هێزەکاو رزگاری عەفرینی سەبارەت بە گەشمەرڎەبیەو دووۍ جەنگەواناشا ئەرەیاۋنانشا: "سەرەوەشی جە بنەیانەی قەڎر گرانو  کەمال پیری و گەشمەرڎە رەنجی و تێکۆشان خالید محەمەدی و گرڎو گەلە وڵاتپارێزنەکەیما مکەرمۍ".

ئەرەیاۋناکەیشانە ئاماژە پانەی دریان، کەمال پیر جە ناوچەو راجۆینە جە بنەیانێوە وڵاتپارێزنینە جە ئەڎێ بی، جە سەرەتاو شۆڕشو ۋەرنیشتینە و چا کاتەنە هەڵای کە تەمەنو جوانینە بۍ دلۍ هەرمانوکارو شۆڕشینە گۆرە مبۆ و دماتەر پەی ۋەرپەرچدایۆ گروپە چەتەکا پېسە نوسرەی و داعشی و گروپەکا تەرو سەر بە دۆڵەتو تورکی کە پەلامارەو گەلی مڎا، ڕووەمکەرۆ سەنگەرەکا جەنگی. جە روو سەروازی و بیردۆزییوە ۋێش قووڵمکەرۆوە و مبۆ بە جەنگەوانێوە نمونەیی.

ئانەیچ وزیان ڕووە، کە دماو ئەرەگیرکەرڎەو عەفرینی جە ساڵەو ٢٠١٨ ینە ڕووەمکەرۆ بەرەکاو جەنگی جە دژو دۆڵەتو تورکی ئەرەگیری و گروپە چەتەکاش و تا دما نەفەس بە ئاوات و مەرامی گۆرۆ بەشداریش جە ڕاپیماو ئازاڎینە کەرد. جە ریزەکا وەڵێوە یاگێش گێرتە و بە گیانبازیۆ ئەرکەکێش ۋییەرنۍ.

سەبارەت بە گەشمەرڎە خالید محەمەدیچ ئەرەیاۋییا، کە جە بنەیانێوە وڵاتپارێز بە کولتوری کوردایەتیۆ گۆرە بیەن و سەرو ئا بنەمایۍ رەنجێوە فرەش پەی گەلەکەیش و گێڵایۆ گەلەکەیش پەی سەرو خاکەکەیش کێشتەن. ڕۊو ٧و ئەیلولی جە ناوچەو شەرای سەر بە عەفرینی جە ئاکامو هرووژمێوە وەحشیانەو دژمنینە گەشمەرڎە بیەن و بی بە گەشمەرڎێوە رەنج و ئەرەکۊشای.

شناسنامەو گەشمەرڎا پی جۆرەنە:

ناسنامۍ: کەمال پیر

نامۍ و دما نامۍ: لوقمان حەنان

نامۍ ئەڎۍ: ئەمینە

نامۍ تاتەی: رەشید

شۊنەماو کاتو گەشمەرڎە بیەی: ٧و ئەیلولو ٢٠٢٤/ هەرێمو عەفرینی.

نامۍ و دما نامۍ: خالید محەمەد محەمەد

نامۍ ئەڎۍ: خالیە

نامۍ تاتەی: محەمەد

شۊنەماو کاتو گەشمەرڎە بیەی: ٧و ئەیلولو ٢٠٢٤/ هەرێمو عەفرینی