تەڤگەروو ئازادیی گلێرگەو کوردستانی داواش وەنەو لایەنە ڕسمییەکا و گەلاو عێراقی و هەرپاسە کوردستانییا کەردە، کە وەراوەروو هجوومە ئەرەگیرکەرییەکاو سوپاو دەوڵەتوو تورکی بێدەنگێ نەبا و هەڵوێستی نیشتمانیی و ئەخلاقییشا بۆ.
تەڤگەروو ئازادیی گلێرگەو كوردستانی بارەو تەرسەکاو هجوومەکاو دەوڵەتی ئەرەگیركەروو توركیوە پەی سەروو هەرێموو كوردستانی، ئەرەیاوناێوەش وەڵا کەردۆ.
ئەرەیاونایەکەنە ئامان، تارێخوو گەلاو عێراقینە نەبییەن، ئەرەگیركاریی قبووڵ بكریۆ، ڕوەکاو ٢٢ و ٢٣ حوزەیرانینە سەدان تانكێ و زرەپۆشێ و هەزاران سەروازێ سوپاو توركی بە بەهانێ بییەی پەكەكەیوە ئامێنێ دلێ خاكوو هەرێموو كورستانی و عێراقیوە، ئینەیچ وەڵێئامایوی خەتەرا و دلێنەنە پیلانێوەنە پەی ئەرەگیركاری و گێرتەی خاكوو پانیشتوو كوردستانی بەهەمیشەیی.
ئاماژە پانەیچە كریان، هێزە سیاسییە نیشتمانییەكێ و گەلاو عێراقی، مشۆم ئا بێهەڵوێستییەو حكومەتی فیدراڵی و هامكارییەكاو پەدەكەی و بنەیانەو بارزانی پەی سوپای ئەرەگیركەرەو توركی ڕەت بكەراوە و شەرمەزارش بکەرا، ئانە کە توركیا مکەرۆش، پاشێلكاریێوی تەماموو یاسا میاندەوڵەتییەكان و پاشێلكەردەی سەروەریی خاكوو عێراقیا و ژیوای و ئاسایشوو هاموەڵاتاش بەتەمامی وستەن چێروو هەڕەشا و تەرسێوە.
ئانەیچ وزیان ڕووە، مشۆم پەرلەمانتاراو عێراقی خاوەنداریی چا قەسەمواردەیە و وەعدا بکەرا، كە دانشا بە گەلوو عێراقی، چەنی و بە چە شێوێوی وەرگێریی جە خاكی و سەروەریی وەڵاتەكەیشا و هاموەڵاتاشا مکەرا؟ سەرۆكایەتیی كۆماری و سەرۆكوەزیرانوو عێراقی و وەرپەرسێ تەرێ حكومەتوو عێراقی، ئینێ وەردەموو تاقیكەردەیۆێوی گەورەینە پەی جوابوو ئا دەستدرێژییە ئاشكرایاو دەوڵەتوو توركی، چونکوم ئا ئەرەگیركارییەو سوپاو توركی هیچ بەهانێوی ورنمەگێرۆ.
باس چانەیچە کریان، ئانە کە ڕووەو ئا ئەرەگیركاریییەنە مردانۆ وەرگێری مکەرۆ، هێزوو پارێزنای گەلان، حەر ئا گەریلێ بێنێ کە فریاو شنگالی و ئێزدییەكا كەوتێ و جە كۆكوشیی و دلێنەبەردەی یەكجاریی ڕزگارێشا کەردێ.
جەختیچ کریانۆ، نمەبۆ حكومەت و گەلاو عێراقی، ئا ڕوەشا ویر بشۆوە، كە حكومەتەكەو ئەردۆغانی و چەتەكێ و هێزە وابەستەکا پەی پارچەكەردەی خاك و گەلاو عێراقی هامكاری و پەشتیوانیی داعشی کەرێنێ، بە سەدان هەزار هاموەڵاتێ جە گردوو نەتەوە و پێكئامایەکاو گەلاو عێراقیشا كەردێ قوربانی.
هەرپاسە ئەرەیاونیان، جیاتیی ئانەیە حكومەتوو عێراقی ڕاو ڕاوشۆنە یاساییە میاندەوڵەتییەكاوە، داوای یاساییەش سەروو دەوڵەتوو توركی و هامكارەكاش و داعشی تۆمارە بكەرۆ، بەپێچەوانەوە بەو بێدەنگی و بێهەڵوێستییەیشە مبۆنە بە بەشێو چا وێرانی و ئەرەگیركارییە سەروو خاكوو وێشۆ مکریۆ.
ئانەیچ ئامان، ئێمە پیسەو هەرمانێوی نیشتمانیێ و ئەخلاقیێ، جگە جە شەرمەزاركەردەی بێهەڵوێستیی حكومەتوو عێراقی و هامكارییەكاو پەدەكەی پەی سوپاو توركیای، بە هەرمانەی ئەخلاقییە و تارێخییەو وێماش مزانمی، گرد ئاستێوەنە هەرمانە پەی وەرگێریی ئا ئەرەگیركارییە بكەرمێ.
ئاخروو ئەرەیاونایەکەینە ئامان،" سەروو ئا بنەمێوە، بانگەواز وەنەو تەماموو ئا لایەنا مکەرمێ، كە نمەوازانە چێروو سێبەرە و ڕەحمەتوو سوپاو ئەرەگیركەرانە بژیوا، مشۆم خاوەنداریی جە سەروەری و شكۆو گەلی بكەرمێ و بە یەك ڕیز چەنی گەلەكەیما بمدرمێ و ئەرەگیركاری و خیانەت بماڕمێ، گەلوو ئێمە بە كورد و عەرەب و تەماموو پێکئامایەکاشۆ، وەراوەروو ئەرەگیركاری و پاشێلكەردەی سەروەرییە نیشتمانییەكەیشاوە مدرمێوە".
