تەڤگەرو گلېرگەو دیموکراتیکی (تەڤ_دەم) بۆنەو ٢٦ ەمین ساڵیاڎو پیلانگێڵنیی ٩ و تشرینو یووەمی دژو ڕابەرو گەلوو کوردی عەبدوڵا ئۆجالانی ئەرەیاۋنێوە نوویسیاش وەڵا کەرڎۆ.

جە ئەرەیاۋناکەینە دەسنیشانش مکەرۆ کە، دماو پیلانگێلنیی مېیاننەتەوەیی ٩ و تشرینو یووەم و ١٩٩٨ ی و باڵبەسکەردەی ڕابەرو گەلوو کوردی عەبدوڵا ئۆجالانی و ڕادەسکەردەیشۆ بە تورکیای جە ١٥ و شوباتو ١٩٩٩ینە، قەیرانەکۍ ۋەرکۆتوو مېیامینی و کورڎەسانی ڕۆ بە ڕۆ دژوارتەرۍ بیۍ.

تەڤدەم ئەرەیاۋنۆش جە سەردەمو چەقبەستەی ۋەرکۊتوو مېیامینینە، وەختێ مرۆڤایەتی و گەل و ئەرەنیشتا هەرێمەکەی ڕووبەڕوو قەیرانۍ و فەوتیای باوە، ئازادی جەسەیی ڕابەرو گەلوو کوردی عەبدوڵا ئۆجالانی ئەهمیەتۍ زیاتەرش هەن، کرێڵو چارەسەری ئینا ئیمراڵیی.

تەڤ_دەم جەخت مکەرۆوە بەبێ ئازادی جەسەیی ڕابەرو گەلوو کوردی عەبدوڵا ئۆجالانی و چارەسەری سیاسی پەرسو کوردی ئارامی و ئاشتی جە هەرێمەکەنە نمۍ دی، ماچۆ: "ئانە ٢٥ ساڵێن ڕابەرو گەلوو کوردی عەبدوڵا ئۆجالان دلۍ گۆشەگیری و ئەشکەنجەی و فشارو دۆڵەتو تورکینە، نە تەنیا پەی گەلوو کوردی، بەڵکم پەی تەمامو گەلا ۋەرکۊتوو مېیامینی و جەهانی ئەرەکۊشۆ. فیکر و فەلسەفەکەش بیەن بە هیواو گەلا ۋەرکۊتوو مېیامینی و سەرو ئاستو جەهانی وەڵا مەبۆوە.

شەرما پەی مرۆڤایەتی و ڕێکوزیاکا مافو مرۆڤی و دادگاو ئۆروپای، کۊششکارۍ کە پەی ئاشتی و مرۆڤایەتی ئەرەکۆشۆ دلۍ چوار دیوارا ئیمراڵینە بۆ، کەچی بکوژ و دیکتاتۆرەکۍ کە گەلا قڕ مکەرا، باس جە یەکسانی و دیموکراسی بکەرا.

تەڤ_دەم داوا جە گەلو کوردی و تەمامو ڕێکوزیا و ئازادیوازا و ڕێکوزیاکا جەهانی مکەرۆ: "پەی ئازادی و یەکسانی و دیموکراسی، گۆشەگیری ڕابەر عەبدوڵا ئۆجالانی بماڕا و ئازادی جەسەیی ئاڎیی مسۆگەر بکەرا".