وەزارەتو تەندروسی لوبنانی وەڵاش کەردۆ کە جە ئەنجامو هرووژمەکا ئیسرائیلینە پەی سەرو ناوچە جیاجیاکا ئا وڵاتیە، رۆو یەرە شەممەی ٥٥ کەسۍ کوشیێنۍ. حزبوڵایچ ئەرەیاۋناش کە رووبەڕوو ئا سەروازا ئیسرائیلی بیێنێوە کە هەوڵشا دابۍ بلانە دلۍ لوبنانی.
وەزارەتو تەندروسی لوبنانی ئەرەیاۋناش کە ڕۆو یەرە شەممەیچ سەرەمڕە هرووژم کریان سەرو پانیشتوو لوبنانی و بیقاعی. ئەرەیاۋییا کە دۆروبەرو پانیشتوو بەیروتینە دووۍ هرووژمۍ ئەنجامدریێنۍ. بە پاو ئەرەیاۋناو وەزارەتەکەی جە ئاکاموو هرووژمەکانە ٥٥ کەسۍ گیانشا جە دەسدان و ١٥٦ کەسێچ زامڎارۍ بیێنۍ.
وەزارەتو تەندروسی ئاسکراش نەکەرڎەن کە چن چا قوربانیا ژەنی و زاوڵۍ بیێنۍ. ۋەرپەرسا لوبنانی جە ئەرەیاۋناکاشانە ژمارەو قوربانیا مەدەنی و سەروازی جیانمەکەراوە.
جە لێوەتەرۆ حزبوڵاو لوبنانی ڕۆو چوارشەممەی ئەرەیاۋناش، کە جە ۋەرا ۋەرو سەروازا ئیسرائیلینە کە هەوڵ دێنۍ بەیا دلۍ خاکو لوبنانی جەنگشا کەرڎەن و هرووژمشا کەرڎەن سەرو یەکینەکاو ئیسرائیلی جە دیمەکەی تەرو سنوورینە.
