سەروو کەشوو قەڵاو چەمچۊیۊ حیچ دار و تەوەنۍ نیا بۊردومان نەکریابۊ، و پارچەو بۊمبیش وەر نەکەوتەبۊ. گەریلێکۍ ئێگەی چێروو هجوومی قورسوو تەیارەکانە چالاکێی کەرا، وەروو ئانەی دژمن مەحاڵەکای تەرنە دیکە چەکی کیمیاوی جە دژوو ڕەفێقەکاشا بەکار نارۊ.
جە ١٤ نیسانوو ٢٠٢٢ سپای تورکی فاشیستی جە هەرێموو زاپی ئۊپەراسیۊنێوە داگیرکارییش دەس پەنە کەرد، ئێمە گرڎ ڕوۍ چەمەڕوانوو ئەرەیاونایەکا جەنگوو گەریلای بێنمۍ و گۊششا چەنەگێرێنمۍ. ئا ئەرەیاونایۍ، کە جە هەواڵەکاو ئاژانسەکایچنە وەڵێ کریینێ، سەرنجەو گرڎ کەسێوە کێشێنۍ پەی سەروو چالاکییاو گەریلای و هجوومەکاو دوژمنی، بەتایبەتی جە یەرە مانگی ویەرڎەنە جە دژوو مەحاڵوو بەرخۊدانوو چەمچۊی. کەشوو قەڵاو چەمچۊی سەر بە مەحاڵوو بەرخودانوو چەمچۊین، کە گرڎ ڕوۍ بە تانکۍ و تۊپۍ و چەکی قورس و تەیارەی جەنگی کریۊ ئامانج، بەڵام سەرەمڕا جە بەرخۊدانوو وێش.
چەمچۊ مەنتێقێوەن بەینوو ئەیالەتە سەرەکییەکاو گەریلاینە جە هەرێمەکاو پارێزنای مەدیای. قەڵاو چەمچۊی کەشێوە گرنگا، کە گنۊ بەینوو کەشە ستراتیجییەکا پێسە وەرخەل، گەشمەرڎە عادل، کارکەر، گەشمەرڎە شاهین، پەوکای وەختۍ سپاو تورکی فاشیستی بەتایبەتی جە کەشەکاو وەرخەلی و کارکەری و گەشمەرڎە شاهینی دەسش بە ئۊپەراسیۊنوو داگیرکاری کەرد، قەڵاو چەمچۊی دەورێوە فرە گرنگش جە پارێزنای پەشتێشاوە وینا. جە ڕۊو یووەموو جەنگەکەینە ئا گەریلۍ، کە سەروو ئی کەشاوە بێنۍ، هەوڵێشا دۍ دماو چەمداریکەرڎەی و کۊنتڕۊڵکەرڎەی ئا سەروازاو سپاو تورکی، کە وێشا جە مەنتێقەکەنە یاگەگێر کەرڎەبۍ، چالاکییشا وەراوەرۊ کەرا و دەیا چالاکیێشا کەرڎۍ. ئەدا و چەنەئامای سەروازە گەریلایەکا جە سەنگەرەکاو قەڵاو چەمچۊینە، بەتایبەتی جە بەرخۊدانوو مەنتێقەو وەرخەلی و زاپینە بەرکەوت، بیۍ ساعیبوو ڕەنج و دەورێوە گەورەی جە بەرخوداننە. ئا گەریلۍ، کە چاگە یاگێشا گێرتێبۍ، هەم بەرخودانشا بە شێوەو هەماهەنگی نزیکوو کەشەکاو وێشانە کەرڎ و هەم بە چالاکییەکاشا پەشتیوانییشا جە ڕەفێقەکاشا کەرد. هامکات جە دژوو ئۊپەراسیۊنی زەمینیی دژمنی پەی سەروو یاگەکاشا ئاماڎەکاریی وێشا کەرێنۍ.
