکا مڎا.
سەرەتا شاندەکە هامخەمی ۋێشا پەی گەشمەرڎەبیەی ڕۆنامەنوویسا “گوڵستان تارۍ و هێرۆ بەهادینی” بەربڕی و دماتەریچ باسشا جە دەورو ئەرەیاۋنای ئازادی کەرد و هەوڵو مانیایی کارمەندا کۆمپانیاو چەتریشا بەرز نرخنا.
هەرپاسە ئاماژەشا پانەی دا کە، ئەرەیاۋنای ئازاد سەرەتا جە چن کەسێوە دەسش پنەکەرڎ بەڵام ئیساتۍ بە سەڎان کەسۍ سەرو ئا ڕێبازیە کار مکەرا و تەرسی و تۆقنای مەمردنۆما بەپێچەوانۆ گڕوتینۍ زیاتەرما مڎۆ پنە و جەخت کریاوە، کە مشۆم ئەرەیاۋنای ئازاد کۊششەکا ۋێش زیاتەر بکەرۆ و دەنگو حەقیقەتی بیاونۆ بە جەهانی.
باسشا چانەیچ کەرڎ، هەرمانە سەرو کەیسو ڕۆنامەنوویسا “گوڵستان تارۍ و هێرۆ بەهادینی” جە دلێینەو جبەرۆ مکریۆ و مبریۆنە دادگاو لاهای.
قەرارا ئا شاندە سەردای چڼین ناوەندا ئەرەیاۋنای و ڕێکوزیایا تایبەت بە ئازادیی ڕابەربڕیەی و کایەو ڕۆنامەگەریی بکەنرا
