نۋېسېنگەو ېاۋنەری سەرۊک ۋەزېران و عێراقی ئەرەېاۋنێۋەش ۋەڵا کەرڎۊ کە چنەشەنە ئامان ، محەمەڎ شېاع سودانی ، سەرۊک ۋەزېران و عێراقی ، لېژنێوە باڵاش پۍ ھەموارکەرڎەېۊ دەسووری بە سەرۊکاېەتی حەسەن ېاسری پێک ئاورڎ ، کە ھۊرمێزۊ بە ئەنجام داو کۊبېەېۊ چنی نۋێنەرو لاېەنەکاو پەرلەمانی ، ھەرپاسە گفتوگۊ کەرۊنە چنی دەسەڵات و داڎوەری بە مەبەس و نېاېرەو نەخشە ڕێۋی پۍ ئەنجام داو ھەموارکەرڎەېۊ دەسووری .

ئاماژەش پانەی کەرڎ ، ئی ھەنگامۍ پێسە پاپەنڎبېەی مۍ جە لاېەن و حکومەتېۊ پۍ جێبەجۍ کەرڎەو دلێگېرو کارنامەو ۋەزاری ، کە جە لاېەن و پەرلەمانېۋە قەبوڵ کرېان . ھەرپاسە بەپاو ڕێککۊتەو ھێزە سېاسېەکا سەرو پەنەوازی ئەنجام داو ھەموارکەرڎەېۊ دەسووری ، پۍ ئانەی دوورۍ گناوە جە بن بەسە سېاسېەکا کە جە قۊناغە جېاجېاکانە ڕووەشا دان بەتاېبەت چی دماېیەنە .

رۊشنېچ کرېانۊ ، ئی ڕاچارۍ حکومەتیە پۍ بەدەس ئاوردەو ئاشتی و ئارامی پەنەوازەن جە عێراقەنە ، بە پاو قەرارەکاو ۋەڵتەرو داڎگاو باڵاوفېدراڵی و ھەڵوێسەکا ئەنجومەن و باڵاو داڎوەری ، کە برېتی بۍ جە داواو ھەموارکەرڎەېۊ دەسووری ، جگە چانەی کە ئی ھەنگامۍ پەشتېوانی حکومەتی مکەرۊ پۍ ڕاو گرڎی جە عێراقەنە سەبارەڎ بە پەنەوازی ڕاسەقېنەو ئەنجام داو ئی دەسکارېا .

شارەزێو شرۊڤەکارۍ عێراقی بڕواشا چانەنە ، کە ھەنگامەکۍ  سودانی پۍ واوەی ئەرەمەرزېارەو پەېۋەنڎی چنی " ڕەوت و سەدر "ی مۍ ، کە ېۊ جە داواکاو سەدری برېتی بۍ جە ھەموارکەرڎەېۊ چن ماڎێێوە دەسووری چانېشا فاڕاو فۊڕمو سېستمو سېاسی چا ۋڵاتەنە .

چەمڎارۍ ماچا ، ھەموارکەرڎەېۊ چن ماڎێوە دەسووری پەنەوازش بە ڕێککۊتەی سېاسی ھەن ، چنی جېاوازی فرەیش سەرو ھەموارکەرڎەېۊ چن بڕگێوە کە کێشە جە مابەېن و چن ھێزێۋە سېاسېنە ۋەش کەرۊ . ڕەخنە سەرو ئی ھەموارکەرڎەېە ھەن ، ھەرچنڎە ھەموارکرڎەکەی بېەن بە پەنەوازی بە تاېبەتی چنی بېەو فەراغێوی فرەی .  

عەلی تەمېمی شارەزاو بوارو ېاساشناسی بڕواش چانەن دەسوورو عێراقی ېۊن چا دەسورە قورسا کە ھەموارکەرڎەېش قورسا مەگەر بە ڕێۋە درێژ مەودا ، ھەرپاسە ھەموارکەرڎەو دەسووری جە ماڎەکاو ١٤٢ وێو ١٢٦ و دەسوورېنە ئامان ، کە مشۊ سەرەتا ماڎەو ١٤٢ جێبەجۍ کرېۊ ، پێسە جە قەرارەکەو داڎگاو فېدراڵېنە ئامان، پەرلەمانېچ مشۊ لېژنێۋە پۍ ھەموارکەرڎەېۊ پێک بارۊو ھەموارکەردەکەی بە فرەېی ڕەھای قەبوڵ کرېۊ ، پۍ ئانەی وزاش دەنگداېۊ .

ھ.ئ