سەمپۆزیومو 'بنیاڎنیای ئاینڎەو کشتوکاڵی و وارڎەی' کە پارتو یەکسانی و دیموکراسی گەلا (دەم پارتی) جە چوارچێوەو چەمپنەکۊتەکا "نانی و دادپەروەری"نە دەسشپنەکەرڎەن سازکریا. سەمپۆزیومەکە جە هۆڵو کۆنفرانسو تاهیر ئەلچی سەندیکاو پارێزنەرا وانینە دەسش پنەکەرڎ و پەی ماوەو دووۍ ڕوا بەردەوام مبۆ.

جە سەمپۆزیومەکەنە هامسەرۆکەو گرڎینەو دەم پارتی تولای حاتەم ئۆغلارییە قسێش کەرڎۍ و ئاماژەش پانەی دا کە ئاکەپە بە جابەجێکەرڎەی سیاسەتە نیملیبراڵییەکاشۆ تورکیای ڕاوەبەر مکەرۆ و بە مەڵامەتو ئی سیاسەتاشۆ کەرتو کشتوکاڵیش بەرەو دلێنەشیەی بەرڎەن و واتش: "جەختکەرڎەیۆ جە ناچارەسەری پەرسو کورڎی بەتەنیا سیاسەتو حکومەتو ئاکەپەی نیا، بەڵکم هامکات سیاسەتی بنەڕەتی دۆڵەتیچا. بە سیاسەتو سۆچنای دەگا کوردییەکا زەرەرۍ فرە بە کشتوکاڵو کورڎەسانی میاونۆ. بە جۆرێوە کە وەڵتەرۍ تورکیا دۆڵەتێوە هەناردەکەرو بەرهەمی کشتوکاڵی بۍ، بەڵام جە ئیساتێنە بە مەڵامەتوو سیاسەتەکا ئاکەپەیۆ فاڕیان پەی دۆڵەتێوە ئاوردەکەرو بەرهەمی کشتوکاڵی. پۊکەی پېسە دەم پارتی دژۍ سیاسەتو بەکۆتا ئارڎەی کشتوکاڵینمۍ جە وڵاتەنە. جە کورڎةسانەنە سیاسەتی تایبەت هەن، بە سیاسەت و مۆدێلە یاگەگیرەکا پەرە بە کشتوکاڵی بڎەیمۍ و سەرۍ گنمۍ."

هەرپاسە تولای حاتەم ئۆغۆلارییە ئاماژەش پانەی دا کە جە کەرتو کشتوکاڵینە ئەغڵەبیەت ژەنینۍ هەرمانە مکەرا بەڵام ڕەنجو هەرمانەو ئاڎیشا پاشێل مکریۆ و موریۆ. یۆ جە گرفتە بنەڕەتییەکا هەرمانکەرڎەی زاوڵان جە کەرتی کشتوکاڵینە، پەنەوازا هەرمانکەرڎەی زاوڵا قەڎەغە بکریۆ.