سەروو کەشوو قەڵاو چەمچۊیۊ حیچ دارێوە نییا، کە پارچە و بۊمبش وەر نەکەوتەبۊ
تا مانگەو یەرۍ جە ئۊپەراسیۊنوو داگیرکارینە، سپاو تورکی چۍ ئۊپەراسیۊنی زەمینییش نەکەرد، بەڵام هەرێموو چەمچۊی جە ڕۊو سەرەتاو ئۊپەراسیۊنەکەیۊ پەشتیوانی جە بەرخودانوو مەیڎانوو وەرخەلی و گەشمەرڎە شاهینی کەرۍ، پەوکای بی بە ئامانجوو هجوومی عاسمانی و گورزی قورسی جە لاو بنکە سەروازییەکاو حدوودیوە. کەشوو قەڵاو چەمچۊی جە ڕۊو یووەموو ئۊپەراسیۊنەکەیۊ تا ئێساتۍ هەزارا جارۍ بە ئۊبۊس و چەکی قورس و تەیارەی جەنگی کریان ئامانج، جە لووتەکێشۊ تا مێرە دامنەکەش یەک دار و تەوەن نەمەنەن، کە بۊردومان نەکریابۊ، یان پارچۍ و بۊمبۍ و تۊپێش وەر نەکەوتێبا. گەریلێکۍ ئێگەی چێروو هجوومی قورسوو تەیارە جەنگییەکانە، چالاکی دژوو دژمنی کەرا تا دژمن نەتاوۊ بە ئاسانی جە مەنتێقەکای تەرنە چەکی کیمیاوی دژوو ڕەفێقەکاشا بەکار بارۊ.
پێسە ڤیدیۊو دماو چالاکییەکانە وینییۊ، سپاو تورکی بە تانک و هەم بە چەکی قورس پێسە تۊپا و هاوانا کەشوو قەڵاو چەمچۊی بەهەسی تۊپواران و ئاویرواران کەرۊ. سەروازە تورکەکۍ وەراوەروو یەک گولـلەو گەریلایانە چنڎین تەنێ بۊمبێ قورسێ بەکار مارا و ئی ڕاسییەیچە جارێوە تەر بە کامێراو گەریلایەکا تۊمار کریان و ئانەیە پەی گرڎ کەسی ئاشکرا کەرۊ.
بەرخۊدانوو شکۊی جە تونێلەکاو جەنگوو گەشمەرڎە ئارژینی و گەشمەرڎە ئومێدینە جە چەمچۊ
جە مانگەو تەمووزینە سپاو تورکی داگیرکەری، چێروو هجوومی دژواروو تەیارەی سیخوڕینە بە تانکۍ پڕاوە پەی مەیڎانەکاو بەرخودانوو چەمچۊی. سپای داگیرکەرەو تورکی، کە بەرەو تونێلەکاو جەنگوو گەشمەرڎە ئومیدی و گەشمەرڎە ئارژینی سەر بە هەرێموو بەرخودانوو چەمچۊیۊ کەوت ڕا، پێسە هەرێمەکای تەری هجوومی نائەخلاقییش کەرد. جە تونێلەکاو گەشمەرڎە ئومیدینە تەنیا تیمێوە گەریلای ماوەو دووۍ مانگا جە دژوو تانکی، کیمیاوی و بانگەوازەکاو وێدەسۊدای سپاو تورکی وێشا گێرت. چەتەکاو سپاو تورکی گرڎ ڕووۍ داواو وێدەسۊدای چا گەریلایا کەرێنۍ، کە تونێلەکانە وێشا گێرتە بۍ و بە شێوێوە نائەخلاقی ئی بانگەوازەیە کەرێنۍ، "زانمێ شمە ژمارەتان کەما، وەرگێریی مەکەرڎۍ، هەکەرەکوم وێتا دەیدۍ دەسۊ ژیوایۍ شاهانەتا پەی مسۊگەر کەرمۍ". بەڵام گەریلێکۍ ئاگەی جە دژوارتەرین هەلومەرجنە وێشا گێرت، زانێنۍ کە گرڎ جارۍ بە چالاکییەکاشا تفۍ کەرا دیڎەو ئا چەتا. ٢ مانگۍ بۍ یەک چرکە دووەدڵی و بۍ ئانەی سەرە پەی هجوومەکاشا نامنارە، درێژەشا بە بەرخودانوو وێشا دا. ئا سەروازە تورکۍ کە بە تانکۍ ئامێبێنۍ وەرڎەموو تونێلەکا چاگە بە دەیانشا چەنە مرێنۍ.
