تەڤگەرو ژەنا ئازاڎی (تەژەئا)ی جە چوارچێوەو کۆشش و ڕێکوزیای ۋێشەنە جە بیناو پارتو هەرێمە دیموکراتیکەکا (دەبەپە)ینە جە ئامەد کوۍ بیێوە. ڕوۍ سەرو پرسەکا کوۍ بیێوە، دماتەر داواو بەشداربیەیشا کەرڎ جە "گلېرۆبیەو ئازاڎی"نە کە ١٣ و تشرینو یووەمی ئامەدەنە ئەنجام مڎریۆ.

پەرلەمانتارو دەم پارتی ئامەدی، عەدالەت کایا ئەرەیاۋناش گرڎو گرفتەکا پێوەسێنۍ بە سیاسەتو جەنگیوە، واتش: "مشۆم جە گلێرۆبیەو ١٣ و تشرینو یووەمی جە ئامەد، دەنگ و ناڕەزایی ۋێما دژو جەنگی و گۆشەگیری هۆربڕمۍ. ١٣ و تشرینو یووەمی ئامەدەنە، پەنەوازا دژو جەنگی پارێزگاری جە ئاشتی بکەرمۍ، دژو پیلانگێڵنیەکا پارێزگاری جە ئازاڎی بکەرمۍ. دژو گۆشەگیری، ئازاڎی بەڕێز عەبدوڵا ئۆجالانی پارێزنمۍ. ئازاڎی بەڕێز عەبدوڵا ئۆجالانی، ماناو چارەسەری پەرسو کوردین".

عەدالەت کایا ئەرەیاۋناش تنوتیژیی سیستەماتیکی ئیمراڵی کاریگەری مکەرۆ سەرو تەمامو گلېرگەی، پەی هۆرگێرتەی گۆشەگیری و ئازاڎیی ڕابەرو گەلوو کورڎی عەبدوڵا ئۆجالانی داواش کەرڎە گرڎ کەسۍ بلۆ پەی مېڎانوو وێستگەی.

"داوا جە گرڎ کەسۍ مکەرمۍ بلا پەی مېڎانوو وێستگەی"

چالاکەو تەژەئای هاڤا جانە، واتش: "جە کەسایەتی بەڕێز عەبدوڵا ئۆجالانینە، تەمامو گەلوو کورڎی گۆشەگیر کریان. پەی ماڕای ئی گۆشەگیرییە، پېسە ژەنا کورڎی بە ڕەنگ و هەلهەلە و جۆشو خرۆشو ۋێماوە ڕووەمکەرمۍ مېڎانوو وێستگەی".

چالاکەو تەژەئای عادلە فیدانە واتش: "داوا جە گرڎ کەسۍ مکەرمۍ ١٣ و تشرینو یووەمی بە فەلسەفەو ژەنی ژیۋای ئازاڎیی جە مېڎانوو وێستگەینە دەنگو ۋێشا هۆربڕا".