ناستشا چەکەکەو گەشمەرڎە چیا ڕووبارۍ گنۊ زەمین
سەنگەرێوە تەروو بەرخودانی جە هەرێموو چەمچۊی تونێلەکاو جەنگوو گەشمەرڎە ئارژینۍ بۍ. گەریلێکۍ جاگەیچ جە بەرخودانوو دووۍ مانگانە زەمیننە و هەم تونێلەکاو جەنگیچنە جە دژوو سپاو تورکی چالاکیێ فرە کاریگەرشا کەرد. جە گەریلاکاو یەژاستاری چیا ڕووبارە (دوچەم چەلیک) کە چاگە وەڵێبییەی بەرخودانی کەرۍ، جە ئەنجاموو تەقەمەنیی قەدەغەی کیمیاوی سپاو تورکیوە گەشمەرڎۍ بییە. ڕەفێقەکاو گەشمەرڎە چیا ڕووبارۍ، کە پەی تۊڵەسانایۊ چاگە چالاکیی وافرشا کەرد، ناستشا چەکوو ڕەفێقەکەیشا گنۊ زەمین. چا چالاکییەنە کە جە مانگەو ئابی کریا، گەریلێکێ لوۍ سەروو جەنازەو سەروازا و دەسشا گێرت ملوو و بڕێوە فرە کەلوپەلی سەروازیرە.
دماو مەڕەو بریندارا سەندرۊمی تازەو هەڵۊکاو زاگرۊسی: قەڵاو چەمچۊی
سپاو تورکی کە پلانەش نیێبێرە کەشوو قەڵاو چەمچۊی گێرۊ و تەماموو مەیدانەکاو بەرخودانوو چەمچۊی پاکتاو کەرۊ، تا ڕاددێوە سەروو تاشە بێعەندازەکاو ئا کەشاوە گیرشا وارد. کەشوو قەڵاو چەمچۊی بە کویسان و تاشەکاشۊ پەی گەریلایا بی بە قەڵغان. سپاو تورکی کە چەند مانگێن هەوڵۍ مڎۊ بە حەر نۊعۍ بۊ سەروازەکاش چا کەشنە گیرۍ کەرۊ، جە ٩ مانگێ جەنگنە جە ئەنجاموو دەسکەردەیۊ و کاریگەریی گەریلاکاوە تا ئێسەیچ نەتاوانشا سەروازەکاو وێشا یاونا کەشەکە و گیرشا کەرا. جە ماوەو ٩ مانگا جەنگینە بڕۍ هەلیکۊپتەرۍ سکۊرسکۍ و کۊبرێ چاگە گورزشا وەر کەوت. فەرمانڎەکاو سپاو تورکی کە نەتاواشا سەروازکاشا چا هەرێمەنە بنیارە، پێسە شێتی ئەمرە کەرێنۍ پەی ماوەو ٢٤ سەعاتا ئاگەی بۊرڎومان کەرا. جە هجوومەکاو ئاگەینە سپاو تورکی کۊکوشوو ژیوگەی کەرۍ. بەڵام ئا گرووپە گەریلۍ چاگە دژوو ئا گرڎ هجوومانە وێشا گێرت ٩ مانگۍ و وەروەروو دژمنیوە سەرەشا نەکۊمنارە و درێژەشا بە پارێزگاری جە سەنگەرەکاشا دا. گەریلێکێ هەپەگە و یەژاستاری، کە تا ڕاددەێوە، گرد ڕوۍ جە دژوو هێزە داگیرکەرەکا کە پاینوو کەشەکەینە بێنۍ و نیشانەماڕۍ کەرێنۍ، سەروازۍ و چەتەکاو سپای تورکیشا بەرەو سەندرۊمی تازەو زاپی بەرڎۍ.
ف.ق
